脆皮麻糬波波/夢幻糖果屋 5間銅鑼灣新餐廳推介
2022-04-01

疫巿難做,無奈結業同暫時停業嘅餐廳愈嚟愈多,不過同時都有唔少新店上場,為靜寂嘅餐飲業帶嚟生氣。飯局熱點銅鑼灣近3個月亦有超過40間餐廳新開張,以下5間新店都好啱打卡,包括IG大熱嘅菠蘿皮麻糬波波、夢幻童話風糖果店、掛滿燈籠嘅無味精越南菜等。
 

大熱菠蘿皮麻糬波波  James Bonbon Bakery


圖: foodxgoodwest_hk

提到區內最新人龍店,不得不提呢間由前四季酒店餅師主理嘅麵包店。最多人排隊買嘅就係菠蘿皮麻糬波波,顧名思義係將香港人熟悉嘅菠蘿包脆皮結合麻糬波波,新鮮出爐嘅時候漲卜卜,外脆內軟。其他麵包甜點同樣使用日本麵粉同天然酵母製作。
 

童話風糖果屋過江龍  Hans & Gretel


圖: sophiawong0127

唔單止1月有泰國After You Dessert Cafe同東京嘅THE MATCHA TOKYO進駐銅鑼灣,最近更有嚟自希臘嘅糖果店新登場!樓高兩層,樓上有堂食座位同打卡糖果牆呀。必食Gelato同經典肉桂煙囪卷,前者沿用總店食譜製作,可以配窩夫筒或者雞蛋仔,後者係源自匈牙利嘅Kürtoskalács,口感鬆軟。
 

七彩燈籠陽台+正宗越南菜  Lúa   


圖: Limingyee

呢間新店同樣樓高兩層,一樓陽台掛滿傳統燈籠,係打卡熱點。主打正宗越南菜,標榜無味精,自家工場95%嘅食材,包括越南法包用嘅法包、扎肉,同多款醬料都係嚟自越南!有唔少特色小食,包括即叫即製粉包配雜錦扎肉、蕉花絲拌BB蝦沙律都值得一試。
 

福岡師傅坐陣日本料理  一瀧


圖: 添比撈

餐廳裝修以江戶時代風格為主,有兩位嚟自日本福岡嘅師傅坐陣,加上選用優質直送食材包括佐賀金星黑豚肉、宮崎A4和牛、福岡三瀨雞等,無論係廚師發辦定其他料理都有水準。可以試下佢哋嘅卷物同壽喜燒,前者有多款創意口味,後者用A4宮崎和牛配搭棉花糖好啱打卡。
 

新派車仔麵專門店  大鑊


圖: wingshuen1123

主打四款養生湯底:老壇陳釀酸菜湯、辣而不燥麻辣湯、36小時花膠大筒骨湯,同100斤番茄濃湯。每款都好足料,例如麻辣湯用多種川渝香料秘製、可以自選辣度,番茄濃湯顧名思義真係用咗100斤本地新鮮蕃茄熬製!配唔同配料同麵底都夠百搭,而且飲完成碗湯都得。
 






文:Cathy.H

關鍵字
銅鑼灣
新餐廳
打卡
麵包店
糖果店
越南菜
日本菜
車仔麵
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
【隨時更新】零食速報 每周新款零食、酒品點評
6天前
【2022生日優惠】持續更新!7月壽星免費嘆自助餐/海鮮燒肉放題半價
4天前
5月份好評餐廳十強
2022-06-06
酒店新出「北歐神話」下午茶 10款鹹甜點色彩繽紛 多款海鮮入饌
2022-06-10
夏日果香!6-7月下午茶之選
2022-06-17