西灣河新開體育主題酒吧 多款佐酒美食 芝牛堡+慢煮醬燒牛肋骨
2020-04-27

「禁酒令」下,有間喺西灣河新開嘅餐廳,咁啱以美國十九世紀時期嘅「禁酒時期」作裝修靈感,原來當時嘅酒吧,會借名以豬隻等動物做表演收取入場費再「送」酒,呢間新餐廳雖然就冇動物表演,但就有唔少豬隻裝飾呢。而且更係區內首間體育主題酒吧,有多部大電視播放各項體育賽事節目,遲下賽季開返時,就可以成為附近體育迷嘅聚會點啦~

餐廳提供多款酒精飲品同佐酒食物,都係以方便睇波為前提。例如招牌豬手脆條咁,就唔係原隻豬手上,而係預先切好一片片,方便進食。外皮脆脆地,啲肉仲係好juicy,配埋甜甜地又辣辣地嘅自家製醬汁,又幾惹味。

芝士控必叫嘅芝士牛堡三文治,。搽上牛油再烘過嘅麵包相當脆口,中間夾住4片車打芝士同牛肉,呢塊牛肉堡係mix埋咗美國安格斯牛肉嘅唔同部位,食落   鹹鹹香香肉味都幾濃。

介紹多樣畀芝士控,原個椰菜花咁上,坊間少見呢。師傅用咗大量車打芝士混埋白汁製作,包保啖啖都可以食到香滑嘅芝士醬。

慢煮醬燒牛肋骨要用成24個鐘頭慢煮,口感軟腍,連埋面頭嘅gremolata調味,帶有陣陣蒜香。

而全舖惟一一款甜品,就係香蕉麵包布甸喇。細細件但食落就知有返咁上下份量,軟熟香甜,連埋紐西蘭雲呢嗱雪糕一齊食,層次感多啲。

 香煎海鱸魚

叫得酒吧點可以冇酒?呢度酒款相當豐富,由紅白酒、手工啤酒、rum酒到威士忌等等都有,有款靚靚仔仔好啱女生飲嘅cocktail叫Catch me if you can呀介紹返,係以松子酒、藍莓、檸檬、蛋白同rosemary糖漿調製,酸酸甜甜。

鍾意追新酒嘅朋友,可以試下Dragon Water嘅兩款啤酒,係本地新晉酒廠釀製嘅,倒出嚟好似有汽水咁,透明嘅,但一飲就飲到兩杯好強烈嘅分別啦。一杯係好泰國feel嘅香茅青檸,另一杯係好清新嘅青瓜西瓜味,幾特別。而對怕飲酒會肥嘅朋友仔講可以話係福音,因為兩罐都係低卡路里,兼且gluten free㗎。

The Blind Pig
地址:西灣河鯉景灣蘇豪東B期太康街45號地下B12-14A號舖

文:Kar
相、片:Tom Li

關鍵字
西灣酒
酒吧
芝士
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
食豪啲啲 城中5間海鮮+肉扒父親節自助餐
2020-06-10
至甜初夏 6月下午茶推介
2020-06-15
灣仔新扒房只賣$298黑安格斯牛扒套餐 任食薯條+超鬆軟肉桂牛油餐包
2020-06-11
甜蜜蜜暑假 7月下午茶推介
6天前
送A4和牛拼盤!最平$298任食兩小時 銅鑼灣新開鬼怪主題日式燒肉放題店
2020-06-22