荃灣南豐紗廠活化後，成為唔少人週末參加工作坊同打卡嘅好去處，裡面亦有唔同餐廳同咖啡店。今次開飯仔就同大家先介紹當中四間Cafe，有啱哂打卡嘅甜品店、本地烘焙咖啡、有齊甜品輕食嘅休閒Cafe，甚至想飲返杯Cocktail都得呀！
 

Vintage裝修+手工甜點　一日之間

最近喺Instagram大熱嘅甜品店，白色主調裝修加上從日韓兩地搜集返嚟嘅Vintage擺設，頗有韓國簡約Cafe嘅感覺。而店裡面所有食品同飲品都係由兩位老闆喺呢間Workshop兼Cafe裡面完成。
 

duo of scones with clotted cream & jam ($30/2件)

輕盈下午茶嘅好選擇，有原味同蔓越莓兩款口味各一件，同樣會先烘熱，再按照英式食法配以clotted cream同法國士多啤梨果醬。外香內軟，簡單而滿足。
 

lemon tart ($45)

同樣手工製作，上面白色嘅蛋白霜更加會即叫即燒，令蛋白霜保持輕盈口感。牛油撻底裡面嘅檸檬餡酸甜度平衡，清新幼滑。
 

apple cinnamon black tea ($55)

餐廳先用韓國黑糖同迷你蘋果做成糖漿，配以韓國濟州紅茶後再加肉桂粉點綴，拎上手暖笠笠之餘仲聞到帶肉桂辛香嘅甜味。紅茶味道比較柔和而不失茶香，伴肉桂蘋果好有冬日感覺。
 

古典機自家烘焙咖啡　Koko Coffee Roasters

唔少咖啡迷見到門口附近香港唯一一部50年代德國Probat UG22咖啡豆烘焙機，就知道係一間有水準嘅咖啡店！其實呢間係本土咖啡店CoCo Espresso嘅延伸品牌，主打專業烘焙技術同原產地直送嘅當季咖啡豆。
 

Hand Drip（$45）

想欣賞到單品咖啡豆嘅最純粹嘅味道，當然要揀手沖咖啡。咖啡豆會不定期更換，好似開飯仔今次試到呢杯就帶果酸味，口感柔滑順喉。
 

Nitro Coffee（$58）

Black Coffe同樣可以有唔同變化，好似呢杯賣相似足啤酒嘅就係Nitro Coffee，喺咖啡當中打入氮氣，令咖啡口感更醇厚順滑。
 

Flat White（$36）

而會加入牛奶嘅咖啡就會改用品牌House Blend咖啡，而Flat White亦係跟返發源地澳洲嘅做法，希望令大家飲到正宗嘅風味。咖啡入口味道柔和，帶少少花香所以更易入口。
 

（左）Croissasnt（$24），（右）Banana Walnut（$34）

呢度亦有供應由Levain Bakery供應嘅歐式麵包，用天然酵母每日新鮮製造，唔加任何防腐劑。選用嘅食材亦相當考究，例如牛角包用法國牛油同法國麵粉，牛油香味濃郁。
 

 
日式甜品配Magic　Cozy Coffee

店如其名環境舒適，供應多款咖啡、輕食同甜品。每售出一杯咖啡，店家都會捐出$1畀啟愛共融基金，從教育同食物支援幫助香港低收入及單親家庭。而甜品由一位留港嘅日本師傅製作，盡量選用日本食材。
 

Chocolate Mountain（$48）

雖然係一間咖啡店，不過最受歡迎嘅飲品係呢杯Chocolate Mountain！雪糕用咗北海道5.0牛奶製作，甜度得宜富牛奶香。下面嘅凍朱古力就用咗幾種唔同嘅朱古力沖調而成，飲落比較厚身，有朱古力香但唔會過甜。
 

Magic（$38）

呢度嘅Magic可以解讀為比較濃嘅Flat White，所以飲落每一啖嘅咖啡香都非常濃郁，亦有啲似加咗牛奶嘅Ristretto。
 

Latte（熱$38 凍$42）

怕Magic太濃嘅當然亦可以點Latte，仲有可愛嘅拉花加分！店家House Blend咖啡嚟自非洲同巴西，帶橙皮同杏仁香，同少少黑朱古力嘅味道，有啲啲酸但唔苦，容易入口。
 

Parma Ham & Poach Egg Toast（$48）

Smoked Salmon with Garlic Mayo Toast（$48）

呢度嘅食物選擇比較多元化，有All Day Breakfast、多士，同Pizza，一兩個人嘅話最啱嗌份多士再配甜品。Parma Ham & Poach Egg Toast嘅水波蛋蛋黃半熟，切開流心效果非常誘人。而Smoked Salmon with Garlic Mayo Toast就鹹香惹味。
 

Souffle Cheese Cake（$38）

Orange Cake（$45）

甜品方面就用一位喺日本師傅喺香港新鮮製作，當中98%都係日本食材。比較受歡迎嘅有呢兩款：輕盈有芝士香嘅Souffle Cheese Cake，同甜而不膩嘅Orange Cake。
 

咖啡x特飲x雞尾酒　RETOLD coffee.tea.spirits

想Chill返晚都得！呢間咖啡店唔單止有多款咖啡同茶、包括手沖單品咖啡，另一邊仲有Cocktail供應，想飲咖啡定酒由你話事！
 

Single origins coffee by chemex（時價）

店家會不定期更換單品咖啡豆，好似開飯仔採訪呢日飲嘅係一款巴拿馬咖啡豆，特點係甜度較高同帶花香。而用Chemex咖啡壺手沖可以萃取咖啡豆嘅純淨風味，而用土耳其杯亦係幫助留住咖啡香氣，可以更細緻品嘗咖啡原味。
 

Cabernet sauvignon grapes tonics （$48）

呢杯特飲有搶眼漸層，用單一產區嘅Cabernet sauvignon ，亦係一種經常用嚟釀製紅酒嘅提子品種。不過放心呢杯無酒精成分，係用Cabernet sauvignon果汁配Ginger Ale，所以入口既有提子嘅果香，亦有薑嘅辛辣感，口感刺激。
 

一日之間
店號：1樓103
 

Koko Coffee Roasters
店號：地下G09
 

Cozy Coffee
店號：1樓117
 

RETOLD coffee.tea.spirits
店號：1樓102
 

南豐紗廠
地址：荃灣白田壩街45號
 

文、相、片：Cathy