觀塘新開一間小店,主打台式芋圓甜品。由一對90後情侶主理,每日親自買食材整芋圓、地瓜圓、紫薯圓等,唔加任何防腐劑、色素或添加劑。蜜薏米、蜜芋頭等都係自家熬製。芋圓煙韌又食得出淡淡芋頭香味,真材實料值得支持!
芋圓控兩位店主拍拖嘅時候鍾意掃街食芋圓,自己試過自己整口碑都唔錯,機緣巧合之下就決定開店賣手工芋圓,用新鮮芋頭、地瓜、紫薯配韓國白砂糖同木薯粉,用自己研究得出嘅食譜製作,一粒粒芋圓都係手工切㗎。
招牌手工芋圓($44)
配料選擇都多,唔想諗嘅話可以揀最受歡迎嘅配搭招牌手工芋圓,有齊仙草凍、芋圓、地瓜圓、紫薯圓、小丸子、粉圓,同西米,可以配椰汁、淡奶、黑糖汁或者仙草汁。唔好見睇落好似唔大碗,其實係椰汁遮住咗啲配料!
芋圓口感軟Q,芋圓食得出芋頭原味,地瓜圓試真啲亦有淡淡天然甜味。相比起嚟紫薯圓就真係無咩味道,但勝在幾好咬口。小丸子係最煙韌嘅一款,煙韌控必點。仙草凍同樣係店主自己整,食落滑溜帶甘味。
桂花蜜芋圓($36)
另一個受歡迎嘅配搭係呢碗桂花蜜芋圓,有桂花凍、芋圓、地瓜圓、蜜薏米,同蜜紅豆。店主特別製作桂花凍,係因為佢哋試過,覺得同芋圓都幾夾。
桂花凍口感比較爽口,聞起嚟同食落都有濃郁又自然嘅花香,感覺比較清新。開飯仔覺得另一亮點係店主們自己煮嘅蜜薏米,一粒粒好好咬,配埋蜜紅豆嘅甜味平衡啱啱好。
更多【新店直擊】: |
芋泥鮮奶($30)
開咗兩個月有改良Menu,例如新出呢杯芋泥鮮奶,差唔多三分之一杯都係手工芋泥!打卡後記得搞一搞先飲,芋泥同樣有淡淡香味同甜味。牛奶就係一般鮮奶,奶味無咁香濃,不過就唔會蓋過芋泥原味,而且飲完一杯都唔會覺得膩吖嘛。
芋圓控
地址:觀塘協和街161號協和大廈地舖
文、相、片:Cathy