留港食盡環球特色心機菜
2020-11-16

大家今年多咗好多時間留喺香港,既然冇得飛,於是就轉而玩本地遊,發掘香港嘅秘景同埋美食。發掘多了,就會發現原來呢個細細嘅地方,係有好多好嘢架!就好似今次同大家介紹嘅兩間餐廳咁,無論係時令日本菜,定係罕見中東菜,主理嘅師傅都係默默耕耘咗超過廿年,經驗豐富,而且對食材處理都非常講究。

八瀧 (尖沙咀) 

要喺香港搵到間接近日本味道嘅餐廳,其實唔難。尖沙咀有間樓上嘅Omakasa日本料理餐廳,食材由日本空運到港,不時不食,所以就算你今個月同下個月去食返同一個餐,入面嘅前菜或者刺身甚至燒物,可能都已經唔同咗咯。

八瀧海膽杯

海膽杯幾時都係最能吸引眼球嘅菜式,呢度嘅海膽杯,唔係一味得個多字,更加有心思兩個字。只要細心一睇,唔難發現係用咗兩款唔同嘅海膽,無論顏色定係質感方面都有明顯嘅分別,一款橙啲腍身啲,一款金黃啲綿啲,食落嘅甜甘度亦有唔同。師傅特意用黃膽紫膽兩款海膽,就係希望成件事感覺更豐富,可以試到多啲唔同嘅日本美食。另外仲有三文魚子吊出更多鮮味,而五色米通增加口感之餘,亦有祝福、幸運嘅意思,食完都真係有種幸福感。


麵豉燒白鯖河豚、炸虎河豚魚鮫

每年嘅10月、11月起,就係河豚(a.k.a 雞泡魚)嘅當造時期,呢種珍貴嘅日本海產唔係周圍都有得食。呢道燒物,仲有兩種河豚添啊!白鯖河豚本身味道較清淡,就以麵豉醬燒香,啖啖肉都帶有鹹香;而虎河豚鮫炸完之後,煙韌得嚟仲好脆口,好有嚼勁,值得一試。


前菜

河豚珍貴在於全身幾乎每個部位都可以食,而且每年得呢幾個月先可以食到,當然要盡用其身啦。魚鮫、魚身拎咗去做燒物,魚皮就用嚟做前菜。虎河豚皮煙煙韌韌,混埋寒天一齊嚟做沙律,就有豐富嘅骨膠原啦!拼盤中另外仲有帶子兩食,除咗牛油北海道帶子外,亦有燒雞泡魚帶子,各有特色。


極上晚膳

如果真係好想捉緊食河豚嘅機會,推介大家可以試下成個極上晚膳set,包晒頭先介紹過嘅沙律、前菜、海膽杯同燒物,另外仲有刺身、吸物、同自家製甜品。呢個set嘅餐單會按時令更換,呢期當然就係河豚主題啦,刺身五點中,大拖羅同牡丹蝦長期都有嘅,前者入口即溶,後者啖啖鮮爽,而家仲有機會食到煙韌嘅虎河豚刺身添。吸物繼續善用河豚嘅body,係清甜嘅雞泡魚虎河豚湯啊。甜品就冇河豚喇,不過有秋冬天最受歡迎嘅燒栗子同紫薯布甸。


新潟土鍋飯

蟹肉蟹膏呢個陣容本身已經冇得輸,仲要可以追加海膽,令到呢個土鍋飯變得非常吸睛同豐富,膏香濃郁香甜,連帶每粒飯粒都係帶有甜香。師傅更巧妙地混入甜薯喺飯中,令到每啖都甜上加甜。

 

Lamees (土瓜灣) 

講起地中海菜式,好多人第一時間通常都會諗起鷹咀豆,或者係好多香料等等,但就好少機會品嚐過。今年冇得點旅行,就喺香港出發,走入土瓜灣,去搵一搵傳說中嘅地中海味道啦。餐廳由曾經喺多間酒店做過嘅約旦籍嘅大廚主理,菜式當然夠正宗、夠地道啦。

Octopus El Batata (八爪魚沙律)

簡單幾樣材料:西班牙八爪魚、薯仔粒、紅洋蔥絲同芫荽,經大廚Chef Tarek巧手一揮,就變成一道色彩繽紛、顏值甚高嘅前菜沙律。八爪魚係一樣幾蝦人煮嘅嘢食,好容易過韌或太腍,但呢度就剛剛好,爽爽地口有啲嚼勁。


西班牙伊比利亞羊肋骨伴莎莎醬

識食之人一定會知道,西班牙嘅伊比利亞羊出名肉嫩多汁,而且羶味較淡。大廚先將羊肋骨以中東香料腌製,再放入焗爐烤製,上枱時香味四溢。外層香脆,內裡肉質依然爽嫩柔軟,juicy得嚟又唔羶,平時怕羊羶嘅朋友仔都可以試下。點埋自家以新鮮蕃茄、芫荽等調製嘅莎莎醬,又回返一重清新嘅感覺,中和鹹度。


炭燒鱸魚配蕃茄芫荽醬

Chef Tarek非常注重食材嘅新鮮同來源,為咗帶嚟更貼近家鄉嘅味道,特意挑選由紅海附近捕獲嘅海魚,直接運送到港。加入檸檬、蒜頭、橄欖油等燒製,面層有微微炭香,脆脆地,肉質軟滑,頗有驚喜。


海蝦球伴香辣黃薑熏飯

呢道菜嘅海蝦都係喺約旦附近海域捕獲嘅,米粒亦選用中東米,較平時食開嘅米長身啲,口感硬身少少、乾爽少少,粒粒分明。伴入嘅黃薑適當地發揮微辣作用,加埋多種香料,令到整體都充滿住中東嘅風味。


自家製漢堡伴薯條

漢堡有兩款,一款牛一款羊,都係採用天然、無激素,仲經過自家熟成嘅肉製成漢堡,厚墩墩又夠juicy。成個漢堡都幾有份量架,軟熟嘅麵包夾住生菜、蕃茄、車打芝士、洋蔥等,淋上燒烤醬同中東香料,疊到高一高。一啖咬落去,嗯,係滿足感。


心動不如行動!有興趣就快啲約埋三五知己去嘆下美食!快啲bookmark定啦!

*以上圖片只供參考,所有食品以實物為準. 食品供應因餐廳而異


關鍵字
大廚招牌菜
日本菜
中東菜
土瓜灣
尖沙咀
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
本月熱門
【2020回顧】海外超人氣過江龍抵港一覽
2020-12-28
西營盤新開台式Cafe 推介即煎鐵板吐司/芋圓仙草/黑糖奶蓋茶
2020-12-28
【牛年新春】盆滿砵滿 早鳥優惠盆菜推介
5天前
12月份好評餐廳十強
2021-01-05
觀塘海濱旁新開Cafe 必試「2019」咖啡+Tiramisu窩夫
7天前