葵涌廣場飲飲食食(一)2樓新開小食店 撈雞烤菇芋圓好吸引(有片)
2016-08-18
上個月先同大家逐層掃完葵涌廣場,點知轉個頭,喺呢個月裡面,就有超過10間新小食店又開張,作為一個專業嘅吃貨,開飯仔當然又再去食過啦。今次嘅新店主要就集中喺2樓一個角落度,一上樓梯行前少少就會見到,有嘢食有嘢飲,有熱食都有凍食,好多選擇,就等開飯仔講咗食嘅先,下篇再同大家講飲嘅。

泰辣生果撈雞  撈撈雞

人哋撈麵,佢撈雞。首先揀隻雞要鹽水、辣味定泰辣味,再揀要雞翼、雞脾定雞胸,3揀1同3揀1之後再喺一堆生果、菜或者麵中間揀多3款配料。唔知點揀唔緊要,行到埋去老闆有推介,雞胸、泰辣、哈蜜瓜、車厘茄。初初聽落覺得有啲怪,點會推介雞胸㗎?仲有,辣嘅哈蜜瓜?夾咩?不要問,只要食。啲雞剪開細細件,全部去晒骨,而且好嫩滑,哈蜜瓜同車厘茄酸酸辣辣咁食原來又幾正,好有新鮮感。不過,雖然話泰辣酸酸地,但都幾辣,唔食得辣嘅朋友要諗諗。之但係,40蚊一兜,問心,有啲啲貴。


雞翼/雞胸/雞脾 + 3份配菜 $40 (另加1份配菜加$5、泰辣 加$5)

推介度:*****
抵食度:***

芋圓豆花  豆花先生

最近新興食芋圓,唔知點解啲人見到芋圓就好興奮,而葵廣咁多間嘢食,終於都有間食芋圓。不過其實人哋呢間係食豆花為主嘅,any肥,嗌碗招牌豆花,包晒豆花、芋圓、地瓜圓同粉圓,仲有紅豆添,咁就咩都食到。老闆係台灣人,整返台式食品冇咩難度。芋圓方方正正都算大粒,煙煙韌韌有咬口,豆花都好滑同好有豆味,整體甜甜der係幾唔錯。留意返,呢間舖5點先開門㗎,太早去冇得食。


招牌豆花(豆花、芋圓、地瓜圓、粉圓、紅豆) $28

推介度:****
抵食度:***

呃like卡通馬卡龍雪糕  1830s Macaron

之前成日喺ig見到台灣有好多cute cute馬卡龍,唔使葡萄人哋,呢間都有。馬卡龍有大有細,但係得大嘅先有卡通樣,每日有幾款唔同嘅卡通,不過就全部都係原味,即係杏仁。兩塊馬卡龍相對較硬身,冇咁脆但都幾甜,中間夾住嗰大磚雪糕都有10隻8隻味可以揀,最多人揀嘅好似係綠茶、曲奇、益力多,最後再揀返2種toppings黐上去,棉花糖、彩針、熊仔糖等等都有得揀。成件嘢係幾靚嘅,雪糕質感比較煙韌,冇咁快溶,啱晒囡囡慢慢影相呃like。


大卡通馬卡龍夾雪糕 加兩款配料 $38

推介度:***
抵食度:***

抵食狂加料yogurt  My Star Yogurt

店員唧咗杯Yogurt畀你就可以自己郁手嗶toppings,有好款揀㗎,粟米片蜜糖星星又有、各式朱古力、爆爆珠又有,仲有麻糬、椰果、生果……最後唧埋士多啤梨醬或者朱古力醬就可以磅重。100g 19蚊係幾抵,一杯有7折兩杯就半價,30幾蚊嘅杯就差唔多好似料多過yogurt咁。啲Yogurt唔太酸,反而有啲甜。同埋都溶得幾快,嗶料嗰陣記得要快手啲。


乳酪雪糕(自選配料) $19/100g

推介度:***
抵食度:****

堅正烤啡菇  Happy toast

又一間牛角包變奏嘅小店,甜版鹹版都有,一係夾雪糕,如果唔係揀夾鰻魚其實都幾有霸氣。最近仲新出咗兩隻烤菇,芝士牛油果同芝士流心蛋,一刀切開啲蛋黃汁係即刻流晒出嚟㗎,好香好吸引,個菇大大個,有汁唔會太乾身,配埋薯蓉食冇得輸。參考返,店主就話最多人買嘅係士多啤梨棉花糖厚多士同埋忌廉蜜糖脆脆配雪糕喎。


芝士流心蛋烤有機啡菇配薯蓉 $30

推介度:*****
抵食度:****

其餘仲有幾間舖㗎,好似食撈麵嘅貓麵啦,揀完配料撈麵嘅麻醬可以揀上海胡麻或者日式芝麻,另外有間小食店Yummy Yummy,有雞蛋仔同其他腸仔之類嘅嘢食,但menu上面寫嘅焗嘢都係冇得食嘅,等我仲滿心歡喜諗住叫個芝士流心蛋多士……講開雞蛋仔,人氣店摩芽都進駐咗喺度,繼續有蜜糖星星雞蛋仔,同埋有間主打外賣生意嘅日式食店大滿足,由手卷到刺身乜都有,夜晚都幾多人買嚟做晚餐。

不過,老老實實,呢幾間小食店都唔係真係咁平,開飯仔就咁兜咗個圈,淨食未計飲嘢都已經170幾蚊喇。





文、相、片:Kar

隨時接收最新資訊
讚好OpenRice專頁!
關鍵字
葵涌廣場
掃街
Yogurt
芋圓
撈雞
烤菇
開飯專題
開飯仔為你提供各類型最新飲食情報及優惠,全面照顧你的飲食喜好。
相關文章
旺角掃街新選擇 有餡芋圓$30有找 (有片)
2017-03-23
試食報告! 青衣戲棚掃街攻略
2017-04-09
台式手工火鍋落戶銅鑼灣 晚市半放題有驚喜(有片)
2017-05-08
【飲食潮流】預告!3月雞蛋仔藝術節新口味率先睇 臘腸雙重芝士味雞蛋仔都有?
2017-03-01
端午糭動員 新潮口味逐隻數
2017-05-18
【食盡鹿兒島】道地灸燒黑豚拉麵 我流風天文館本店
2017-03-20
餐廳資料
更多
收起
本月熱門
【隨時更新】最後倒數!即將結業的老字號及人氣小店
7天前
全城抗炎!人氣酒店自助餐重開 每位送鮑魚、帶子
2020-05-11
全城抗炎!喺屋企做大廚 懶人煮食包/套餐集合文
2020-05-13
【隨時更新】全城抗炎!多間集團餐廳及老字號宣佈 暫停晚巿或休業 (內附名單)
2020-04-29
4月份好評餐廳十強
2020-05-07