見字飲湯!5大滋補燉湯店推介 花膠主題湯、親民足料靚湯小店
2022-03-25

身體健康先做到世界冠軍!疫情下無嘢重要得過強身健體,有時飲多碗湯水都係增強免疫力好辦法。不過又唔係個個都有時間同識煲㗎。好在而家市面上都有唔少燉湯專門店,有無味精靚湯供應。以下有5間足料滋補燉湯店介紹返,一齊見字飲湯!

親民又足料 球哥燉湯

 圖: Pppsywong.ap.7

中上環區主打無味精燉湯嘅餐廳,同時都供應多款小菜~各款燉湯CP值都幾高,湯底用大量豬骨熬製數小時而成,再加入各款食材燉6小時製成燉湯。選擇有接近20款,款款都好足料,如木瓜雪耳排骨湯同西洋菜陳腎排骨燉湯等,前者清甜潤肺,後者西洋菜香味濃郁。想再補啲,花膠螺頭雞燉湯都係唔錯嘅選擇呀。

原盅椰子湯水 椰小盅燉湯專門店 

 圖: mskatrina

曾獲得米芝蓮推薦嘅燉湯店,主打原盅椰子燉湯,由揀椰子開始已盡顯誠意。選用越南老椰子,因為甜度適中,有淡淡椰子味,唔會搶走湯料嘅味道。椰子燉湯有9款,如織金竹笙烏雞椰小盅同織金竹笙子排椰小盅等,唔太好椰子嘅都有其他燉湯如長白山鮮人參烏雞同蓮藕排骨燉盅湯等選擇。

住家味道靚湯 二少廚房

 圖: phonebus

好有家嘅感覺嘅靚湯呀~如蓮藕鱆魚排骨湯,有清熱涼血功效,可以生津止咳,潤肺化痰。花膠燉雞湯濃而不膩,配料都幾豐富,有花膠、冬菇、雞腳等,性價比好高。另外仲有冬瓜瑤柱瘦肉雞湯,清甜易入口,天氣開始回暖,而家飲就啱晒!

最原汁原味 蒸廬

 圖: Momo Fa FaKikivicki

主打靚湯、特色蒸飯同手工點心嘅餐廳,佢哋嘅湯品係餐廳用心之作,最少燉5小時,原盅入原盅出。而且唔會加水,客人一定飲到原汁原味,燉湯亦唔會作任何調味,客人可以之後自行調較。花膠蟲草花栗子燉土雞湯係店內最人氣,特別選用味道較香嘅乾栗子,加埋原隻花膠筒及雞等食材,味道豐富而且充滿骨膠原。

花膠主題燉湯店 花膠園

 圖: 官方網站

供應自家製、即燉、以花膠為主題嘅甜鹹湯品,店主希望為繁忙嘅都市人提供一盅既新鮮又方便嘅即燉補品,令大家可以安坐家中都食得健康又放心。主要選用兩種花膠,海鱸花膠大部份採用來自印度洋野生深海鱸魚魚鰾,口感較為爽滑;扎膠花膠大部份採用來自南美洲野生深海魚魚鰾,口感煙韌軟腍,充滿膠質。甜湯方面有如鮮製杏汁燉花膠、椰汁燉花膠及雪梨無花果燉花膠等;而鹹湯就有蟲草花元貝燉花膠、姬松茸螺片燉花膠同川貝海底椰燉花膠等。



文: Yanica
編:Kar


關鍵字
燉湯
中環
太子
觀塘
沙田
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
【隨時更新】零食速報 每周新款零食、酒品點評
5天前
【2022生日優惠】持續更新!6月壽星免費嘆生蠔/清酒
2022-05-31
【隨時更新】最後倒數!2022即將結業嘅人氣餐廳
2022-05-30
5月份好評餐廳十強
2022-06-06
酒店新出「北歐神話」下午茶 10款鹹甜點色彩繽紛 多款海鮮入饌
2022-06-10