今年興摩登茶飲，最近元朗呢區都多咗呢間開放式設計嘅茶吧，一筒筒台灣靚茶葉唔單止質素有保證，而且仲係特別先磨碎再用萃茶機萃取茶湯。到底係Gimmick定真係特別唔同？等開飯仔幫大家親身試茶！
 

COMEBUYTEA係台灣品牌Come Buy嘅新Line，而元朗店係台灣以外嘅第一間分店！主打台灣茶飲，一嚟到就睇到11款嚟自台灣嘅茶葉一筒筒咁放哂喺吧枱後面，各有唔同特色同味道。花多眼亂嘅話，不妨請佢地嘅調茶師介紹一下。除咗有台灣調茶師長駐之外，連香港店員亦特別去過台灣培訓，所以對各款茶葉特性同配搭建議都瞭如指掌。
 

桂花釀烏龍（$28）

想試茶葉真味可以試精選原葉茶系列，當中阿里山高山烏龍同日月潭蜜香紅茶仲要係台灣店都得茶葉買無現泡飲！開飯仔試咗最受歡迎嘅桂花釀烏龍，裡面加咗台灣桂花蜜，飲落桂花甜香突出，同烏龍茶嘅清幽特質配合得啱啱好，清甜討喜而且茶湯口感相當順滑，就算平時比較少飲茶都會覺得非常易入口。
 

炭焙烏龍 + 皇家厚奶（$25）

想有多啲變化嘅話，可以試下佢地嘅混搖茶。濃醇奶香系列裡面有三款口味：香醇鮮奶、漂浮奶霜同皇家厚奶。漂浮奶霜即係台式飲品嘅奶蓋，而皇家厚奶最為特別，用嘅係香港人飲開嘅淡奶。呢杯炭焙烏龍+皇家厚奶比港式茶餐廳嘅絲襪奶茶少一份紅茶苦澀，多咗一種烏龍獨特嘅青茶香同烘焙嘅炭香。
 

清香烏龍 + 芭樂原汁（$28）+ 纖美紫蘇（+$5）

另外亦可以選擇加果汁，店裡面所有果汁同追加配料都同台灣店嘅一樣，而且果汁係100%原果汁。想有台灣Feel嘅話，可以試下配芭樂（番石榴）汁再加纖美紫蘇，即係明列子同台灣愛玉。愛玉啫喱夠Q彈，明列子亦可以增加咬口。
 

所有茶飲都係即叫即磨，用萃茶機以五段式萃取茶湯後由調茶師再手調。雖然客人等嘅時間長咗，但背後當然係有原因啦。首先現磨茶葉可以保留更多兒茶素，而萃茶機同五段萃茶嘅方法都係品牌自家研發，背後原理有啲似功夫茶，但每種茶葉都會調整，由茶葉碎嘅粗幼度到沖茶嘅水溫都會有所不同。的確沖出嚟嘅茶湯比一般嘅更為清澈純淨，茶韻亦會更清幽悠長。
 

品牌亦特別採用開放式茶吧嘅形式，等大家可以多啲同調茶師交流，無論係口味配搭，定係同茶相關嘅問題佢地都會樂意解答，飲茶之餘仲對台灣茶可以有更多了解。開飯仔幫大家問埋喇，嚟緊佢地亦希望推出更多選擇，例如引入近年大熱嘅冷泡茶，或者將更多台灣茶選擇帶嚟香港。而除咗元朗店之外，亦喺其他區物色緊新店，如果你都係Tea Lover嘅話不妨多加留意！
 

COMEBUYTEA
元朗元龍街9號形點一期2樓2065號舖

文、相、片：Cathy