疫情嚴峻，最近有唔少餐廳都相繼結業，不如支持吓一啲小店啦～紅磡區內最近就新開一間誠意小店，所有食物都堅持即叫即製，而且用料都唔馬虎，性價比好高！
蛋炒胡麻黑松露腸粉
呢味蛋炒胡麻黑松露腸粉係店主自己唸出嚟嘅創意料理，先將腸粉煎香後加蛋炒，炒完加日式胡麻汁及黑松露，食落原來味道都好夾！
龍蝦芝士撈丁
採用原隻龍蝦尾，先將龍蝦燒香後拆肉，然後用酒及蒜蓉爆香，最後加芝士及麵一齊炒，再灑芝士粉～龍蝦肉彈牙，而且芝士味香濃又唔會太膩。
壽喜燒肥牛撈丁
壽喜燒好多人都鍾意食，但唔係淨係可以ShabuShabu，用嚟撈丁都一樣咁出色！參照日式牛丼飯做法，味道香甜愈食愈開胃！
蒲燒原條鰻魚便當
蒲燒鰻魚堅持即叫即燒，比較香脆鰻魚味會更出，加上自家製調味粉，送飯一流！
小食方面就有店主自創嘅大阪燒茄子及串燒，茄子上加上大阪燒醬汁及大量木魚絲，另外串燒都係即叫即燒，想食就要畀啲耐性等等啦～
地址: 紅磡必嘉街97號黃埔唐樓C座地下106A號舖
文、相、片: Yanica