講到今年最紅嘅火鍋店，莫過於呢間一年就開咗四間店嘅牛大人台灣火鍋吃到飽！最近餐廳仲踩過界，同一班底於旺角開埋台灣燒肉吃到飽，除咗有超過五十款肉品及海鮮，仲有地道嘅特色台灣燒烤食物及夜市小吃，絕對可以一解大家思鄉之情。

燒肉吃到飽共有四個等級可供選擇，由平到貴分別係「原住民鹽燒豬肉吃到飽」、「安格斯嫩牛吃到飽」、「SRF 極黑牛吃到飽」及「澳洲 M5 和牛吃到飽」。想經濟實惠啲可選擇「安格斯嫩牛吃到飽」，最平$258可任食120分鐘。不過貴啲嗰兩個set性價比一樣高，最平$308及$358就可以任食SRF極黑牛霜降牛肉眼同澳洲 M5 和牛，牛魔王絕對可以回本！

澳洲 M5 和牛

澳洲 M5 和牛肉質幼嫩細滑，油脂分佈平均。總廚會定時搜羅唔同嘅部位，本月之星就係澳洲 M5 和牛肩胛肉，肉質軟腍油脂豐富，仲有牛香！柔軟中又帶啲咬勁，輕輕灑上岩鹽食就最可以突出到牛肉味喇。

SRF極黑牛霜降牛肉眼

有Buttery Knife Beef 的之稱嘅「極黑牛」，肉質柔嫩多汁，油脂比例就高啲，牛味就相對無咁重，以大火烤至油脂融化，約五分熟的狀態下點埋大廚特別調製嘅黃金醬食，又可以一解油膩感。如果唔係太偏向牛味重嘅種類，呢個套餐就啱晒！

牛舌芯（套餐贈送，一客2件）

如果選擇澳洲 M5 和牛吃到飽，每人都可以獲贈牛舌芯兩件，肉質爽口彈牙，必試之選。

除咗以上兩款主打，安平私房牛腹肉及秘制牛肋條表現都唔錯，前者軟腍後者有肉香，值得encore！

唔想淨係食牛，豬方面推薦呢款原住民鹽燒肉，睇落好似好肥，但烤過後就將啲油分迫晒出嚟，香脆又有肉香；至於雞呢當然唔少得九層塔三杯雞，雞肉嫩滑九層塔味又幾出。

海鮮方面選擇唔係話好多，但都幾有驚喜，鯛魚下巴油分重魚肉鮮甜嫩滑；屏東燒魚腹配以蒲燒醬汁，味道香甜，有種食鰻魚嘅感覺。虎蝦都好大隻肉質爽彈，任食餐廳嚟講真係少見。

燒烤選擇方面，起司鵪鶉蛋蛋味好濃厚，加埋拉絲芝士真係好夾；絲瓜煮蜆清新又甜，烤肉中途食吓又可以解膩。

甜食方面不可錯過台灣小枕頭(麻糬)，將麻糬燒至微微發脹，好似一個枕頭咁就食得，配埋香甜嘅鍊奶食一流～

仲未完仲未完，除咗燒烤部份，呢道仲有多款台灣夜市小吃供應，如安平炸蚵卷、澎湖花枝排、黃金鮮泡菜、涼拌小黃瓜、南部章魚卷及酥炸蕃薯條，有埋滷肉飯，又真係幾有台灣風味！

而家只要LIKE餐廳FACEBOOK，就會免費送一杯胚芽珍珠添。

安平燒肉

地址: 旺角彌敦道593-601號創興廣場9樓

文: Yanica

相、片: Tom Li