老虎堂勁敵! 銅鑼灣幸福堂即席手炒珍珠
2018-08-11


用「珍奶大本營」嚟形容銅鑼灣唔會好誇張,全銅鑼灣區至少有四間有黑糖珍奶,單係希慎果邊都有迷客夏同珍煮丹,而渣甸坊一條街已經有老虎堂同木衛二香港鑄茶所,迫滿行人路。8月10號又有主打手炒黑糖珍珠嘅新店開張,而且仲要開正喺老虎堂隔離,擺明打對台!首日開業落大雨都無阻排隊試飲,人氣絕對唔輸蝕!




今次主角幸福堂未開幕前已經好有話題性,皆因佢同老虎堂一樣係第一間海外分店,名副其實挑機!講返佢哋台灣果邊,幸福堂雖然遲開過老虎堂,但全台分店有成13間,相比老虎堂7間多咗一半!飲品方面幸福堂除咗招牌手炒黑糖珍珠系列,亦有其他colourful 同以水果為主嘅飲品,老虎堂就以茶飲為主打。兩間主打嘅黑糖珍奶賣點亦都相若:只選用台灣黑糖、掛杯黑糖紋理、珍奶上鋪滿奶霜同固定冰量甜度。但兩間做法細節都各異,但因為幸福堂手炒嘅珍珠只有一個size,細細粒容易入味,黑糖能夠入味更多;而老虎堂就有波霸同普通珍珠選擇,波霸珍珠好咬但太大粒冇咁大陣黑糖香!




曾經喺台灣創下日賣六千杯紀錄嘅黑糖珍珠,用料同做法大部分都跟足台灣店配方。黑糖以全人手炒製,更有個大鍋放喺客人面前手炒;珍珠落鑊前都用上黑糖熬製咗一個鐘頭,然後先放落鑊炒,負責人指出黑糖要一直不斷炒,先至會變得濃稠杰身,珍珠先會更入味!




更多【飲食潮流】:
1. 台北閃閃打卡雞蛋仔回流元朗 黑糖珍珠雪糕味好吸引
2. 坑口煲仔菜專門店 抹茶煲飯咩玩法?
3. 珍煮丹銅鑼灣開業了 又一台灣人氣黑糖珍珠茶飲過江龍


店員之後會將珍珠放入杯中,以炒糖勺沿住杯身兜個圈,好讓黑糖漿沾滿杯邊成為店家所講嘅「幸福紋」!最後倒上全脂鮮奶同一層厚奶蓋,灑過黑糖再用火炙燒就大功告成!店間亦有大大個籤櫃同求籤筒,買一次飲品就有得抽一次籤,中咗籤王仲可以免費有多杯飲品!


焰遇幸福黑糖珍珠鮮奶($30- 珍珠口感煙韌,同對家老虎堂相比甜度較自然;全脂鮮奶口感幼滑,整體感覺平衡。


買完嘢飲可以喺籤筒求簽,再喺櫃度抽出籤文,幾過癮!




份量方面雖然杯身比老虎堂矮一截但闊少少,所以珍奶都係少啲啲,三十蚊性價比算唔錯。珍珠口感煙韌,同對家老虎堂相比甜度較自然;全脂鮮奶口感幼滑,配上黑糖冇想像中咁膩,整體感覺平衡。唔太嗜甜嘅開飯仔覺得要同隔離老虎堂二選一,幸褔堂冇咁甜啱我啲!等嘢飲果陣可以聞到陣陣黑糖焦香,而且見住粒粒珍珠同黑糖混和,「飲」慾大增。


水母勇闖大海洋($28)用咗藍柑橘糖漿配上雪碧,杯中加上每日唔同味道嘅手製果凍,外貌閃令令,味道酸甜,夏天飲唔錯!


左:「抹抹暗戀」抹茶珍珠鮮奶($28), 右:「莓天想你」草莓珍珠鮮奶($28 - 用上士多啤梨珍珠,口感比較腍身,冇黑糖珍珠咁有咬口。


除咗招牌黑糖珍奶外,店內部分飲品都幾注目。其中「水母勇闖大海洋」用咗藍柑橘糖漿配上雪碧,杯中加上每日唔同味道嘅手製果凍,口感彈牙但果凍味道唔明顯,飲品入面仲加入咗食用閃粉,閃令令,味道酸甜,夏天飲唔錯;「莓天想你」、「抺茶暗戀」仲有「芒著蹦蹦跳」同樣用上士多啤梨珍珠,口感比較腍身,冇黑糖珍珠咁有咬口,建議大家都係試返招牌黑糖珍奶;「芒著蹦蹦跳」用台灣每日直送嘅愛文芒,加芒果漿製成,芒果味濃厚、飲落杰身,甜味天然得嚟唔太假。之後更會有兔仔啫喱放係上面,好得意啊!


「芒著蹦蹦跳」(期間限定)($38- 用上台灣每日直送愛文芒,加芒果漿製成。芒果味濃厚、飲落杰身,甜味天然得嚟唔太假!


香港幸褔堂

地址:銅鑼灣渣甸街36號5號鋪

文、相、片:Timothy

關鍵字
幸褔堂
珍奶
台式飲品
珍珠奶茶
黑糖
銅鑼灣
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
【隨時更新】零食速報 每周新款零食、酒品點評
5天前
【特約分享】超抵外賣陪你抗疫 即睇將軍澳飲食地圖!
2020-03-10
全城抗炎! 5間酒店自助餐轉型 任點任食海鮮/主食/甜品 變陣保衛生
2020-03-17
2月份好評餐廳十強
2020-03-05
【隨時更新】最後倒數!即將結業的老字號及人氣小店
1天前