踏入秋冬，又係各位山系男女出動，去行山同影靚相嘅時間喇~ 唔好空肚食早餐，都唔好空肚行山呀，所以嚟緊開飯仔會陸續介紹唔同行山路線，同埋出發車站附近嘅好嘢食畀大家。
呢排最hit嘅梗係芒草啦。除咗大東山外，東洋山都係一個影芒草嘅好地方，而且分成簡易同中級難度兩條路線，行山新手都無問題！兩條路線都會望晒東洋山山頭嘅芒草㗎。簡易版路線喺飛鵝山道出發，經過百花林、東洋山，最後喺返飛鵝山道完成。出發時喺德福花園或港鐵彩虹站搭1號小巴或采頤花園搭1A號小巴，飛鵝山道路口下車就到。而中級路線就喺井欄樹出發，清水灣道完成，除咗可以照搭1號或1A小巴，喺井欄樹落外，亦可以喺鑽石山站或牛池灣村搭91/91P或91M巴士，喺井欄樹站落車。
性價比高馬拉菜 馬六 (采頤花園)
性價比幾高嘅平民馬來西亞菜，菜式味道都頗正宗。如招牌新加坡喇沙摻摻，湯底濃稠，椰汁味道都好香，配料包括蝦、魚片、魚蛋同豆腐等等，帶點小辣好惹味。無骨海南雞飯亦值得一試，雞肉嫩滑，配油飯食可以話絕配～甜品可以試斑蘭口味南洋咖央多士，多士烘得香脆，牛油同斑蘭醬嘅分量配搭得宜，唔會太甜。
圖:
隱蔽咖啡店 Snooze Coffee (采頤花園)
想食啲輕食類，呢間藏於屋苑內嘅咖啡店都係一個唔錯嘅選擇。店面細細得三四張高櫈，主要賣咖啡、手作bagel同蛋糕等。Bagel每日自己新鮮製造，簡簡單單原味加忌廉芝士已經好好食。蛋糕每日可能會有唔同，其中tiramisu嘅手指餅同芝士比例啱啱好，咖啡味都恰到好處，都幾值得試！(唔使怕肥啦~ 轉個頭行山就消化咗啦)
圖: Pleplev3v
舊式茶樓 新龍城茶樓 (彩虹)
而家喺香港，真正傳統嘅茶樓已經買少見少啦，襯行山前去飲返個靚茶都唔錯～呢間酒樓有分室內同室外位置，點心會一籠籠咁放晒喺出面，想食咩就自己拎，好有舊時氣氛。蝦餃燒賣質素都喺水準之上，蝦肉大大隻又彈牙，蝦餃皮厚薄適中。仲有好多已經唔常見嘅點心，好似糯米包、芋角、魚翅餃同鵪鶉蛋燒賣等～
圖: CHING_ing
平民車仔麵店 許記車仔麵 (彩虹)
行山前想平平地食一餐飽肚嘅，可以試吓呢間平民嘅車仔麵店～配料方面推介滷水，無論雞翼定大腸都好入味，另外白蘿蔔清甜無渣，而家每碗麵都會加入秘製醬汁，幾有誠意。咖喱汁同炸蒜粒都可以自己加，味道層次會更豐富，而且店舖好有本土風味呀～
圖: Kan Lee
文: Yanica
編：Kar