覓食大埔 即叫即燒串燒店
2021-06-24

大埔一向都好多好嘢食,有時多到唔知點揀好。今次介紹兩間串燒店,都係區內嘅人氣餐廳,提供超多款肉類、海鮮、菜蔬等串燒,全部都係即叫即燒,夠晒新鮮。

芝加哥串燒(大埔)  

以串燒作招徠嘅呢間酒吧餐廳,環境氣氛一流,要同朋友搵個地方relax下,chill下就最啱。假如你選擇坐露天位置嘅話,感覺就更悠閒。燒生蠔係呢度嘅主打,味道款式多,全部串燒都係即叫即製,風味十足。

招牌燒生蠔系列

招牌燒生蠔系列有成12款唔同嘅味道,有辣有唔辣,醬料全部都係自家製作,並冇加到任何防腐劑同味精。特別推介蒜蓉醬燒生蠔,蒜香霸道得嚟又唔會蓋過咗生蠔本身嘅鮮香,配埋生啤就仲爽。


馬來娘惹咖哩吉列和牛串

咖哩由東南亞特有嘅古法香料煮成,帶有陣陣椰香,辣度溫和,配搭香嫩嘅和牛,層次變得更分明。


自家製手打黑松露芝心肉丸

另外要推介自家製手打黑松露芝心肉丸,手打新鮮嘅五花肉入面,包住芝士同黑松露,既鎖得住肉汁,同時亦有陣陣松露獨有嘅香味滲透住。


酥炸冰火雪米糍

每餐都總要有甜品作結先至感覺圓滿,呢度嘅酥炸冰火雪米糍絕對值得留位一試。自家製作脆粉炸漿,炸過嘅雪米糍外暖內凍,咬落脆脆地。不過留意返每日限量供應㗎。


麒麟冰沙

食串燒就梗係要飲酒啦~ 餐廳有超過廿款酒水選擇,日本清酒、威士忌、生啤等都有。其中最特別嘅莫過於麒麟冰沙。將KIRIN  -7 °C 生啤,搭上-5 °C啤酒冰沙。啤酒本身已經夠爽,仲要配埋冰沙,直情係有一股冰感湧入喉嚨嘅感覺,天時暑熱飲就特別清爽解熱。

芝加哥串燒酒場(大埔) 

同樣都係位於大埔嘅酒吧餐廳,酒款更多,淨係雞尾酒都有超過100款,仲未計紅白酒、清酒、威士忌同啤酒喎,酒鬼嚟到最開心。餐廳主打串燒,和牛同海鮮都有供應,選擇夠多。

招牌香葱燒活白鱔串

師傅堅持只選用三斤以上嘅野生大白鱔,每日新鮮製作,即叫即燒。外皮燒至香脆,魚身厚肉肥美,入口彈牙,加埋香蔥可以話係錦上添花。


蒜香燒日本廣島蠔

廣島蠔本身已經係大碼size,餐廳仲要選用較罕有嘅加大碼3L刺身級嘅廣島蠔,就更加大隻。即叫即開即燒,令蠔肉保持喺最新鮮嘅狀態,加入香蒜燒更能帶出鮮甜甘香味道。


香蒜燒原條茄子

燒過嘅茄子特別香口,鋪面嘅蒜蓉、香蔥同孜然粉等當然幫咗唔少。師傅先以氣炸鍋處理好蒜蓉,再加埋茄子一齊爆香,所以做到比一般燒茄子冇咁油膩。


香蒜燒活蟶子王

大大條蟶子王,望見賣相已經流晒口水,海鮮控必嗌。餐廳非常注意海鮮嘅新鮮度,所以蟶子同樣都係即叫即開即燒,肉質爽身,鮮甜多汁。


特色雞尾酒

叫得酒場,當然有多款酒類選擇啦。由資深調酒師主理嘅特色雞尾酒有過百款,都係選用高級配酒同埋新鮮水果汁沖調,擺設精緻,好啱打卡。

心動不如行動!有興趣就快啲約埋三五知己去嘆下美食!快啲bookmark定啦!


*以上圖片只供參考,所有食品以實物為準. 食品供應因餐廳而異




關鍵字
大廚招牌菜
大埔
串燒
海鮮
生蠔
啤酒
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
本月熱門
【2022生日優惠】持續更新!8月壽星嘆免費生日蛋糕+串燒放題優惠
2022-07-29
【隨時更新】零食速報 每周新款零食、酒品點評
6天前
【隨時更新】最後倒數!2022即將結業嘅人氣餐廳
3天前
尖沙咀最新露營主題日式燒肉店!3700呎室內Glamping體驗
2022-07-25
全港8大人氣沙嗲牛麵!煲仔沙嗲牛肉麵、 沙嗲牛肉沾麵
2022-08-03