親民價歎正宗泰國菜!mango tree新線登陸元朗(有片)
2019-02-28

香港人唔單止鍾意去泰國玩,同樣鍾意食泰國菜,呢間嚟自泰國嘅餐廳最近喺元朗開咗間新店,保留原有人氣菜式再改良,而且以親民價作招徠,環境清幽有空間感,最啱一家大細或者三五知己嚟開心Share!
 


mango tree kitchen係Mango Tree全新品牌,以親民路線嘅地道泰國菜為主。餐廳更搵嚟著名室內設計師梁天志先生主理,以綠色園林為主題,糅合木材、泰國傳統擺設同戶外綠色景致,氣氛悠閒舒適。
 


泰式雜錦拼盤($198)

最啱心大心細咩都想試嘅朋友,一份拼盤有齊皮脆肉彈牙嘅泰式炸蝦餅、帶檸檬葉香嘅泰式炸魚餅、惹味而口感豐富嘅燒鴨米紙卷、全素嘅炸素菜春卷,同香口又Keep到肉汁嘅班蘭嫩雞卷。
 


炭燒豬頸肉($78)

手切豬頸肉肉質嫩滑爽口,燒過後油香更突出但唔會過肥,淡淡香茅香味配埋特色泰北醬就更加惹味香口。
 


青芒果軟殼蟹沙律($98)

爽脆嘅青芒果切絲然後加入青檸魚露汁同辣椒粉,比想象中辣但非常醒胃。加上炸至金黃香脆嘅軟殼蟹,口感層次豐富。
 


芒果樹黃咖喱炒蟹($368)

對比起嚟黃咖喱算微辣,以雞蛋、椰奶同香料香味為主,配返份薄餅點汁食真係一流。當然肉蟹亦係重量級主角,肉厚鮮甜,蟹殼亦有先敲碎方便大家享用。
 


椰青冬蔭功鱸魚($288)

之前大熱嘅烤魚呢度亦有,可以選擇海鱸或鯰魚,兩款都肉質嫩滑。而椰青冬蔭功係指原個椰青會喺席前倒入烤魚爐,而冬蔭功湯本身亦有中蝦、杏鮑菇、南薑等材料,湯頭香辣之中帶海鮮同椰青嘅鮮甜,又一醒胃菜式。
 

更多【新店直擊】:
1. 招牌珍珠奶茶+香港限定甜品!春水堂人文茶館登陸觀塘
2. 慢煮紐西蘭牛肉、三文魚 觀塘工廈抵食日式丼飯店
3. 鮮鮑魚珍寶喇沙、四色手工咖央多士 西環正宗娘惹菜荃灣重開

 

招牌五味脆皮雞($168/半隻)

五味係指用嚟醃製雞肉嘅南薑、香茅、芫荽、檸檬葉,同魚露五款調味料,風乾雞皮後先低溫煮熟雞肉,再用高溫將雞皮炸脆。經過咁多工序先整得出呢碟雞皮薄脆雞肉滑嫩嘅五味雞!
 


脆皮烤乳豬($188)

同樣花心思有呢碟脆皮烤乳豬,乳豬要先用香茅、檸檬葉、辣椒粉等醃製,再以65°C慢煮12小時,最後煎香豬皮。豬皮微韌香脆,豬肉亦保留到肉汁。
 


椰皇粟米新地($48)

新店限定嘅甜品!椰子雪糕味道濃郁香甜,有啲似椰子糖,配搭粟米粒同、椰肉、花生碎甜而不膩。不過開飯仔比較貪心,如果可以將忌廉換多一球椰子雪糕就好啦。
 


椰香小米糕($48)

賣相菂菂式式夠可愛,外面係用椰漿同糯米粉烤成,裡面再放粟米粒、芋頭同椰絲,椰子香味為主,口感層次豐富。
 


泰國水仙芒(新張期間免費贈送)

為咗慶祝新店開幕,3月1號至3號,一連三日送出泰國水仙芒!只要堂食惠顧滿$150就有一個,即係滿$300就有兩個,$450三個如此類推。水仙芒其名源自有如水仙花清幽嘅果香,鍾意泰國菜同芒果嘅話唔可以錯過!
 





mango tree kitchen
地址:元朗朗日路9號形點一期1樓1035號舖




文、相、片:Cathy

關鍵字
元朗
泰國菜
椰皇粟米新地
mango tree kitchen
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
【隨時更新】便利店尋寶 每周新品速報
5天前
【2019聖誕】早鳥優惠! 聖誕自助餐推介
7天前
【2019聖誕】年尾叉電 聖誕下午茶集合推介
2019-11-19
秋風起!5間大閘蟹放題食店集合
2019-11-19
【2019聖誕】約會之選 聖誕市集推介
2019-12-06