糧尾打氣!5間北角平價飯堂推介
2019-07-23
又嚟同大家糧尾打打氣!今次嚟到北角,講真,約食飯就好少入嚟呢區喇,但附近都有唔少office同住宅,活喺北角區生活圈嘅朋友仔,糧尾時期不妨鐨下入啲大街小巷,或者會發現大部分都係親民抵食之選嘅小店,類型又多,唔使挨頹飯~

健康住家餃子 營然
呢度主打自家製健康餃子,仲有幾款飯餐揀,例如手撕雞飯、蔥油雞飯、豬軟骨飯,50左右有交易。呢度就連嘢飲都係自家製嘅健康養生花茶,最啱冇住家飯但又想健康啲嘅打工仔。鬆少少嗰日咪叫多碗滋潤燉湯咯。

抵食日式外賣店 御藏
作為細細間嘅外賣店嚟講,呢度嘅選擇都幾多,有飯類、麵類、壽司、刺身等。呢度嘅魚生飯雖然抵食,不過魚生始終都係太奢侈,對於糧尾嘅大家都係暫時放下執念先!我哋嘅目標係平價嘅日式飯類啊~好似大大塊雞扒嘅日式滑蛋雞扒飯咁都係$40頭!

港島區米線之選 阿一豬扒酸辣米綫
圖:soya1314
阿一豬扒酸辣米線喺港島都幾出名,而北角店都已經開業咗唔少年。三大塊豬扒新鮮炸起,有肉汁。米線比較粗身,有口感兼彈牙。仲有重口味人士應該會鍾意嘅大量酸菜同花生,$40左右喺港島食到碗飽麵嚟講算係咁啦,而且又多款,想乾撈米線又得~

超值外賣海南雞飯 瓊媽媽
外賣海南雞飯套餐,跟埋老火足料例湯都係$40蚊左右,溫馨提示,外賣平過堂食!雞肉嫩滑,雞皮爽口。有無骨版本嘅,食落啖啖都係肉,但要享受就梗係要畀多啲啲喇。另外仲有口水雞、霸王雞揀,配菜飯、油飯定白飯都係自己揀~咁多款,日日食雞都唔係問題(好似係)。

新派素食清腸胃 素食主意
平時打工仔出得多街食飯已經好heavy,偶然green一下,畀個腸胃休息都係一個唔錯嘅健康選擇。呢度係走新派素食路線,有港式家常便飯類,亦都有西式素意粉、小食、墨西哥卷咁,就連煎釀三寶都有素食版!

文:Yanny

關鍵字
素食
海南雞
米線
外賣店
餃子
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
情人節去K11 MUSEA 一文睇晒浪漫餐廳
2020-02-06
【隨時更新】零食速報 每周新款零食、酒品點評
3天前
美國人氣肉桂卷抵港!煙韌原味/朱古力/焦糖胡桃卷(有片)
2020-02-06
全城抗炎 與醫護同行!提供醫護餐飲免費優惠餐廳一覽
2020-01-31
有平有貴 情人節餐各級價格攻略
2020-02-04