牛魔王福音!A5和牛火鍋放題 尖沙咀新店120分鐘任食
2022-09-01

A5和牛都有得放題?牛魔王可要瘋了啦!尖沙咀最近新開咗一間嚟自日本嘅火鍋店,以自家培育嘅黑樺牛為主要食材,120分鐘嘅火鍋放題套餐內,就可以任食各個唔同部位嘅A5和牛啦!

 多款A5和牛,圖右為玉子後腰肉

和牛火鍋放題套餐包有8款A5熊本和牛、4款佐賀名水豚,以及多款自家製食品同麻辣小食等。8款和牛部位包括:特上霜降小排、牛小排、上肩胛肉、肩胛梅花、牛前胸、玉子後腰肉、牛頸脊同千本筋。整體嚟講嘅肉味都好香濃嘅,

 (左)特上霜降小排、(右)上肩胛肉

如果偏愛油花嘅朋友,建議可多點特上霜降小排同上肩胛肉;而鍾意有啲嚼感咬下咬下嘅話,千本筋則應該係你哋嘅選擇。特別提一下玉子後腰肉,淥之前先將生雞蛋打發,撈勻每片牛肉再浸湯淥,既可提升牛肉鮮味,亦令肉質變得更滑身。

 醉玫瑰五花肉

名水豚肉喺高山牧場飼養,脂肪分佈較平均,打邊爐食就最啱。4款選擇分別有原味同醉玫瑰味嘅五花肉同梅花肉。醉玫瑰嗰2款比想像中清香,玫瑰嘅香味喺淥完後依然突出,值得一試。

 (左)花雕日本薩摩雞藥膳鍋、(右)台灣麻辣火山鍋

至於湯底方面,則有辣有唔辣。追求刺激感嘅可選台灣麻辣火山鍋或火焰麻辣雞煲,兩款都喺上台時,由侍應點火,視覺滿足感有10分!辣就夠辣嘅,不過層次略為單調咗少少,爭咗少少麻香感覺。

 北海道豆乳玫瑰拉絲芝士鍋

而想養生健康嘅朋友仔,可以揀花雕日本薩摩雞藥膳鍋,或者北海道豆乳玫瑰拉絲芝士鍋。前者加入黨參、當歸等合共6種藥材熬製,藥膳味道極其濃郁帶甘澀;後者絕對係打卡首選,放入食材前更可先試一下以鏗魚湯熬嘅湯底,清淡微甜,用嚟淥菜蔬類幾合適,不過可惜係冇拉絲效果嘅。

打卡精選何止湯底,仲有呢個好似下午茶咁嘅雀籠三層架。三層分別放有和牛、名水豚肉同兩款自家製、爽口彈牙嘅手打丸。

另外,如果想加碼食埋海鮮嘅都冇問題,可以加錢升級點海鮮拼盤,日本直送牡蠣同北海道大元貝都係任食!以鐵板上枱,即席開火槍點火,視覺效果十足,記得準備好手機~

 麻辣系列小食,店主以自家陳年秘製滷水汁加麻辣汁製作。



黑樺牛
地址: 尖沙咀堪富利士道6-6A號爵寓1樓



文、相:Kar


關鍵字
尖沙咀
和牛
放題
任食
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
【2022生日優惠】持續更新!11月壽星嘆免費拉麵+海邊BBQ
2022-11-01
【隨時更新】零食速報 每周新款零食、酒品點評
6天前
5間港式火鍋放題店推介 無限時任食/澎湃海鮮拼盤/復古裝修
2022-11-07
香港8大叉燒推介!柴灣人氣炭香叉燒、大圍勾魂叉
2022-11-08
神還原韓國復古大排檔!大角咀新打卡餐廳 必點招牌醬油蟹醬油蝦
2022-11-17