給自己一個休息時間 10-11月下午茶推介
2019-10-25

生活上成日面對好多嘅壓力,可能一時解決唔到,但橡筋拉得太緊都要放鬆下,要畀自己一個唞唞嘅空間啊。對唔少朋友嚟講,食Tea都係一個relax嘅方法,今期就有唔少全新嘅下午茶,有水果主題,又有朱古力主題等,睇下邊個啱你?

My Melody主題下午茶 Vive Cake Boutique

有無Melody fans喺度?中環呢間夢幻蛋糕店最近同日本Sanrio公司合作,推出Melody主題嘅下午茶套餐及蛋糕,各位少女係咪已經心心眼咗?My Melody Tea Party下午茶套餐分咗兩層架,分別供應五款甜品及鹹點,甜品有棉花棒棒糖、檸檬吉士醬馬卡龍、牛油曲奇蘋果撻、士多啤梨馬斯卡邦慕斯蛋糕以及開飯仔最推薦嘅提子英式鬆餅配忌廉果醬,鹹點方面明太子意粉都幾出色。

另外呢個My Melody Uni-cone蛋糕,蛋糕以粉紅及粉黃色忌廉作外層,仲有好似白雲般嘅蛋白脆餅,想買嘢送畀鍾意Melody嘅朋友,呢個Over The Rainbow禮品裝係好選擇,包括一盒蛋白脆餅及My Melody造型曲奇餅,真係好可愛!

墨西哥風情 Alibi  

想去旅行又未飛到?食住呢個tea先啦~ 呢間酒店同國際說故事及教育品牌PAPINEE合作,將會推出一連四篇旅行主題嘅下午茶。率先登場嘅係「活力墨西哥城」下午茶。佢哋選用嘅食材充滿拉丁美洲風情,喺香港非常少見,好似墨西哥植物素食捲餅、香橙仙人掌吉士馬卡龍咁,食完當去咗先啦~食tea仲有勁得意嘅馬騮公仔!小朋友見到實開心死!預告下,嚟緊會陸續推倫敦、日本等歐亞主題。

「奇幻旅程下午茶」
供應時間:每日15:00 – 17:30
價錢:$555 (兩位用)

水果控大愛 J's Bar Bistro

食親下午茶都好有罪惡感?咁又未必。呢間酒店推出「悠閒水果下午茶」,就好健康啦!無論鹹點定甜點都加入咗新鮮生果元素,就好似香橙酒梳乎厘、白桃香檳果凍等,甜甜地又帶啲水果香,一定可以滿足到一眾水果控啦~而意大利帕爾馬火腿居然係配西瓜而唔係蜜瓜,都幾特別呢~

另外佢哋仲同Craving Sketchers飢餓畫家合作,一連兩個星期六,食個tea就會免費為食客畫張卡通人像畫呀!

「悠閒水果下午茶」
供應時間:每日 15:00-17:30 (19/10及26/10有畫家駐場)
價錢:$498 (兩位用)

江南風歎茶 奧卑利

下午茶唔一定係西餐嘅專利嚟嘅!呢間江南菜餐廳都推出咗個「江南下午茶」,當中有各式傳統嘅江南美點,造型精美,有啲口味仲好創新;好似小籠包就有灌湯黑豚肉同麻辣黑豚肉兩種口味啦!而甜點方面主要走返傳統路線,棗蓉酥餅、驢打滾等江南嘅傳統民間小食都有得食。另外有多款嚟自台灣、香港等地嘅單一產地茶葉泡製嘅靚茶。

「全新江南下午茶」
供應時間:每日 14:00-18:00
價錢:$388 (兩位用)

貴婦級享受 The Lounge

呢間酒店環境優雅之餘,新推出嘅英式下午茶亦非常吸睛。精緻嘅美點,擺上去經典嘅三層餅架上,啱晒同閨蜜們一齊打卡啦!佢哋嘅鹹點食材相當矜貴啊,又鴨肝醬、又西班牙黑毛豬火腿、鮑魚等等,而甜點亦都有好多選擇,包括士多啤梨撻、抹茶意大利芝士蛋糕、櫻花蛋糕卷等,帶出唔同嘅「甜」呀~
 

下午茶套餐
供應時間:每日 15:30-18:00
價錢:星期一至五 每位$268、2位$468;星期六、星期日及公眾假期每位$288、2位$488

召喚朱古力控 WOOBAR

朱古力同下午茶,可以話係女生們嘅最愛啦!呢間酒店同法國殿堂級朱古力品牌Valrhona合作,推出以朱古力為主題嘅下午茶!以「人生五味」——甜、酸、苦、辣、鹹為靈感,有配上帶苦嘅Guanaja70%朱古力牛角包、Caraibe 66%黑朱古力軟心蛋糕等。最特別一定係新鮮芒果夾埋Manjari 64%黑朱古力醬同日式七味粉,苦甜之中又帶點辣~噢,係「人生」啊!重點係,食完仲有禮物收!每人都可獲贈一盒Valrhona「頂級產地」朱古力禮盒呢(先到先得,送完即止)。

「朱古力迷狂熱告白」
供應時間:15:00-17:30(一至五);14:00-17:30(六、日及公眾假期)
價錢:星期一至五 $488(兩位用);星期六、星期日及公眾假期 $638(兩位用,兼可任添鹹點及包氣酒兩杯)
期間限定:即日起 至 10月31日

召喚姆明粉絲 FINDS   

下午茶就食得多啦,有冇試過北歐下午茶先!呢間餐廳今次就請嚟芬蘭籍嘅總廚設計下午茶美點啦!仲要同埋日本家電品牌合作,客人可以用佢哋嘅烤盤自己整印有「姆明」、「阿美」等造型的班戟添呀!仲非常創新咁用章魚燒烤盤,整出七款球狀嘅鹹點,當中有香脆煙燻三文魚慕絲球、脆炸橄欖釀豬肉等,口味獨特,一定啱晒貪新鮮嘅香港人啦!

「FINDS x BRUNO北歐秋日下午茶
供應時間﹕每日 15:00-18:00
價錢﹕星期一至五 $208 (配無限量添飲無酒精飲品);$238 (配兩杯氣泡酒)
星期六、星期日及
公眾假期 $250 (配無限量添飲無酒精飲品);$280(配兩杯氣泡酒)



文﹕Kiko


關鍵字
下午茶
小籠包
朱古力
尖沙咀
金鐘
旺角
蛋糕
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
【隨時更新】便利店尋寶 每周新品速報
5天前
給自己一個休息時間 10-11月下午茶推介
2019-10-25
【特約分享】食魚生轉運 三種好意頭日本海產介紹
2019-10-14
高CP值放題推介
7天前
鼎王來了!味道服務媲美台灣 必食麻辣鴨血鍋及員工教路秘製鼎王飯
2019-11-01