當傳統歐陸越南餐廳大玩Fusion菜
2020-01-13
香港餐廳有好多,但要搵到用心經營嘅並唔容易。作為一間餐廳嘅靈魂,廚師嘅用心可以係烹調手法同食物質素上體現出嚟。今次就等小編嚟 介紹幾間又有特色,食物又有保證嘅餐廳俾你啦!

5% Cafe(旺角)       
旺角新開嘅5% Cafe座位寬闊,望出窗係一望無際嘅彌敦道,環境非常舒適。一入餐廳會見到黑板上寫滿每個月店舖嘅活動,旁邊仲有多款board games俾你揀,又食又玩,最適合情人知己暢談心事。

紅酒焗牛脷飯/意粉
用秘製紅酒慢煮4個小時,牛脷入口即溶,鮮香惹味又唔鞋。配菜有蘿蔔、番茄、西芹、蕃薯,份量十足。


黑椒手打牛肉芝士漢堡配薯條
人手打嘅純牛肉漢堡,麵包稍稍烘過,牛肉厚得嚟粉嫩多汁,淋上秘制黑椒汁,色香味俱全。薯條即叫即炸,熱辣辣,卜卜脆。


Rainbow
第一層雪碧、第二層椰果芒果汁、第三層草莓醬,色彩非常繽紛。三種味道配合得啱啱好,由上至下飲出三個唔同層次。記得飲之前唔好攪拌啊。


Hot Matcha Mocha
咖啡都可以飲得好健康。呢杯Matcha Mocha選用全脂奶同Espresso,甜度方面可以揀少甜或無糖。表面嘅巧克力綠茶泡泡同熱辣辣嘅咖啡一齊飲,好舒服。


斑斕蛋糕
餐廳每日新鮮製造,斑斕蛋糕配椰果忌廉同開心果,食落口感豐富,香甜清幽又唔會過甜。


Sol House親和藝術(荃灣) 
呢間位於荃灣嘅西式餐吧,位置寬闊舒適,裝修以簡約文青為主調,後面仲有張吊椅可以坐上去打卡添。Happy Hour時段由4:30至夜晚9點,環境寧靜,係唔少人放工後嘅約飯閒聊熱點。菜式方面,大多走歐洲、東南亞fusion風,好多食客都大讚味道新穎獨特。


大蝦牛油果凱撒沙律
你可以按照自己嘅喜好係預先準備好嘅大木碗內放入巴馬臣芝士、煙肉、麵包粒同凱撒醬。配埋生菜、牛油果同大蝦攪拌,盡情享受高級西餐廳嘅待遇。 


歐洲藍青口配泰式紅咖喱汁蒜蓉包 
青口配秘製泰式咖喱味道出奇地夾,微辣酸甜嘅紅咖喱唔單止令人食慾大增,仲做到提鮮嘅作用,藍青口鮮甜嫩滑,海鮮味濃。鍾意試新嘢嘅朋友,萬萬唔好錯過!

 

烤美國野雞配印尼甜汁南瓜珍珠粉  
雞肉緊緻滑溜,雞味濃郁,淋上秘製印尼豉油,雞油豉油同時衝擊舌尖上嘅享受。底下嘅珍珠米吸收咗上層嘅薑蓉同雞油,鮮味十足。  


泰國香茅燴歐洲和牛尾配農夫包 
和牛尾經慢煮24小時,牛肉變得比炆、燴更入味同軟熟,入口即溶。農夫包外脆內軟,而且索晒和牛味,一啲都唔輸蝕!


寶雲酥焗西班牙伊比利亞羊排骨

羊肉柔軟到一撕就從骨頭上脫落,而且羊騷味一啲都唔難頂,有唔少頂唔順羊騷味嘅朋友都鍾意食。再塗上由巴椒粉、蜜糖、小茴香同檸檬汁製成嘅醬汁,十分滋味。



Le Viet(旺角)        

來自柬埔寨嘅老闆不甘於同其他越南餐廳一樣傳統保守,無論係裝潢定菜式上都走多元化風格。大大嘅霓虹燈招牌同顏色豐富嘅設計,令餐廳充滿時代感。菜式就以西越合璧為主,老闆仲創新到將傳統嘅越南酸辣湯打造成酸辣海鮮鍋。想食到性價比高嘅特色越南菜,不妨同同事朋友試試。 

滿瀉椰青飯  
必點嘅有呢款超載椰青焗飯,滿瀉嘅椰青飯同椰汁,配上蝦、蜆、魷魚同雜豆,超足料。鍾意椰子嘅朋友,千祈唔好錯過!


越式酸辣海鮮鍋 
同泰式酸辣唔同,呢款酸辣鍋嘅酸甜味來自菠蘿同番茄,所以特別清新,仲可以當湯飲。辣就唔算辣,但入眼食材非常豐富,蜆、手掌大嘅虎蝦、魷魚樣樣有齊。 


豬頸肉撈檬 
想食啲酸嘅嘢開下胃?呢碗豬頸肉撈檬唔單止大大碗,性價比高,豬頸肉嘅賣相仲好吸引,而且燒過外皮,脆卜卜又香口。


鮮蝦米紙卷
米紙外皮晶瑩剔透,薄而不失煙靭,口感一流。餡料亦份量十足,有生菜、蘿蔔絲、粉絲同最重要嘅鮮蝦。蘸上酸辣汁,微酸嘅醬汁更突顯米紙卷嘅清新芳香。 


甜品拼盤
甜品拼盤分別有用綠豆蓉同椰子糕搭成嘅越南拉椰糕、香濃口感煙靭嘅新鮮芒果糯米飯同清甜幼滑焦糖燉蛋。一盤吃盡三種不同滋味和口感! 



心動不如行動!有興趣就快啲約埋三五知己去嘆下美食啦!快啲bookmark定啦!

*以上圖片只供參考,所有食品以實物為準. 食品供應因餐廳而異


相、文:Vivian



關鍵字
多國菜
咖啡店
餐吧
高質
浪漫
聊天
越南菜
甜品
打卡
特色
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
本月熱門
情人節去K11 MUSEA 一文睇晒浪漫餐廳
2020-02-06
【隨時更新】零食速報 每周新款零食、酒品點評
2天前
全城抗炎 與醫護同行!提供醫護餐飲免費優惠餐廳一覽
2020-01-31
全城抗炎!衛生保障 推行防疫措施餐廳一覽
2020-02-07
美國人氣肉桂卷抵港!煙韌原味/朱古力/焦糖胡桃卷(有片)
2020-02-06