蘿蔔糕點煎先唔散?大廚傳授5大Tips
2023-01-17


每年煎糕絕對係一大學問,煎年糕點樣可以唔黐鍋?煎蘿蔔糕又點樣可以唔散,有焦邊但又唔會燶?電台主持歪歪特地向咗資深嘅點心部主廚林權超師傅請教秘訣,而家就同大家一齊開心share啦。


Tips 1: 熱鍋冷油

問:煎蘿蔔糕個鍋要去到幾熱呢?
林師傅:80度左右。個鍋夠熱就唔會咁易黐底喇,因為如果唔夠熱  ,啲油同個蘿蔔糕咪索晒啲油囉,咁咪成個蘿蔔糕變咗油囉。

問:師傅我見你啲油其實喺個鍋內唔長時間,跟住就倒咗大半?
林師傅:係 ,唔好太油吖嘛,健康啲囉。我哋用少少油嚟煎脆佢就得。


Tips 2: 每次煎少啲

林師傅:拎蘿蔔糕擺落去,最好就擺少啲,如果多就會黐埋一嚿。每嚿隔遠少少,畀啲耐性分多幾次煎。


Tips 3: 一面30秒,間中關火

林師傅:大概燒一面就要30秒。為咗穩陣起見,煎煎下就可以收收火。



Tips 4: 溫柔地反

問:點樣反個糕唔會散?有咩技巧?
林師傅:攞個剷輕輕傍一傍佢,輕輕力。如果你開波係咁剷呢就好易散嘅,因為佢未定型吖嘛。個鍋係死嘅,個人係生嘅,你咪轉一轉佢囉,溫柔啲,用陰力。反之前可以裝裝個底,見到金黃色就差唔多嘞。


Tips 5: 用易潔鍋
問:咁有冇話用咩鍋煎會比較好?
林師傅:一定要用易潔鍋,因為易啲煎,如果其他屋企煮餸啲鍋就一定黐鍋。


不過當然,蘿蔔糕唔散嘅最大秘訣,其實係底糕本身要做到好堅挺,用馬蹄粉、粘米粉去溝出嚟嘅蘿蔔糕,就會堅挺啲,口感亦會煙韌啲;如果用鷹栗粉、生粉嘅話就可能爭少少。另外,臘肉煎完出嚟通常都會變咗黑色,外觀上唔太好睇,師傅建議如果係外貌協會嘅朋友,自己整嗰陣可以考慮用瑤柱、花菇代替,香味亦會更突出。而蘿蔔最好就好似手指咁,刨幼少少,大約1cm X 1 cm嘅粗度,長度大概6cm。另一樣要留意嘅係蘿蔔糕刨皮最緊要刨得深啲,因為淺得滯就會苦。


同場介紹一下另一款新春糕點——棗泥拉糕~

呢款棗泥拉糕用咗木薯粉,以及紅棗同黑棗兩種棗製作,黑棗取其濃味、紅棗則取其清甜啲,兩種棗混合埋一齊,自然就香啲、濃味啲啦。

呢款嚟自江蘇嘅甜品,相傳係源自清朝時期,慈禧太后好鍾意食糕點,所以每一個地方嘅師傅都會設計啲糕點整畀慈禧太后食。棗泥拉糕就係當時嘅宮廷甜品之一啦。口感煙煙韌韌,首先試到嘅係椰汁嘅甜,再之後就係黑棗嘅香濃,仲有種清新感。


餐飲券優惠:
蘿蔔糕+棗泥拉糕+ 自家製曲奇+碧螺春茶葉新春禮盒 - 9折
優惠期至:2023年1月21日

鳴謝:江蘇銘悅
地址: 上環干諾道中130-136號誠信大廈2樓


主持:歪歪


文:Kar
相+片:YanYan


關鍵字
新年
蘿蔔糕
歪歪
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
本月熱門
【2023生日優惠】持續更新!2月壽星嘆免費薄餅/自助餐
1天前
【專訪】均香日賣300磅角仔 兩代老闆上陣 陪深水埗街坊走過40年
2023-01-11
【隨時更新】零食速報 每周新款零食、酒品點評
5天前
【兔年開飯】新春自助餐指南 早鳥優惠低至75折
2023-01-09
4大創意煲仔飯!日式鰻魚煲仔飯、火焰玫瑰肥牛煲仔飯
2023-01-05