盛夏Take個break 7-8月下午茶推介
2019-07-16

下午茶好似有種治癒嘅魔力,有時幾攰幾辛苦都好,同閨蜜或者一班friend去食返個tea,抖返兩三個鐘,又好似叉返電咁。今個盛夏,呢幾間酒店都推出咗啲特色主題嘅下午茶,有蜜瓜有綠茶,仲有間可以任食Movenpick雪糕添!

日式梳乎厘下午茶   港威酒店  Three on Canton 

尖沙咀呢個下午茶,兩個重點:大眾飛佛嘅梳乎厘班戟、兩個鐘無限任食6款Movenpick雪糕!梳乎厘班戟用上法式麵粉同日本雞蛋製作,質感綿密鬆軟,空氣感適中,蛋香味十足,建議試咗幾啖原味之後可以淋埋自家製抹茶醬。至於6款Movenpick,分別有口味包括意大利奶凍、瑞士朱古力、雲呢嗱、士多啤梨、特濃咖啡同楓糖核桃,大家可以去雪櫃一盒一盒咁隨便拎嚟食!好鬼抵,飲品方面,花茶、咖啡以外,想要cocktail或mocktail都得啊。

日式梳乎厘下午茶
價錢:$528(2位) / $388(1位)
供應日期及時間:即日起,每日3-5pm

綠茶下午茶自助餐   帝苑酒店 雅苑座

綠茶迷mark低啦,成個下午茶buffet都係以綠茶甜品做主題呀,有部分仲係新出嘅添,好似使用日本宇治抹茶粉製作嘅綠茶瑪德蓮,口感鬆軟;綠茶果凍配杏仁慕絲感覺清爽;綠茶薈萃則有順滑嘅綠茶奶凍外,同時仲有香甜嘅芒果慕絲同啖啖芒果肉食到。另外唔少得一貫招牌作好似綠茶歌劇院蛋糕、綠茶紅豆卷、綠茶戚風蛋糕等,除甜品外,刺身壽司爐端燒等都係任食啊。

呢次主題下午茶係聯乘韓國暢銷化妝及護膚品牌合作嘅,所以凡兩位惠顧,就可以免費獲贈TONYMOLY 「THE CHOK CHOK 綠茶面霜系列」禮品包一份(數量有限,送完即止)。

仲夏綠茶水潤下午茶自助餐
價錢:成人$328 /小童$218 (另加一服務費)
供應日期及時間:即日起 至 8月31日(逢星期六、日及公眾假期,3:30pm-5:30pm)

Giuseppe Zanotti下午茶   麗思卡爾頓酒店  Café 103 

雖然而家係盛夏,但要走在潮流啄啄,比人行快一步,就已經要開始睇定秋冬嘢。呢間酒店就同意大利奢華鞋履與時裝品牌Giuseppe Zanotti合作,以品牌秋冬女裝系列Urban Beauty為靈感,推出咗一set高貴華麗嘅花園下午茶,10款鹹甜點各有特色,仲特別以開心果同榛子入饌。紅桑子芝士撻酸甜可口,花形圖案則係根據品牌水晶高踭鞋設計;開心果撻以靚靚嘅食用花啫喱放頂,整體堅果香氣濃郁。

凡惠顧下午茶,再喺社交媒體上打個卡,就可以有機會得到Giuseppe Zanotti嘅限量禮物啦。

GIUSEPPE ZANOTTI 下午茶
價錢:每份港幣$418
供應日期及時間:即日起至9月15日,每日3:30-5:30pm

仲夏蜜瓜日式下午茶   四季菊日本餐廳

夏天梗要食蜜瓜!呢間餐廳嘅下午茶,仲以蜜瓜嚟做主題添,開心仔。滑捋捋又彈口嘅靜岡蜜瓜白酒啫喱,清甜帶芳香;蜜瓜忌廉餅啖啖果肉,口感軟滑;蜜瓜椰子慕絲餅亦香甜多汁。另外仲有同樣都係炎夏恩物:雪糕三文治,加埋多款日式美食,幻想自己去咗幾個鐘日本都好。

仲夏蜜瓜日式下午茶
價錢:$528(2位)
供應日期及時間:即日起,逢星期六、日3:00-5:15pm

文:Kar

關鍵字
下午茶
甜品
雪糕
梳乎厘班戟
尖沙咀
飲食潮流
開飯仔為大家發掘香港這個美食之都的最新美食資訊,分享飲食潮流文化。
餐廳資料
更多
收起
本月熱門
【隨時更新】便利店尋寶 每周新品速報
4天前
尖沙咀新商場開幕 過江龍餐廳一覽
2019-10-11
【特約分享】食魚生轉運 三種好意頭日本海產介紹
2019-10-14
亞洲首間 Tiffany Blue Box Café 打卡必到!三層架下午茶 + 棉花糖雞尾酒
2019-10-08
高CP值火鍋放題 (1)
5天前