要用鏟飲嘅堅果奶蓋!台灣全素飲品店抵港(有片)
2019-01-23

素食者或者有乳糖不耐症嘅朋友有喜訊:台灣呢間堅果飲品專門店開到嚟香港啦!用五種堅果冷壓成堅果乳,代替牛奶嚟沖唔同飲品同製作奶蓋,所以店內所有奶茶、奶蓋飲品都係全素,大家可以放心享用!
 


NUTTEA嚟自台灣,第一間海外分店開喺香港新蒲崗,遲啲仲會開到去巴黎!品牌提倡無動物含量嘅環保飲食理念,用腰果、核桃、榛子、杏仁同夏威夷果仁呢五種堅果冷壓萃取成堅果醬,從台灣運到香港後再製作成堅果乳同堅果奶蓋。
 


繽紛火龍果奶蓋茶($34)

招牌飲品之一,天然紫紅色非常搶鏡。而佢地嘅堅果奶蓋茶有特別嘅飲用步驟:一、用鏟先試咗堅果奶蓋原味,二、揭開杯蓋以45°飲用享受堅果奶蓋同茶嘅雙重口感,三、最後搞勻飲用。
 


堅果奶蓋係用堅果乳加植物奶油同少少鹽,所以跟返步驟一開始用鏟食堅果奶蓋嘅話會食到有少少鹹味,之後係堅果香甜,當中以榛子嘅味道最突出。口感輕盈,當中仲有啲啲果仁碎。而火龍果茶味道清新,仲咬到少少果肉。
 


宇治抹茶堅果奶蓋茶($34)

除咗新鮮水果,呢度嘅茶亦用料考究,有台灣高山四季春、日本宇治抹茶等。呢杯宇治抹茶嘅甘味突出,但加埋堅果奶蓋搞勻後,唔單止口感變厚,果仁嘅甜味平衡返茶甘更易入口,又比一般抹茶牛奶多一份堅果香味。
 

更多【新店直擊】:
1. 邊釣邊食!全港首間內置室內釣魚池 觀塘新開日式居酒屋
2. 台北過江龍Cocktails on Tap酒吧登陸 酒鬼中環新體驗
3. 銅鑼灣新開川式麻辣+台式養生火鍋放題 任食麻辣鴨血、筷子牛肉、海鮮

 

香芋堅果奶($34)

香港店另一熱賣飲品,每日蒸熟芋頭後以手工壓成泥,再加入堅果乳。比起堅果奶蓋,堅果乳更加飲到唔同堅果嘅香味,加埋芋泥無完全融化,而係保留部分顆粒,香濃得嚟有少少咬口非常討喜。想再飽肚啲嘅話可以揀香蕉燕麥堅果奶($34),期間限定嘅粉紅豬草莓堅果奶($37)味道甜中帶微酸,同樣推介。
 


滿杯柚惑($31)

堅果系列以外亦有水果茶同手沖精品咖啡,呢杯滿杯柚惑賣相亮眼。用新鮮柚子肉配綠茶,飲落甜味自然,帶一絲有種獨特嘅澀味,比較清新。值得一提嘅係店家用嘅水特別經過五重過濾,用最純淨嘅水去泡茶。
 


最後有三樣嘢大家可以留意返,一、品牌為咗支持環保唔會主動派發膠飲管,亦歡迎大家自備杯;二、鍾意佢地堅果乳嘅話可以考慮買家庭裝嘅純堅果乳($118/1000mL),可以加水1:1飲用或者配咖啡、果汁;三、新蒲崗預計農曆新年後會賣埋堅餅果子,即係即係有唔同餡料嘅煎餅,各位喺附近返工嘅朋友就可以嚟Tea Time啦!
 







NUTTEA
地址:新蒲崗大有街3號萬迪廣場1樓D舖




文、相、片:Cathy

關鍵字
堅果奶蓋
堅果奶
台式飲品
全素飲品
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
【隨時更新】最後倒數!即將結業的老字號及人氣小店
2020-05-19
【隨時更新】零食速報 每周新款零食、酒品點評
4天前
全城抗炎!人氣酒店自助餐重開 每位送鮑魚、帶子
2020-05-11
全城抗炎!喺屋企做大廚 懶人煮食包/套餐集合文
2020-05-13
4月份好評餐廳十強
2020-05-07