精緻紅寶石朱古力下午茶 尖東新開山茶花主題西日餐廳
5天前

置身粉紅色花海當中!講緊尖東呢間新開以山茶花做主題嘅餐廳,有一大幅粉紅色花牆。要襯返嘅話一定要點紅寶石朱古力下午茶,以帶天然粉紅色嘅紅寶石朱古力為主,創作一系列精緻茶點。其他菜式同飲品亦好啱「相機食先」㗎。
 


Camellia名副其實以優雅嘅山茶花為主題,最搶眼嘅係用9999朵唔同粉色系山茶花砌成嘅花牆,加上粉紅色梳化、淡粉紅色雲石枱、金邊嘅磨砂拱窗等,係一個喚醒大家少女心嘅裝修啊!
 


紅寶石朱古力下午茶套餐($398/2位,另有$208/位,逢15:00-17:30供應)

主打嘅紅寶石朱古力下午茶以金邊玻璃首飾盒呈上,而紅寶石朱古力嘅特點就係天然粉紅色澤,味道帶莓果香,唔需要加任何人工色素或香精!下午茶共有六款甜點、三款鹹點同飲品。
 


紅寶石朱古力雪糕

賣相最Fancy嘅要數到玫瑰花形嘅紅寶石朱古力雪糕,不過建議大家影完相要食咗先,因為都融得幾快。雪糕口感柔滑,而且因為無加其他配料,可以食到紅寶石朱古力天然莓果原味。
 


鹹蛋泡芙、傳統法式貝殼蛋糕、紅寶石朱古力三文治、黑莓紅寶石朱古力

鹹蛋泡芙係鹹蛋菠蘿餡,惹味得嚟同時又有清甜Juicy感。而紅寶石朱古力三文治、黑莓紅寶石朱古力呢兩款,前者會比較甜,口感豐富;後者以酸甜黑莓配搭紅寶石朱古力,清新果香更突出。傳統法式貝殼蛋糕濕潤鬆軟,富牛油香。
 


迷你蝦脆筒、煙三文魚及酸忌廉撻、黑松露芝士及魚籽撻、自家製英式鬆餅配果醬及紅寶石朱古力醬

迷你蝦脆筒味道帶酸,加上蝦肉爽口,最啱做開胃小食。兩款撻小巧精緻,煙三文魚脂香由酸忌廉平衡返,黑松露芝士食落無想象中咁Heavy,黑松露獨特嘅香氣畫龍點睛。鬆餅亦特別配搭紅莓果醬同紅寶石朱古力醬,兩款醬味道都係甜中帶酸,唔會太膩。唯一扣分嘅係鬆餅口感過於紮實,再鬆脆啲會更好。
 


日本明太子素麵($148)


餐廳主打西日料理,另一特色係素麵採用日本小豆島手工傳統素麵,幼細柔順,口感彈牙帶淡淡麵粉香。呢份粉紅色嘅素麵就加咗明太子忌廉醬汁,鹹辣惹味,難怪係熱賣口味之一。配搭溫泉蛋、蝦乾,同蟹肉薯餅。特別推介加埋蝦乾一齊食,增加鮮味同口感層次。
 

更多【新店直擊】:
1. 倫敦名店Duck&Waffle現已進駐中環 必試鴨肉窩夫+香港限定菜式
2. 80年代灣仔重現!灣仔新開樓上大排檔 鮮味花蛤蒸水蛋、咕嚕黑豚肉
3. 台中人氣手工芋泥甜品登陸尖沙咀 必試招牌雙芋仙草奶凍、神仙奶

 

海膽薏米意大利飯($188)


之所以叫薏米意大利飯,係因為餐廳用薏米取代一般白米嚟煮,所以食落唔係一般意大利飯帶硬芯嘅口感,反而係一粒粒嘅咬口,幾有新鮮感。配海膽同忌廉汁,海膽分量唔算多,勝在新鮮Creamy同忌廉汁好夾。
 


流心抹茶撻($98)


甜品亦糅合西日特色,呢份有齊流心京都抹茶撻、朱古力脆片,同黑糯米雪酪,微暖抹茶撻切開立刻流出抹茶漿,視覺效果一流。抹茶漿嘅茶香同甜味平衡,對抹茶控嚟講可能會希望回甘再突出啲。黑糯米雪酪嘅糯米香濃郁,但因為本身糯米味道唔會好霸道,配抹茶就唔會搶去風頭,係特別得嚟又幾夾嘅配搭。
 


(左)招牌拿鐵($52),(右)藍蝶花香芋拿鐵($52)

餐廳嘅拿鐵特別以茶代替咖啡,沖出低咖啡因又順喉嘅飲品。粉紅色嘅招牌拿鐵係山茶花口味,聞起嚟花香優雅,味道清淡怡人。而淺藍色嘅藍蝶花香芋拿鐵味道就以芋頭為主,芋頭甜味自然。
 




Camellia
地址:尖沙咀梳士巴利道18號Victoria Dockside K11 Musea 地下033號舖




文:Cathy
相、片:Tom Li

關鍵字
尖沙咀
下午茶
紅寶石朱古力
小豆島素麵
山茶花
Camellia
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
【隨時更新】便利店尋寶 每周新品速報
6天前
尖沙咀新商場開幕 過江龍餐廳一覽
2019-08-30
【2019中秋】最新人氣話題+送禮靚盒月餅集合
7天前
【蠔癡必看】生蠔海鮮的浪漫盛宴!
2019-08-27
台中人氣手工芋泥甜品登陸尖沙咀 必試招牌雙芋仙草奶凍、神仙奶
2019-09-03