由台北開到香港 銅鑼灣玩味樓上Cafe(有片)
2018-06-15

唔少香港人鍾意週末飛台灣快閃遊,就係鍾意當地生活節奏慢啲可以放鬆下,但而家去銅鑼灣都搵到呢份悠閒感啦。呢間Cafe由台北小巨蛋開到嚟香港銅鑼灣,保留唔少特色食品,好似蒲燒鰻魚蛋包飯、天然紫薯蛋糕等等。再飲返杯雞尾酒或者咖啡,想Chill返下無難度吖。
 


MAMADAY由兩位香港人開設,之前因緣巧合下喺台北小巨蛋捷運站附近開咗第一間店,今年返到嚟銅鑼灣開分店。MAMADAY係廣東話「麻麻地」嘅諧音,因為當時台北店未準備妥當就試業,反正未有心水店名,就乾脆叫麻麻地啦。而香港店店主亦希望大家唔好期望太高咁話。
 



求求其其蒲燒鰻魚蛋包飯(原條 $140)

好似呢個蛋包飯個名就寫求求其其,但其實上到枱就發現又無想象中咁求其吖。原本$112/份,加$28可以升級做原條鰻魚,所以視覺效果相當唔錯。本地雞蛋加牛奶炒成滑蛋,加上飯用醬汁炒過,相當香口。略嫌鰻魚醬汁有少少過鹹,不過鰻魚肉幾彈牙,補返數啦。
 



蕎麥麵配魚露、有啲沙律菜咁囉…(肩胛肉眼牛 $138)

Brunch賣相有啲似All Day Breakfast,相當豐富。不過呢度配嘅係香港有記粉麵廠本地製造嘅日本蕎麥麵而唔係多士,配埋鰹魚乾一齊食頗香口。肉眼牛點少少泰式醬汁更開胃,沙律同其他配菜亦唔錯。
 


脆炸薯條(明太子)(小 $38)

知道大家鍾意食香口嘢,呢度唔少小食都係惹味炸物。炸薯條有原味、明太子同芝士粉三款口味選擇。薯條炸至金黃香脆,加上惹味明太子醬,真係會令人忍唔住一條接一條咁食哂。
 


肉桂咖啡($48)

呢度飲品選擇亦相當多元化,由雞尾酒、咖啡、茶、冰沙等等應有盡有。熱咖啡仲會用懷舊杯奉上,加埋拉花真係記得把握時間相機飲先。肉桂咖啡聞起嚟已經有非常香甜嘅烤肉桂味,飲落反而無想象中咁甜,而係由咖啡嘅烘焙香主導,都幾特別。
 

更多【新店直擊】:
1. 北海道人氣味噌拉麵抵港 旺角新Food Court登場
2. 鐵板燒都有得自己燒!全港首間自製鐵板燒餐廳
3. 獨家阿薩姆奶茶雪糕!百味堂Pop-up登陸銅鑼灣

 


焦糖脆脆咖啡冰沙($48)

鍾意飲甜飲嘅話,就可以點呢杯焦糖咖啡,上面鋪滿焦糖脆脆,令咖啡冰沙增添甜香,平衡唔錯。唯一有少少扣分嘅係焦糖脆脆食完有少少癡牙呢。
 


青檸蜂蜜梳打($42)

賣相超加分,因為梳打水加咗蝶豆花,加埋青檸蜂蜜搞勻就會慢慢變成淡紫色。飲落有蜂蜜淡淡甜香,加埋梳打水氣泡口感,非常清新。
 



紫薯蛋糕($38)

最後當然係甜品時間!紫薯蛋糕寫到明只用天然紫薯,因為想大家品嘗到嘅係紫薯嘅天然甜味而唔係人工甜味吖嘛。而下面芝士蛋糕用嘅係Cream Cheese,所以有軟滑口感之餘,又唔會搶走紫薯香。黑色嘅係加咗食用竹炭粉嘅糖水,覺得唔夠甜嘅話就可以點少少喇。
 



雖然店名叫麻麻地,但其實食完就知餐廳都落咗唔少心機,加上牆身有唔少搞笑句子,裝飾又幾別緻,絕對唔係麻麻地㗎。
 









MAMADAY
銅鑼灣霎西街28號必發大廈1樓




文、相、片:Cathy

關鍵字
銅鑼灣
Cafe
MAMADAY
鰻魚蛋包飯
肉桂咖啡
紫薯蛋糕
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
兩位台灣媽媽返嚟啦!吃什麼中環新店直擊(有片)
2018-08-25
8月份好評餐廳十強
2018-09-06
4cm厚班戟+招牌刨冰抵港!京都人氣甜品銅鑼灣店直擊(有片)
2018-09-12
日本人氣大阪燒登陸旺角!席前炮製足料大阪燒+廣島燒(有片)
2018-08-30
一年容易又中秋 流心、特色新款月餅巡禮(有片)
2018-09-11