天氣轉涼又如何？雪糕控係唔會驚㗎，依然會繼續食雪糕！近日有間嚟自美國嘅Gelato店登陸佐敦，開咗全亞洲第一間分店，每日輪流提供約20款口味嘅gelato，同埋多款鹹、甜點等，全部都好吸引。

 20款口味中，有2款香港限定口味：火龍果、蕃石榴

20款口味嘅gelato全部都喺香港新鮮製作，材料則主要嚟自意大利，完成後keep住雪喺大約負13.5嘅冰櫃裡面。呢度嘅gelato空氣感較坊間食到嘅少，口感軟滑，而且乳脂肪含量更加係低過8%，食多幾杯都唔怕肥。

杯裝又得，要cone又得，一球兩球三球都得，仲可以免費試完味先至再揀心水。特別推介招牌主打嘅開心果味，使用意大利西西里開心果製作，啖啖都係開心果嘅濃香，兼且仲可以咬到粒粒開心果碎添，認真開心。

香蕉朱古力（Banana Split）加入新鮮水果製作，再混埋焦糖醬同朱古力，香蕉味突出之餘又帶有甜香。

另一款頗受歡迎嘅口味係Nutella軟芝士，製作過程中加入咗Mascarpone芝士㗎，真材實料，兼且一啲都唔吝嗇，球球都好大球下。

想買返屋企或去party同多啲人一齊開心些牙都冇難度，舖頭特設500g外賣家庭裝，同樣都係想要一款兩款定三款口味都得，唔使擔心冇乾冰或冰袋嘅問題，個保溫盒都可以keep到一個鐘頭㗎，好方便。

舖頭同時供應多款鹹點同甜品，種類多樣，意式、日式等各國口味都有，Tiramisu嘅咖啡味好香，仲好creamy，不過就冇乜酒味。

甜魔會大愛嘅係金莎蛋糕，頂頭堅係有粒金莎放咗喺度，隔咗層黑朱古力醬後，內餡嘅分層分別係榛子醬同朱古力餅，仲有啲nuts添。

叮熱食嘅意大利炸蛋甜甜圈，上下兩層係較硬身嘅冬甩，夾住中間嘅軟滑嘅custard，又係另一種甜。

Gelato-Go
地址：尖沙咀彌敦道174號地下

文、相、片：Kar