約好姐妹傾Oppa!二人前韓國餐廳推介
2017-07-06

各位宋太太唔好咁傷心,雖然你地嘅宋仲基Oppa要結婚,但仲有其他男神㗎嘛。一於約個好姐妹一齊去食韓國菜,傾計交流一下,順便睇下店裡面有無靚仔Oppa店員先,嘻嘻。
 

健康啲連鎖烤雞店  Goobne Chicken


圖:bonbon妮

有睇韓國電視劇同綜藝節目嘅話,都知道韓國人有幾愛食炸雞。不過下下食炸雞怕熱氣嘅話,仲有烤雞可以揀。呢間係韓國其中一間連鎖烤雞店,非油炸而係改用烤爐高溫烤焗,將油分逼出嚟,所以食落雞肉特別嫩滑Juicy而唔油膩。再嗌多份小食例如辣炒年糕或者特制雞蛋卷Share就啱啱好。Fans仲可以同代言人韓國偶像組合EXO......個紙板Selfie下𠻹。
 

悠閒韓式甜品Cafe  Seoulmate Cafe


圖:joggling

呢間人氣韓式甜品Cafe由西環搬到銅鑼灣,不過創意食品同個靚靚後花園就有得留低!雲下的泡菜炒飯顧名思義,成嚿雲咁嘅蛋白梳乎厘下面係泡菜流心蛋炒飯,撈埋一齊食味道偏淡咗少少。另外仲有扮到成碗韓式拌飯咁嘅砵仔拌綠茶芝士慕斯蛋糕,亞朱媽年糕多士和雪糕大戰紫薯、爆米餅配柚子芒果煙三文魚,同紫薯Latte等都值得一試。
 

新派詩意韓國菜  韓半島


圖:babyzbb

食過唔少韓國菜餐廳想搵啲新意?尖沙咀呢間行西式韓國菜嘅餐廳或者幫到你。大廚有多年主理意大利菜、法國菜等嘅經驗,所以將西餐嘅烹調手法融合到韓國菜之中。而且每項菜式都係同韓國文化有關,連菜名都特別有詩意。例如井裡的花其實係五花腩肉泡菜炒飯,香辣開胃。如果在小每勿島上搭橋就係西冷牛排,肉香濃郁口感軟腍。
 

更多【二人前指南】:
1. 留喺香港都食到 啱傾計嘅星馬餐廳精選
2. 港九新界齊哂!最Sweet甜品店特集
3. 打卡必去!姐妹聚會7大餐廳精選


熊大陪你嘆輕食  KC Cafe


圖:wandersKikivicki

如果兩個人唔想食得太飽,剩係想飲杯嘢吹下水嘅話,可以考慮觀塘呢間樓上Cafe。飲品由賣相吸睛嘅紫薯Latte同藍色Lamonade,到各款冰沙、咖啡同茶都應有盡有。小食方面更加有齊飽肚嘅炸醬麵,到方便Share嘅韓式紫菜飯同小飯糰都有。最緊要嘅係Cafe放咗唔少得意公仔,凍飲又有Line Friends杯套,加哂分啦。
 

Fusion花卷+年糕  School Food


圖:eat4forever

講開新派韓國菜,又點少得呢間連鎖店呢?由韓國紅到嚟香港,主打多款唔同口味嘅花卷(Mari)同一系列Fusion菜式。最多食家推介嘅花卷係烏卒卒,即係墨汁口味,食落淡淡墨魚香,配埋魷魚肉口感同平時食開嘅韓式紫菜包飯好唔同。另一必食係廚師卡邦尼年糕,用韓式年糕配搭西式卡邦尼汁,Creamy得嚟年糕又夠煙韌。
 

芝士Fans大愛  小火焰韓式咖啡餐廳


圖:mk chan chanel.bar

雖然話韓國菜唔一定代表勁多芝士,但如果你就係無芝士不歡嘅忠實芝士狂熱者嘅話,咁觀塘呢間嘅招牌菜溶岩芝士炸雞麵包一定係你嘅心頭好。賣相同農夫包有異曲同工之妙,但裡面係滿滿嘅芝士醬!旁邊有十幾件炸雞,熱辣辣脆卜卜最啱點芝士醬,記得食埋個麵包唔好做大嘥鬼唷。再一人嗌一杯沙冰,或者最後點碗雪花冰做甜品,完滿哂。



文:Cathy

關鍵字
韓國菜
烤雞
甜品
Cafe
花卷
尖沙咀
觀塘
二人前指南
無論是情侶撐枱腳,或者閨蜜二人聚會甚至和家人二人世界都可以參考的美食指南。
餐廳資料
更多
收起
本月熱門
情人節去K11 MUSEA 一文睇晒浪漫餐廳
2020-02-06
【隨時更新】零食速報 每周新款零食、酒品點評
4天前
美國人氣肉桂卷抵港!煙韌原味/朱古力/焦糖胡桃卷(有片)
2020-02-06
全城抗炎 與醫護同行!提供醫護餐飲免費優惠餐廳一覽
2020-01-31
全城抗炎!60間餐廳推$0-$25酒精搓手液換購計劃
6天前