去曼谷食水門雞飯係指定動作，灣仔同樣有水門海南雞飯食！水門橋開業短短一星期左右，雖然只做外賣，但客人車輪轉，最高峰日賣600盒！只賣水門雞飯同豬手飯兩味，更請來泰國通胡慧沖任代言人，好有信心。

老闆梁生稱，因為鍾意食雞飯，而且想推出一些凍咗都仍然好食嘅外賣，於是就決定做海南雞。廚師班底全為泰國人，兩位泰國師傅來港多年，分別專門做雞飯及豬手飯，而且做法都係曼谷學返來，絕對係當地味道。

選用雞味更重嘅龍崗雞，大約2斤至2斤半，先浸雞湯半小時，再浸冰水15分鐘，再用斑蘭葉、香茅熬成的「味水」浸45分鐘。師傅再逐隻雞起骨，5分鐘就可以起晒成隻雞！

一盒雞飯有髀肉及胸肉，肉質好嫩滑，雞皮爽彈，有啖啖香茅味。而且唔會有肥膏，連胸位都唔嚡口。

泰式海南雞飯 $50

飯加入斑蘭葉、香茅及雞油等煮成，香味幾重而唔會太油，因為特意煮得乾身，唔會黏成一團，粒粒分明。但老闆話，雞飯最重要都係個醬汁！醬汁用辣椒、薑蒜、豆醬、泰國美極及椰糖等，辣味突出蒜香濃郁，用嚟點雞肉撈飯都好食！

另一主打泰式豬手飯都唔錯，有齊半皮半肉，豬皮勁滑，淋上秘製醬汁，微甜開胃。黃色醬汁冇咁辣，帶酸香，中和豬手膩滯感，伴碟嘅酸菜酸度剛好。

泰式豬手飯 $50

舖頭設有自助外賣機，用7款電子貨幣埋單，基本上由俾錢至出餐最快只需幾分鐘，非常之有效率。飯盒包裝好精美，有齊日本木筷子及膠匙，買兩盒仲有環保袋送。現時買飯盒送香茅檸檬水，清新又唔甜。

水門橋

地址：灣仔灣仔道148號地舖

文、相、片：Perrins