荔枝角名粵菜館推出火鍋副線品牌 極品佛跳牆湯鍋+特濃沙嗲安格斯牛肉湯鍋
2021-04-27

雖然已經漸漸踏入夏季,但各位火鍋控又點會停呢?呢間位於荔枝角嘅名粵菜館,最近於餐廳內規劃一個可以食火鍋嘅空間,推出火鍋副線品牌!火鍋品牌同樣由行政總廚陳偉庭師傅主理,設計咗八款手工火鍋,款款都自家製選材有誠意,一定唔會令火鍋控失望!


極品佛跳牆湯鍋(優惠價$1688/原價$3288)

招牌佛跳牆湯鍋!以多款矜貴食材入饌。湯底先用老雞、赤肉及雞腳等熬製兩日,然後將大連鮮鮑魚、素翅、日本關東遼參及花膠等釀入新鮮去骨全雞內,再用熬製好嘅濃雞湯浸熟,湯底鮮味十足又濃郁。而每款食材嘅烹調時間都啱啱好,如鮑魚彈牙有口感。


沙嗲安格斯牛肉湯鍋、川蜀麻辣鍋(鴛鴦湯鍋$328)

最近最多討論嘅沙嗲湯底呢度都有得食!唔同嘅係用咗花生、麻醬、沙茶醬等調配自家製沙嗲醬,師傅話沙嗲要好食一定要夠濃郁,所以用咗特別多沙嗲醬去製成湯底,所以特別杰身,所有食材都好掛汁!另外呢個湯底仲會附埋一份安格斯牛肉㗎~而麻辣鍋又香又麻,內藏嫩滑嘅鴨血,愛辣人士不可錯過!


山珍菌皇清湯鍋($268)

想食得清淡啲,可以考慮吓呢個以菇菌類為主嘅湯底。加入新鮮猴頭菇、新鮮蟲草花、黑雞樅菌、冬菇,而湯底用牛肝菌熬成,成個湯底都好重菇菌味。


更多【新店直擊】:
1. 【最平$298最貴$938】佐敦新開日式和牛燒肉放題 獨家引入鹿兒島小田和牛
2. 【只想專注做好牛腩】金融經紀轉行灣仔開濃湯牛腩麵店 招牌牛骨濃湯崩沙腩河
3. 自家原創焦糖酥皮曲奇Pookie、流心抹茶口味 香港人氣曲奇網店實體店登陸大坑


四寶丸 ($128)

配料方面都好有特色,四寶丸就包含咗脆骨烏雞丸、芥末豬肉丸、芫荽牛肉丸及芝心墨魚丸,全部都係手工造,好似脆骨烏雞丸係用烏雞起骨剁碎後打到起膠,真係少啲功夫都唔得。


牛胸油($168)

牛胸油即係牛胸前嘅軟骨纖維,口感比較爽脆,而且切嘅厚薄好重要,切得太厚會偏油同韌。


本地新鮮牛肉—池板、牛頸脊($238)

講到打邊爐又點少得牛肉!餐應供應唔同部位嘅牛肉,全部都係本地新鮮牛肉嚟,池板牛肉味重啲,而牛頸脊油脂分佈平均,牛味重之餘會腍啲。


自家製千層枝竹($48)

私心推介!將腐皮一層一層疊起再拎去炸,所以香脆之餘仲好索汁,放落沙嗲湯底食無得輸。


鮑魚雞粒餃($68)、手打魚腐($48)

自家製餃子鮑魚雞粒餃,加入鮑魚及木耳絲等,口感豐富。至於手打魚腐先將魚肉剁碎,加入水、生粉、蛋白等,魚肉味較重,無油炸過會腍滑同健康啲。


大公館 (大公別館) 

地址: 荔枝角長義街9號D2 Place 1期10樓A號舖





文: Yanica

相: Tom Li


關鍵字
荔枝角
中菜
火鍋
佛跳牆
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
【隨時更新】零食速報 每周新款零食、酒品點評
2天前
【2021生日優惠】持續更新!7月壽星半價嘆和牛燒肉套餐
2021-07-09
【恭喜張家朗、何詩蓓】多間餐廳立即推出限時優惠一覽
4天前
投奔盛夏 7-8月份下午茶推介
2021-07-08
6月份好評餐廳十強
2021-07-06