爆餡腐皮壽司店中環重開!新增創意卷物+多款小食 恐龍x森林主題兩層高新店
2021-06-08

喺中環想食日本菜,最近又多一個新選擇啦。呢間主打日式腐皮壽司嘅餐廳由銅鑼灣搬過嚟Soho區,唔單止由立食店變成兩層高、以恐龍同森林為裝修主題嘅餐廳,Menu仲多咗好多選擇。無論係Lunch Time嚟食個腐皮壽司定食,定放工嚟飲杯嘢配創意卷物都得,得咗!
 


Hungry Dino新店位於中環些利街,UG層拉開玻璃店門就係廚房同立食區,想坐低慢慢食就可以上一樓,保留恐龍Logo加上森林主題裝修,加埋落地大玻璃窗,又有燈箱、霓虹燈等打卡位,感覺舒適又有玩味。
 


腐皮御饍+3切刺身定食(Lunch Set $169)

最出名嘅腐皮壽司當然有得留低,可以單點亦有套餐,好似開飯仔揀嘅呢個Lunch Set就有蟹膏三文魚子、明太子三文魚、微辣吞拿魚、黑松露帶子、明太子厚燒玉子,共五件腐皮壽司配刺身、伴菜同茶。壽司用嘅日本腐皮會先用高湯浸過,降低甜度同時可以更襯托出海鮮嘅鮮味。壽司飯就選用秋田小町米,口感軟糯。
 


蟹膏三文魚子嘅蟹膏鮮味同鹹香非常突出,加上一粒粒喺口腔裡面爆破嘅三文魚子,係令人印象最深刻嘅一款。明太子厚燒玉子當中嘅明太子鹹香辛辣,帶出玉子同腐皮嘅甜味。微辣吞拿魚同明太子三文魚調味得宜,食得出魚肉本身嘅鮮味。黑松露帶子嘅黑松露醬畀得夠爽手,香味濃郁。
 


焦糖雞蛋布甸(Lunch Set +$52,單點$62)

自家製焦糖雞蛋布甸口感Creamy偏實,勝在蛋香濃郁,配搭味道苦甜嘅焦糖醬同口感輕盈嘅忌廉,整體甜而不膩。
 


西雅圖鬼妹($128/份,$68/半份)

新店大咗之餘仲多咗唔少食物選擇,特別係卷物有好多唔同配搭!呢款西雅圖鬼妹即係火炙牛油果三文魚腩,上面大大件火炙三文魚腩肉嫩肥美,加上牛油果、芝士、青瓜等增加口感層次,豐富得嚟又唔會覺得膩。
 


德仔牛仔($84/份,$48/半份)

而德仔牛仔真身係洋風烤牛肉卷物,中間嘅安格斯肥牛肉味香濃,帶少少筋位更有咬口。配搭味道鹹甜嘅醬汁,減少肥牛嘅油膩感之餘又更惹味。
 

更多【新店直擊】:
1. 推介Shake Shake海鮮袋+梳乎厘奄列 筲箕灣新開嘉年華裝修西餐廳
2. 銅鑼灣新開「蠔」主題日本餐廳 推介招牌鐵盒清酒燒生蠔+牡蠔忌廉意粉
3. 推介濃厚芋泥山+莓莓角酪 太子新開Pantone色卡裝修Cafe

 

日式鰻魚蛋包飯($186)

原條鰻魚上枱視覺效果一流!唔單止賣相吸引,鰻魚肉亦夠厚身,加上香甜蒲燒醬汁令人食指大動。半熟雞蛋口感滑溜,不過如果可以畀多少少醬汁撈飯食就更好喇嘻嘻。
 


奶蓋白玉烏龍($52)

白玉口感軟糯,記得相機打卡後先食,如果唔係擺得太耐就有可能會變硬啦。下面係奶蓋烏龍,口感柔滑茶香突出。最抵讃嘅奶蓋面嘅餅碎增加口感層次,整體甜度又啱啱好。
 


蘋果白桃梳打($52)

夏天想消暑就可以點呢杯蘋果白桃梳打,桃味自然香甜,加上爽口嘅蘋果肉,同有氣泡感嘅梳打水,清新怡人。
 






Hungry Dino
地址:中環些利街2-4號LL Tower地舖及1樓




文、相:Cathy

關鍵字
中環
日本菜
腐皮壽司
壽司
卷物
Hungry Dino
為食龍
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
【隨時更新】零食速報 每周新款零食、酒品點評
4天前
【2021生日優惠】持續更新!6月壽星送海鮮拼盤
2021-06-01
《優秀開飯熱店大賞2021》賽果公佈
2021-05-24
5月份好評餐廳十強
2021-06-04
一秒變出 招牌十八層海膽杯 佐敦小店全新體驗 魔術X鐵板燒
2021-06-11