香港人其實好有創意，唔信？打開尖沙咀呢間樓上Fusion餐廳嘅Menu睇睇：「真天真 玻璃心 芝士凱撒怎麼區分」、「如果太多豬豬味 加啲菠蘿正到痺」唔係歌詞而係餸名嚟！令人會心微笑同時食物質素亦唔錯，主菜水準平均，有素食選擇，仲有好啱打卡嘅創意甜品呀。
 

竹青亭係太子青花亭嘅分店，特別邀請本地畫家Carol Mui手繪壁畫，加上大玻璃窗、吊燈、雲石餐桌都好啱影相打卡。店名竹青亭除咗有「竹性直，直以立身」嘅意念，同時竹青安好亦有「祝」福年「青」人嘅意思。
 

牛肝菌濃湯（$48）

一開始先嚟碗湯，牛肝菌濃湯配雜菌薄脆長法包一上枱就聞到好濃香味！皆因除咗牛肝菌，仲用上多款雜菌一齊煮，所以飲落亦咬到少少菇菌蓉嘅咬口。開飯仔建議如果鍾意法包外脆內煙韌嘅口感就將雜菌薄脆長法包同湯分開食，相反鍾意菇菌香氣嘅話就可以將湯加上去一齊食，雙倍濃郁。
 

鱈魚粟粟你好嗎（$258）

唔單止餸名趣緻，配搭亦有驚喜，呢碟其實係爆谷香草芝士牛油焗嫩滑黑鱈魚柳伴香辣粟米汁，嫩滑嘅黑鱈魚同香脆爆谷估唔到口感又幾夾！而帶少少辣同少少甜嘅香辣粟米汁就可以帶出魚肉嘅鮮甜味，再加上清甜嘅粟米、蕃茄等，營造出唔同層次但又唔會越食越膩。
 

牛油慢煮原條龍蝦尾 龍蝦原汁三角意大利麵（$328）

另一心機菜式，新鮮龍蝦尾已經起好肉，方便食到啖啖彈牙龍蝦肉！而醬汁就用咗原隻龍蝦熬製，三角形嘅意大利麵就可以沾上更多醬汁，食起嚟味道更濃郁，再加上XO醬就更香口。不過醬汁稍嫌過鹹，唔係重口味嘅朋友搵多個朋友Share食好啲喇。
 

原個南瓜是日蔬菜糙米飯（$128）

餐廳亦好貼心咁供應素食Menu，最吸引嘅就有呢款原個南瓜是日蔬菜糙米飯，真係直接用原個南瓜上枱！南瓜當中係新鮮蔬菜、雜菌同糙米飯。糙米飯含豐富膳食纖維同礦物質，而且口感較硬，同柔軟清甜嘅南瓜一齊食就啱啱好。
 

恭祝你福壽笑開個眉（$108）

睇個名係咪估唔到呢個壽桃其實係白朱古力？最有驚喜嘅係敲開層白朱古力，裡面仲有自家製茉莉花Pavlova、梨果醬同烏龍茶蛋糕！
 

茉莉花Pavlova口感似慕斯，柔滑清香；梨果醬保留一粒粒梨肉，爽口香甜；烏龍茶蛋糕亦食到少少茶葉碎，茶香同甜味平衡。外面仲有烏龍茶啫喱，甜度低而且帶少少甘味，平衡返白朱古力嘅甜膩。
 

（左）茉莉很清楚收兵好過嫁人（$54），（右）薑撞豆腐（$54）

連飲品名都好過癮，小心落Order嘅時候唔好唱咗出嚟先得。茉莉很清楚收兵好過嫁人係茉莉茶加上檸檬同無花果，所以飲落味道有啲似無咁澀又有無花果甜香嘅檸檬茶冰沙。薑撞豆腐以豆腐、薑、牛奶打成冰沙加上黃糖，味道完全還原豆腐花呀。
 

竹青亭
地址：尖沙咀金馬倫道48號中國保險大廈1樓A及B號舖

文：Cathy
相、片：Tom Li