茶就好似咖啡咁，好多人一日唔飲返兩杯都會周身唔安樂，既然係必需品，又點可以求求其其搵個茶包沖杯茶就算呢？茶葉品牌BASAO一向售賣優質茶葉為主，最近就喺灣仔開設首間旗艦店，除咗可以買靚茶葉外，仲可以飲由茶藝師沖泡嘅茶同食埋茶製小點。
BASAO嘅每一款茶葉，都經過精心挑選。佢地團隊每次都會特意走訪唔同國家嘅茶園，探訪茶農同了解佢地種植過程。茶葉來源主要以亞洲地區為主，如中國、台灣同日本等地，遠至印度都有。
更多【新店直擊】： |
煙燻小種(右)($58)係中國第一紅茶，以松木煙燻而成，呢隻茶葉要泡兩次先飲，飲落有淡淡煙燻味同回甘。和束町煎茶(左)($42)出產自茶葉植地和束町，味道柔和，甜味同鮮味都突出，平時唔飲慣茶嘅人都易接受。
除咗茶飲仲有各款茶製小點，以阿里山烏龍或煙燻小種製成嘅自家製茶蛋糕卷($36)，兩款茶味都好突出，而且入面嘅奶油唔會過甜。
BASAO 龍井雪糕($38)用咗明前龍井，上面額外加咗茶葉，食落去滿滿嘅龍井味。茶味糖漿配比利時窩夫($62)，平時食窩夫最怕就係糖漿太甜，加咗茶就有減低甜度，食多兩件都無問題！
地址: 灣仔月街17號地下
文、相、片：Yanica