生煎皇后初登場!主打招牌皇后湯麵五色水餃
2018-05-04

一班單身友相信都幾葡萄呢對生煎皇夫妻,平日喺社交媒體、節目度已經不斷放閃,而家仲開埋舖頭,想避都避不開,唯有戴對黑超入去幫襯啦!無錯,生煎皇后江若琳開麵館呀喂,舖頭唔少得兩公婆坐陣,咁究竟有咩食呢?快啲睇下先!

整間舖頭由舖位、裝修、設計、傢俬、餐牌、試菜等工序,生煎皇后Elaine不會假手於人,親力親為。採訪當日,開飯仔見到Elaine不時落單、追單、調配飲品、與食客影相傾偈等等,忙個不停。

至於食物呢,首先介紹嘅當然係店子皇牌──招牌皇后湯麵($60),一上枱就覺得湯麵有好多配料:花膠、香橙豬軟骨、秋葵、冬菇、蓮藕及雲耳,好豐富。生煎皇后Elaine就話,其實呢個湯麵集合晒佢鍾意嘅食材而做成,所以配搭較為創新。

花膠(左)係女生必愛嘅食材,養顏又滋補,見到花膠嘅出現認真大加分。花膠煮得好軟腍,而且無乜腥味,食落骨膠感重,正!而香橙豬軟骨(右)呢個新穎配搭,其實係來自大廚肥龍,因為豬軟骨好夠油香,而且又有軟骨嘅嚼頭,但食多幾件就好快覺膩,所以大廚特別以橙酒煮汁,而且上面亦灑咗少許橙皮,口感清新啲,亦可減輕豬軟骨嘅油膩感。

湯麵所用嘅湯底係用雞腳、豬骨、豬皮、黃豆等材料去熬製,並熬足足超過20個鐘頭,令湯料精華完全流入湯底之中,味道濃郁。

火焰芝士吉列豬扒湯麵($50)除咗跟麵質滑溜嘅上海麵,仲有好有「芝」香嘅火焰芝士吉列豬扒。喺炸得邪惡嘅吉列豬扒上面再加一塊同樣邪惡嘅芝士,仲用火鎗去燒,不得了。

吉列豬扒(左)好鬆脆,配埋幼滑又夠香嘅芝士,層次豐富;上海麵條(右)由工場手打而成,再運抵到店。除咗上海湯麵,客人亦可選擇菠菜麵或讚岐烏冬架!

較為少見嘅招牌炸鍋貼,將鍋貼外層炸至脆卜卜,而入面嘅豬肉、椰菜餡依然濕潤,椰菜食落更爽口。如果配以沙律醬同食,味道更佳,價錢為$30/4隻。

每日限量供應嘅招牌五色水餃($48),即叫即包,再即煮約8分鐘完成。但唔好誤會,顏色並非化學物造成,而係用紅菜頭、墨魚汁、菠菜汁及蛋汁,上枱時好似五星戰隊咁出場,顏色好搶眼。

至於咩色係咩味?由左數起,橙色有蝦肉芝士餡、黑色有黑松露豬肉餡、白色原味豬肉餡、綠色有素菜、小棠菜及冬菇粒、黃色有冬菇絲、木耳絲及筍絲。開飯仔好鍾意橙色、黃色水餃,蝦肉芝士餡好惹味,蝦肉亦夠彈牙;而冬菇絲、木耳絲及筍絲好爽口,食落好清新,亦好有嚼頭。

口水雞拌麵($52)好有四川味道,以麻辣醬、花椒油、蒜蓉、蔥等煮成醬汁,然後淋喺滑雞上,味道辛而不辣,彈牙又掛湯嘅麵條尤其出色。


更多【新店直擊】:
1. 7/5起試業!天天海南雞飯新增和牛手卷賽螃蟹等小菜
2. 只做午市兼教班!90後藍帶女生開觀塘甜品cafe
3. 蓮香棧荃灣店開業 多款懷舊點心菜式 保留手推車仔文化

的的骰骰嘅榛子醬炸小饅頭($35),用嚟沾煉奶或榛子醬嚟食都非常滋味,更深得小朋友歡心,絕對可以令佢哋乖乖哋、坐定定食嘢!

麻辣蟲草花($32)係一道好開胃嘅涼拌小菜,入面有蟲草花、金苕絲、青瓜絲等配料,而調味嘅秘製麻辣醬更是由生煎皇Oscar爸爸親自炒香架,正!

嗜辣之人如果嫌唔夠辣,大可以隨意添加放喺枱上嘅麻辣醬及菜脯增加味道。

飲品方面,除咗一般汽水、咖啡或茶,亦有幾款黑糖珍珠奶茶、豆漿、柚子茶、花茶等選擇。開飯仔推介黑糖珍珠低糖豆漿($22/凍),製作簡單之餘,味道亦不太甜,豆漿亦見豆香,不太起渣,珍珠亦幾有咬口。



正宗上海生煎皇后麵館
地址:深水埗福榮街64號地舖


文:Joy























關鍵字
上海麵
生煎皇后麵館
生煎皇
深水埗
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
情人節去K11 MUSEA 一文睇晒浪漫餐廳
2020-02-06
【隨時更新】零食速報 每周新款零食、酒品點評
5天前
全城抗炎 與醫護同行!提供醫護餐飲免費優惠餐廳一覽
2020-01-31
美國人氣肉桂卷抵港!煙韌原味/朱古力/焦糖胡桃卷(有片)
2020-02-06
全城抗炎!60間餐廳推$0-$25酒精搓手液換購計劃
2020-02-12