美孚美食新「睇」驗
2016-02-19
美孚個名來自美孚新邨,絕對唔好睇小呢個屋苑,因為佢足足有99座!所以雖然位置唔算好大但仍然有唔少餐廳進駐。呢區最近亦經常被唔少食家提起,入到美孚會有咩美食新體驗或者新「睇」驗?睇開飯仔介紹落去啦!

足料爆漿車輪餅  車輪餅小姐


(Photos by 為食MoJil & chingchinglui)

前排喺IG同Facebook勁洗版嘅車輪餅就係嚟自美孚呢間小店,開業以嚟到而家都仲係經常見到長人龍!點解咁受歡迎?無他嘅,一個字:真材實料。$10一個車輪餅(即係日本嘅大判燒)有多款口味任揀,港人最愛嘅抹茶同香蕉朱古力口味仲玩流心,切開一睇,流心真係有彭拜嘅效果!
一樣大熱嘅紫薯口味亦有足料紫薯蓉餡,口味自然唔死甜,食多兩個都唔怕膩。唯一可惜咗少少嘅係因為人龍太長所以小店唔可以即叫即整,但即場食嘅可以請店員翻熱,補返數啦。

香軟脆心鳥結糖  多多餅店


(Photos by 蒙奇奇)

試完車輪餅不妨去埋呢間港式餅店買包紐結糖返屋企,咩係紐結糖?其實即係香港人去澳門會買嘅鳥結糖,台灣人就叫佢牛軋糖。
第一次試唔洗貪心,買包什錦裝慢慢試就得。裡面有黑芝麻脆心、濃情朱古力脆心、咖啡脆心、薑汁杏仁、藍莓榛子、西梅杏仁、杏仁同原味,頭三款加咗脆米口感更豐富,所有口味都黏軟唔粘牙,小小鳥結糖多多「趣」!

睇唔到都照食飯?  黑暗中對話體驗館


(Photos by cloverwong)

唔少人都鐘意相機食先,如果喺一片黑暗當中睇唔到咪嘥咗?其實換個角度諗,太依賴視覺會唔會令到其他感官變得遲鈍?呢間由社企「黑暗中對話」開辦嘅體驗館就比個機會你,試下喺伸手不見五指嘅黑暗裡面享用由另一間名社企「銀杏館」到會嘅美食。
放心呢度有視障人士做導賞員,確保你可以喺安全嘅環境之下,用觸覺、味覺、嗅覺同聽覺進食。每月舉辦一至兩次,預約嘅時候可以寫明自己係素食者或者對某啲食物有敏感方便安排。

真.上海家鄉味湯麵  滄浪亭


(Photos by lauyuling & 為食MoJil)

香港有唔少出色嘅上海菜館,但或多或少都會為了遷就港人口味而修改,而美孚呢間街坊小店,就係其中一間依然堅持唔修改家鄉風味嘅例子。
最多食客推介嘅係嫩雞煨麵,奶白色嘅湯底加上大量雞肉粒同蔬菜粒,入口湯底嘅鮮甜、雞肉嘅鹹香同蔬菜嘅清新互相平衡,幼麵就口感軟腍,而且分量十足,男士食都會夠飽。另外有大大塊炸豬排嘅大排麵同有入口即溶豬軟骨嘅紅燒軟排菜飯亦係推介。

隱世精緻意菜館  Mia Pasta Trattoria


(Photos by Food and Crits & Yan~*)

屋邨商場嘅西餐水準唔高得去邊?凡事總有例外嘅,呢間小店就以精緻意大利菜成為區內最受歡迎嘅餐廳之一。無論係Pizza、意粉定意大利飯都有一定水準。
不過講到最多食家推介嘅其實係呢度嘅意式芝士蕃茄多士,厚多士加咗一層厚厚嘅芝士喺面再烤至金黃色,加黑醋浸蕃茄粒入口香脆而唔油膩,無論係唔係芝士控都會愛上嘅開胃前菜!如果價錢可以再相宜啲啲就Perfect池啦!

燒雞翼我鐘意食  吉吉燒農莊


(Photos by Cur & 小連)

一班人燒雞翼唔係入新界就係上朋友屋企天台?其實市區都有就腳嘅燒烤場,而且仲係任食。唔知老闆係咪同開飯仔一樣細細個就聽周星馳唱「燒雞翼我鐘意食」,呢度淨係雞翼都有七款!
七款雞翼包括五款唔同口味嘅雞中翼同兩款雞全翼,相比起嚟海鮮選擇唔多,不過就歡迎自攜其他食材入嚟燒。蔬菜推介香口嘅牛油栗米粒同蒜蓉雜菜金菇,唔夠飽?有方包或者法包,加佢地自家製嘅蒜蓉牛油醬燒嚟食就得啦。

減肥敵人牛油雞翼  小越南


(Photos by YoYo1007 & clc408)

認真,想減肥嘅就跳過呢段介紹,因為唔少街坊都話呢度嘅秘製牛油雞翼真係「味」力沒法擋,會食到唔記得咗自己其實減緊肥!
幾乎每張枱都會叫一碟嘅招牌菜秘製牛油雞翼聽個名都知邪惡,炸好嘅雞翼帶香濃牛油味同啱啱好嘅蒜蓉味,炸漿唔厚咬落皮脆肉滑,惹味得嚟香、脆、嫩於一身。唔鐘意咁邪惡?仲有焦糖薑粒雞翼,甜、酸、辣一樣平衡有致。

回味香濃鮮茄薯仔湯  金利銀輝茶餐廳


(Photos by lkkki)

最後Back to basic介紹返香港人見慣見熟嘅茶餐廳,基本嘢當中其實都有小驚喜。呢間茶餐廳平均水平中等,但假日特餐就引嚟唔少熟客特登早起嚟一嘗滋味。
其實所謂嘅假日特餐以鮮茄薯仔排骨螺絲粉作賣點,淨係星期六及公眾假期供應,數量有限通常賣到十點就無!因為佢地嘅湯並唔係普通例湯,湯底濃郁飲得出番茄同排骨嘅鮮味,螺絲粉煮得啱啱好唔過腍,高分之作。

隨時接收最新資訊
讚好OpenRice專頁!


關鍵字
美孚
車輪餅
鳥結糖
牛油雞翼
開飯專題
開飯仔為你提供各類型最新飲食情報及優惠,全面照顧你的飲食喜好。
相關文章
【Pinkoi好設計好生活】10 分鐘完成另類料理:炸麵包!3 種吃不停口的食法
2017-04-14
邪惡新「食」力!五層芝士包春季新口味
2017-04-10
【國際新食力】紅到去韓國?弘大芝士麵包同港版激似
2016-07-20
日本人氣手工麵包店登陸尖東 招牌吐司蛋香味超濃(有片)
2017-03-13
【便利店尋寶】限量版蝦子杯麵試食報告
2017-05-19
初夏清新之選 酒店芒果主題下午茶
2017-05-19
餐廳資料
更多
收起
本月熱門
【隨時更新】便利店尋寶 每周新品速報
2019-11-29
【2019聖誕】早鳥優惠! 聖誕自助餐推介
2019-11-27
高CP值放題推介
2019-11-07
秋風起!5間大閘蟹放題食店集合
2019-11-19
【2019聖誕】年尾叉電 聖誕下午茶集合推介
2019-11-19