美食荒漠不再 馬鞍山8間新餐廳推介
2019-07-02
曾幾何時,馬鞍山人一直都活喺荒漠之中,就連開間吉野家都畀大家視為珍而重之嘅綠洲,當年仲曾有馬鞍山人揚言話要日日食吉野家。不過嚟到2019年中,「美食荒漠」之名終於成為過去喇,近期有唔少餐廳入咗去落腳,等大家唔使跨區都可以enjoy到美食,仲有唔少係小店同特色菜系嘅餐廳添~ 

親民價嘆高質Shabu Shabu しゃぶしゃぶ四季

(左)八爪魚燒餅($22),(右)芝士年糕($38)
之前喺銅鑼灣開Pop-up店,最近終於正式登陸香港!Menu選擇亦更多元化,例如多咗一系列日式前菜。八爪魚燒餅味道同口感都似章魚燒,不過就用竹籤串起更方便享用;芝士年糕就用麻糬包住芝士,炸過後外脆內流心!
 

(午市套餐)上選雞腿肉涮涮鍋($78/位)
想食得抵啲嘅話,當然要揀啱午市或者下午茶時段去食Set,好似呢個上選雞腿肉涮涮鍋係一人前午間定食,包埋日本野菜盛合及烏冬或飯。而且仲有多款湯底選擇,好似柚子鹽湯(+$10)就比較清爽,夏天配雞肉夠開胃又唔膩。
 

鹿兒島A4黑毛和牛西冷壽喜燒($298/位)
呢度亦有多款高質食材,包括日本和牛、松葉蟹、鹿兒島元氣雞、西班牙黑毛豬等等。呢個鹿兒島A4黑毛和牛西冷就最啱鍾意和牛入口即溶口感嘅朋友仔,脂肪分佈均勻,用甜嘅壽喜燒湯底煮至半熟,再沾上生雞蛋汁,入口肉質軟嫩,牛香同鮮味濃郁。
 
台灣珍珠奶茶始祖 春水堂

(左)愛玉鐵觀音檸檬茶($32),(右)珍珠紅豆鮮奶茶($35)
1983年喺台中創立,係創造出第一杯台式珍珠奶茶嘅飲品店。馬鞍山店地方唔大,不過亦設有少量座位。愛玉鐵觀音檸檬茶係特別推介之一,愛玉凍同茶葉都從台灣運過嚟。珍珠珍珠更加係都跟返元祖做法,從台中總店送到香港,口感Q彈配埋粒粒紅豆好有咬口。
 

黃金香酥雞($48)
除咗飲品,呢度亦有小食同甜品供應,黃金香酥雞有啲似香港人食開嘅鹽酥雞,外面炸至金黃酥脆,加上胡椒鹽調味,唔會太鹹又夠惹味。
 

花生小麻吉($38,12:00-20:00供應)
麻吉即係麻糬,Q彈黑糖麻糬夾住保留粒粒口感嘅花生餡,口感豐富。而且花生嘅香味同黑糖甜味又夾得好,配甜度較低嘅茶飲一流。
 
多款選擇西日Cafe L.D.K. by Ufufu Café

極上鰻魚煎蛋漢堡($148,期間限定供應)
呢間Cafe主打日式西餐,打開Menu真係有唔少選擇,加上不時推出期間限定菜式,好似最近嘅和式風味漢堡及果昔(期間限定供應至9月)咁,當中最吸引嘅一定係呢個極上鰻魚煎蛋漢堡,原條鰻魚相當厚身,再加上煎至半熟嘅日本福岡產雞蛋,好吸引!
 

經典A4和牛漢堡($98,期間限定供應)
牛肉漢堡亦選用A4和牛,肉扒保留到肉汁而且牛香濃郁,配埋香口薯條同沙律,夠晒滿足。同一系列仲有日式火山燒肉漢堡($78)、雙重芝士熔岩和牛漢堡($108)同豆腐沙律炸雞漢堡($88)。
 

芒果寒天果昔($48,期間限定供應)
夏日天時暑熱最啱嘆返杯凍冰冰嘅鮮果特飲,呢杯芒果寒天果昔用芒果打成Smoothie,配搭透明爽口嘅寒天,透心涼得嚟賣相仲好啱打卡!
 
惹味叻沙 峇峇娘惹
有幾間分店嘅「峇峇娘惹」,睇個名都知,梗係主打叻沙、肉骨茶、咖央多等嘅地道星馬菜式啦!呢度嘅出品都係用東南亞出產嘅食材同香料。叻沙摻摻,湯底重椰奶同蝦米香,唔會太辣。摻摻混合咗油麵同米粉,一個掛湯能力強,一個保留口感,而且豆卜同啲摻摻都吸收晒湯汁。另外再加杯即叫即沖嘅馬來拉茶,泡沫豐厚,奶味濃!

性價比高池畔西餐廳 Puzzle Dining
喺馬鞍山游泳池旁嘅西日fusion菜餐廳。環境闊落,對住個泳池景都幾舒服。日頭嚟可以食件牛角包,嘆杯咖啡咁。午餐想食飯嘅話,最吸引嘅一定係呢碗自家製黑豚肉叉燒配日本煎蛋飯,香口得嚟唔覺油膩!而夜晚除咗西式扒餐之外,呢度仲有串燒食,最多人叫嘅係燒白鱔,望落都覺得勁juicy。同時兼有酒水供應,可以邊食串燒邊啤啤佢!

台灣品牌紅燒牛肉麵 新東王
原來呢間餐廳係由台灣新北市起家,已經有幾十年歷史嘅老字號嚟!今次喺香港開店,就主打台灣紅燒牛肉麵!有唔少用料都係台灣材料、台灣預製。牛骨湯底,加上軟腍嘅牛肉同牛筋,牛魔王就啱晒了!而且麵條爽滑。Menu除咗有主打嘅牛肉麵之外,仲有好多經典台式小食,可以畀你自由加配添。

成日好羨慕出面咁多餃子屋但又冇馬鞍山份?梗係唔係啦~呢間餃子舖價錢親民,全部餃子都係店內即製即包,餡料足,煎餃肉汁多。嚐辣人士可以揀韓式口味,辣醬微辛夠惹味。餓底一族當然就要碗餃子配麵底啦,包保夠飽。

泰式串燒美食 Thai Krub
雖然選擇唔係話特別多,但勝在價錢抵,而且住係喺富安嘅街坊落街行兩步就到。想食串燒叉叉電變得方便快捷,想豪啲仲有燒蠔、燒海鮮!泰菜必有嘅Pad Thai、冬陰功同炒通菜都齊。

文:Yanny

關鍵字
馬鞍山
美食沙漠
火鍋
壽喜燒
珍珠奶茶
Cafe
叻沙
牛肉麵
池畔餐廳
餃子
泰菜
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
【隨時更新】便利店尋寶 每周新品速報
2019-07-10
炎夏感bye-bye!6至7月下午茶推介
2019-06-24
美食荒漠不再 馬鞍山8間新餐廳推介
2019-07-02
6月份好評餐廳十強
2019-07-04
盛夏Take個break 7-8月下午茶推介
2019-07-16