素食者或者有乳糖不耐症嘅朋友有喜訊：台灣呢間堅果飲品專門店開到嚟香港啦！用五種堅果冷壓成堅果乳，代替牛奶嚟沖唔同飲品同製作奶蓋，所以店內所有奶茶、奶蓋飲品都係全素，大家可以放心享用！
 

NUTTEA嚟自台灣，第一間海外分店開喺香港新蒲崗，遲啲仲會開到去巴黎！品牌提倡無動物含量嘅環保飲食理念，用腰果、核桃、榛子、杏仁同夏威夷果仁呢五種堅果冷壓萃取成堅果醬，從台灣運到香港後再製作成堅果乳同堅果奶蓋。
 

繽紛火龍果奶蓋茶（$34）

招牌飲品之一，天然紫紅色非常搶鏡。而佢地嘅堅果奶蓋茶有特別嘅飲用步驟：一、用鏟先試咗堅果奶蓋原味，二、揭開杯蓋以45°飲用享受堅果奶蓋同茶嘅雙重口感，三、最後搞勻飲用。
 

堅果奶蓋係用堅果乳加植物奶油同少少鹽，所以跟返步驟一開始用鏟食堅果奶蓋嘅話會食到有少少鹹味，之後係堅果香甜，當中以榛子嘅味道最突出。口感輕盈，當中仲有啲啲果仁碎。而火龍果茶味道清新，仲咬到少少果肉。
 

宇治抹茶堅果奶蓋茶（$34）

除咗新鮮水果，呢度嘅茶亦用料考究，有台灣高山四季春、日本宇治抹茶等。呢杯宇治抹茶嘅甘味突出，但加埋堅果奶蓋搞勻後，唔單止口感變厚，果仁嘅甜味平衡返茶甘更易入口，又比一般抹茶牛奶多一份堅果香味。
 

 

香芋堅果奶（$34）

香港店另一熱賣飲品，每日蒸熟芋頭後以手工壓成泥，再加入堅果乳。比起堅果奶蓋，堅果乳更加飲到唔同堅果嘅香味，加埋芋泥無完全融化，而係保留部分顆粒，香濃得嚟有少少咬口非常討喜。想再飽肚啲嘅話可以揀香蕉燕麥堅果奶（$34），期間限定嘅粉紅豬草莓堅果奶（$37）味道甜中帶微酸，同樣推介。
 

滿杯柚惑（$31）

堅果系列以外亦有水果茶同手沖精品咖啡，呢杯滿杯柚惑賣相亮眼。用新鮮柚子肉配綠茶，飲落甜味自然，帶一絲有種獨特嘅澀味，比較清新。值得一提嘅係店家用嘅水特別經過五重過濾，用最純淨嘅水去泡茶。
 

最後有三樣嘢大家可以留意返，一、品牌為咗支持環保唔會主動派發膠飲管，亦歡迎大家自備杯；二、鍾意佢地堅果乳嘅話可以考慮買家庭裝嘅純堅果乳（$118/1000mL），可以加水1:1飲用或者配咖啡、果汁；三、新蒲崗預計農曆新年後會賣埋堅餅果子，即係即係有唔同餡料嘅煎餅，各位喺附近返工嘅朋友就可以嚟Tea Time啦！
 

NUTTEA
地址：新蒲崗大有街3號萬迪廣場1樓D舖

文、相、片：Cathy