西環新開海鮮丼專門店 原版北海道海膽丼、重量級海皇丼(有片)
2019-08-06

鋪滿鮮甜海鮮嘅海鮮丼相信係唔少人嘅心頭好,呢間最近喺西環新開嘅專門店就主打各款創意海鮮丼,所有刺身由日本魚市場新鮮直送。大部分食材都先以火炙、醬油漬、汁煮等唔同方法處理過,加上自家秘方製作嘅赤醋飯,鮮味十足!
 


夢の丼新店位於香港大學港鐵站附近,供應海鮮丼、刺身、串燒、酒肴、沙律等等。主打嘅海鮮丼有多款配搭,不乏香港人最愛嘅海膽、拖羅、帆立貝、松葉蟹等等。
 


原版北海道海膽丼($468,每日限定10份)

新店限定丼飯之一,木板當中有乾冰,上枱加水後白煙飄出,視覺效果滿分之餘感覺仲特別透心涼呀。原版北海道馬糞海膽分量毫不欺場,粒粒橙黃鮮明,味道鮮甜口感柔嫩。可以就咁食,或者同飯一齊放到紫菜上面自己DIY海膽手卷。而丼飯上亦有三文魚子、拖羅蓉,同餐廳自家製海膽醬甜蝦蓉。
 


海皇丼($388)

最能夠彰顯店家心思嘅新菜式,虎蝦配搭黑松露味噌忌廉,令彈牙蝦肉增加黑松露香味;原隻鮑魚加上鮑魚肝醬汁,鮑魚味道Double Up;新鮮帆立貝用磯之昆布包住,帶出鮮味之餘少少鹹酸味亦增加味道層次。仲有三文魚子、蟹膏豆腐等,滿足度最高!
 


五重他他丼($248)

五重他他即係海膽甜蝦蓉、秘醬三文魚、拖羅蓉、蟹味噌忌廉豆腐,同松葉蟹肉!海膽甜蝦蓉嘅海膽鮮味突出,松葉蟹味道鮮甜。特別推介嘅係蟹味噌忌廉豆腐,賣相或者無其他咁好,但食落蟹膏甜香相當濃郁,加埋滑溜豆腐真係無得輸。
 


建議大家一開始可以先分別試五款口味,食到中間再撈勻,享受五重鮮味。而刺身海鮮丼用嘅係餐廳用秘方製作嘅赤醋飯,加咗赤醋、白醋等唔同調味,所以唔單止係海鮮刺身,飯都唔需要加任何醬油。
 

更多【新店直擊】:
1. 度小月第三分店進駐深水埗 獨家六款新菜式 時令魷魚系列
2. 深水埗新開莆田菜館 親民價試古法扁肉、石磨腸粉
3. 丫頭台茶店進駐戲曲中心 全新汪阿姐特飲

 

鵝肝安格斯牛丼($368)

除咗刺身海鮮丼,呢度亦有熟食嘅丼飯。例如呢碗鵝肝安格斯牛丼就有煎至外脆內嫩,口感豐腴、入口即化嘅鵝肝,同網燒至7成熟,保留到肉汁、牛香濃郁嘅安格斯牛肉!最啱鍾意重口味嘅,或者各位食肉獸。
 


(左)黑松露忌廉軟殼蟹卷($48/2件),(右)牛肉明太子沙律卷($48/2件)


(左至右)左口魚邊醬油漬($48)、火炙海皇醬牡丹蝦($78)、蟹肉蟹膏豆腐($48)

唔單止海鮮丼,壽司配搭亦有新意。黑松露忌廉軟殼蟹卷上面加松葉蟹肉,增加清甜味道。牛肉明太子沙律卷當中明太子嘅辛辣平衡牛肉脂香。而左口魚邊醬油漬嘅醬油係餐廳加入青森縣大蒜醃製三個月,蒜味同魚油香同樣突出。
 


(左至右) 阿波尾雞半翼 $48、阿波尾雞心 $38、阿波尾雞腎 $38、阿波尾大蔥雞肉 $38

串燒亦有水準,當中比較特別嘅有嚟自德島縣嘅阿波尾雞,特色係肉質有嚼勁而且肉味比一般香濃。雞腎口感爽脆。
 



夢の丼
地址:西環西營盤皇后大道西513號尼斯花園地下A舖




文、相、片:Cathy

關鍵字
西環
西營盤
海鮮丼
刺身
串燒
夢の丼
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
【隨時更新】最後倒數!即將結業的老字號及人氣小店
2020-07-21
【隨時更新】零食速報 每周新款零食、酒品點評
7天前
全城抗炎!北角酒店最新應變 自助餐都有得外賣?
2020-07-17
全城抗炎!屋企都嘆到三層架下午茶 Tea Set外送/外賣自取推介
2020-07-23
全城抗炎!送上門懶人煮食包及套餐大合集2.0 花膠燉湯/火鍋/鐵板燒
2020-07-30