豐富鰻魚定食、芝香梳乎厘班戟 荃灣新開木系西日Cafe
4天前

美食可以療癒人心,如果加上餐廳環境舒適嘅話就更好啦係咪?荃灣呢間新店就滿足以上願望喇。主打多款西日料理,好似蒲燒鰻魚滑蛋定食、全日早餐、日式鬆軟班戟等。裝修以木為主,加上花草裝飾感覺Homey,最啱嚟Hea返半日呀。
 



hōmu by favilla 嘅「hōmu」日文有「家」嘅意思,餐廳裝修以溫暖柔和嘅原木為主,配合半開放式設計,的確有種返到屋企咁嘅放鬆感。食物即叫即製,而且同其他分店一樣選用日本雞蛋、日本米,唔添加任何味精,仲有供應兒童餐!
 


蒲燒鰻魚滑蛋定食($108,午餐時段$118配熱日本焙茶或者熱黑咖啡)

定食包括日式味噌湯、漬物、是日沙律、白飯。蒲燒無激素鰻魚肉厚香甜,配埋滑蛋無論味道定口感都好夾。連沙律都有用心,醬汁味道酸甜開胃,原來係因為落咗鮮橙汁同蜜糖,再加開心果碎增加口感。
 


自家製意式雪糕(套餐+$30)

意猶未盡嘅話推介追加餐廳餐廳自家製嘅Gelato,有牛奶、伯爵茶、抹茶三款口味選擇,伯爵茶香濃郁,獨特嘅佛手柑香氣清新解膩。Gelato口感綿密扎實,無一般雪糕咁Haevy。
 



溫泉蛋牛油果蟹肉蕃茄酸種包($98,午餐時段配熱日本焙茶或者熱黑咖啡)

呢款就用咗比較煙韌有彈性嘅無添加酸種包,加上牛油果、蕃茄、蟹肉同溫泉蛋,蟹肉分量十足完全唔使驚麵包唔夠味,而且篤穿溫泉蛋嗰下真係好有治愈感啊。配搭黑醋汁沙律同鮮果,係食得飽又唔會太膩嘅輕食。
 


【素食】全日早餐($98)

同其他分店一樣,呢度有供應和式、洋式,同素食三款唔同配搭嘅全日早餐。唔好以為素食就會寡,呢份素食All Day Breakfast有味噌炒蛋、大啡菇、秋葵、蕃茄、是日沙律同牛油吐司。味噌嘅鹹香增加炒蛋味道,大啡菇加咗芝士更加香口,牛油吐司外酥內軟。如果係食全素嘅朋友可以向店員要求走雞蛋同芝士,好貼心。
 


蟹肉忌廉蛋黃汁闊條麵($98)

比起其他分店,呢度有更多西餐選擇,例如意粉、晚市更有慢煮焦糖豬手、炭燒和牛小排等!呢份蟹肉忌廉蛋黃汁闊條麵就全日供應,忌廉蛋黃汁味道香濃,而且越南藍花蟹肉落得夠重手,撈勻後啖啖都有蟹肉鮮味,好滿足。
 


兒童餐($88)

荃灣呢個商場係唔少家長會帶小朋友嚟「放電」嘅地方,所以餐廳亦特別設計兒童餐,主食可以揀迷你飯糰、迷你烏冬或者迷你漢堡,迷你漢堡用嘅係自家製雞肉扒。配搭玉子燒、水果、粟米、炸雞,同三色薯條,即係紫芯蕃薯、橙芯蕃薯,同蕃薯,顏色豐富而且可以配搭唔同醬汁,可以滿足鍾意探索小朋友嘅好奇心。飲品亦有100%純橙汁、100%純時令果汁,同泡沫鮮奶選擇,爸爸媽媽們可以放心畀小朋友享用啦。
 

更多【新店直擊】:
1. $298半自助午餐 海鮮、燒牛肉、靚蛋糕任食 抵食意大利餐廳進駐尖沙咀新商場
2. 倫敦名店Duck&Waffle現已進駐中環 必試鴨肉窩夫+香港限定菜式
3. 精緻海膽竹筒飯Set、好玩流水烏冬 九龍灣新日式竹筒飯專門店

  


日式芝香鬆軟班戟($98)

唔單止小食同主食,甜品亦有唔少新選擇。好似呢份日式芝香鬆軟班戟咁。空氣感十足嘅班戟用咗日本雞蛋同日本麵粉,芝士更係意大利嘅Ricotta Cheese,味道清雅香醇。班戟口感輕盈,撒上糖霜後味道微甜。可以按自己配芝士忌廉同士多啤梨果醬,享受多重口味變化。
 


玫瑰鮮奶咖啡($45/Hot(M),$49/Hot(L),$49/Iced)

品牌主打精品咖啡,新店當然亦供應多款咖啡飲品。鮮奶咖啡用嘅House Blend混合危地馬拉同埃賽俄比亞兩個地方嘅咖啡豆,帶花香同苺果香。自然同花香濃郁嘅玫瑰亦非常夾,加上咖啡拉花同玫瑰花瓣點綴,色香味同時滿足。
 


自家製藍檸檬蘇打($48)

同坊間多數以藍柑橘糖漿調配嘅唔同,呢度嘅藍檸檬蘇打用蝶豆花配搭檸檬蘇打,既有搶眼嘅紫藍色漸層,搞勻後更加會變成夢幻嘅淺紫色!檸檬蘇打酸爽帶少少氣泡口感,提神或者消暑都得。
 


餐廳不時舉辦展覽,最近就有插畫師Octoberfourteenth嘅小店風情畫





hōmu by favilla
地址:荃灣青山公路荃灣段398號愉景新城2樓2013號舖




文、相:Cathy

關鍵字
荃灣
Cafe
鰻魚滑蛋定食
全日早餐
兒童餐
班戟
咖啡
homu
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
【隨時更新】便利店尋寶 每周新品速報
6天前
尖沙咀新商場開幕 過江龍餐廳一覽
2019-08-30
【2019中秋】最新人氣話題+送禮靚盒月餅集合
6天前
【蠔癡必看】生蠔海鮮的浪漫盛宴!
2019-08-27
台中人氣手工芋泥甜品登陸尖沙咀 必試招牌雙芋仙草奶凍、神仙奶
2019-09-03