炎夏感bye-bye!6至7月下午茶推介
2019-06-24
六、七月嘅香港真係熱到一個點。最慘嘅係打工仔冇暑假放嘛,想「全身暑假投奔初夏」都有心冇力咁……。不過唔緊要!怕熱嘅朋友但又想喺summer relax下嘅話,嘆住冷氣食個tea,都係個避暑聖方呀。

頂級泰國金枕榴槤盛宴 帝都酒店one+one café & bar 

 

 
無時間去泰國享受陽光與海灘?雖然呢個下午茶就帶唔到大家飛去泰國,但都叫做帶到「泰式」嘅Feel畀大家!用咗頂級泰國金枕榴槤設計咗一系列榴槤甜品。特濃榴槤慕絲蛋糕外型似足迷你榴槤,半熟榴槤芝士撻嘅榴槤香同芝士香超夾,榴槤燉蛋估唔到夾得嚟口感好滑!鹹點方面同樣以泰式風味為主,酸辣刺激平衡返榴槤甜品,令呢個下午茶豐富得嚟又唔會覺得膩。最後記得飲返杯特飲,特濃榴槤奶昔用榴槤加Mövenpick雲呢拿雪糕打成,香滑濃郁。

「仲夏飄香」泰式榴槤下午茶
價錢:$388 /兩位(另收加一服務費)
供應日期:6月1日至7月31日,每日供應(15:15-17:15) 

法國專櫃品牌BY TERRY聯乘 香港朗廷酒店廷廊 
今次嘅下午茶就首次同法國專櫃品牌BY TERRY合作,以品牌全新夏日Glow-in-Rose系列產品為靈感,推出呢個氣質粉紅玫瑰afternoon tea。相信呢個牌子嘅fans一見到呢啲甜品嘅外型,實知道用咗邊件product做原型啦~仲要全部嘢食都係粉色Tone,最靚嘅一定係嗰件The Hidden Pearl,貝殼造型馬卡龍夢幻獨特,仲有銀色白朱古力珍珠喺入面!惠顧下午茶嘅客人可獲禮券乙張,到品牌指定三個專櫃換領限量版化妝袋一個同潤唇唇彩旅行裝一支。

亮麗玫瑰下午茶
價錢:$ 368 /位, $ 628 /兩位(另收加一服務費)
供應日期:6月1日至7月31日,逢星期一至五(15:00-17:30),逢周末及公眾假期(14:15-16:15及16:30-18:30)

英倫經典時尚Phase Eight聯乘 馬哥孛羅香港酒店大堂酒廊
為咗慶祝英國女裝品牌Phase Eight成立40週年而設嘅精緻下午茶。品牌走優雅古典同時尚路線,所以下午茶嘅甜食、鹹點都特別用咗唔少英倫風嘅元素去呈現。例如英國淑女必備-禮帽嘅朱古力伯爵茶慕絲同有連身裙裝飾嘅紅桑子cupcake咁,全部餐點都化身咗做fashion items,嘆緊呢個下午茶就好似去咗轉舖頭睇衫咁!凡惠顧下午茶嘅客人可獲贈港幣100元優惠券一張,喺品牌嘅香港店購物享受優惠,首150位客人更可獲贈品牌精美鏡子!

英式衣櫥下午茶
價錢:$ 368 /位, $ 488 /兩位(另收加一服務費)
供應日期:即日起至8月31日,每日供應(15:00-17:30)

優雅玫瑰金下午茶 中環・石板街酒店Gradini Ristorante Italiano

玫瑰金控要特別注意啦!今次,餐廳就同咗英國高級珠寶品牌 Annoushka合作,推出由「Dream Catcher 捕夢網」限量版 18K 玫瑰金首飾系列為靈感而設計嘅下午茶。下午茶嘅餐點同品牌首飾嘅整體色調非常夾,特別係一眾甜品同朱古力嘅色Tone,都畀人有種淡雅嘅感覺。而講到最吸引嘅鹹點一定係「鵝肝慕絲脆脆筒」,拎上手係咪勁似雪糕呢~惠顧下午茶更可獲贈$2,000 Annoushka禮券!數量有限,送完即止。

捕夢仙園下午茶
價錢:$238 /位(另收加一服務費)
供應日期:即日起至7月31日,每日供應(15:00-17:30)

邊打卡邊欣賞藝術設計 英皇駿景酒店Monkey Cafe 
Monkey Café特別設計咗8大打卡位,仲有埋靚靚嘅戶外花園位置,唔止畀你盡情影完放上網呃Like,仲順便考埋你點樣喺呢啲由酒店精心佈置嘅藝術設計入面影出屬於自己嘅style同創意~Btw影景之外,仲有唔少吸睛港式下午茶等你影埋添!包括泡泡雞蛋仔雪糕、格仔餅雪糕,全新造型同口感都係出面冇㗎!外脆內軟嘅雞蛋仔配上冰凍嘅雪糕,勁消暑嘅呢~

甜心下午茶
供應日期:即日起至8月,每日供應(14:30-17:00)

殿堂級美白盛宴 香港洲際酒店大堂酒廊
對美白有追求嘅女士們實聽過呢個日本殿堂級品牌:POLA!呢個品牌仲係首次同酒店聯乘,設計出以「淨白、通透」為題嘅下午茶。當中嘅茶點口味都比較清新,例如用青檸、荔枝、紅莓等製作咗嘅一系列蛋糕甜點,而鹹點最Fresh嘅就一定係蟹肉伴菠蘿配柚子醬!食之前記得同個下午茶影返輯相先啊~因為除咗茶點之外,今次POLA更特別設計同訂製呢個動力學藝術茶點架,勁有品牌標誌性㗎。而每位享用下午茶嘅客人均可獲得品牌「能量美白」體驗套裝!

美的承諾下午茶
價錢:$688 /兩位(另收加一服務費)
供應日期:6月24日至7月31日,星期一至五(14:30-18:00),星期六、日及公眾假期(13:30-18:00)

炎夏消暑芒果宴 Mirage Bar & Restaurant
講到夏天必食嘅生果,芒果一定係你個list入面嘅~今次嘅芒果主題下午茶又點止芒果布甸呢啲行貨咁簡單!餐廳就特別設計咗一系列嘅特色芒果甜品,有層次豐富嘅芒果乳酪蛋糕、香脆嘅夏威夷果仁芒果撻、芒果熱情果馬卡龍等。芒果主題鹹點仲夠晒特別,就好似有芒果凍湯,青芒沙律咁,食完暑氣全消!而且喺7月2號至9月30號期間(9月14號除外),每日嘅首80位客人可憑指定信用卡享受半價優惠;每日第81位客人起憑指定信用卡亦可享買3送1優惠!不過要預先訂座,詳情請向餐廳查詢。

芒果狂熱夏日下午茶
價錢:星期一至五$198/位,星期六、日或公眾假期$218/位(另收加一服務費)
供應日期:即日起至9月30日,每日供應(15:00-17:30)

文:Yanny

關鍵字
下午茶
榴槤
玫瑰
芒果
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
【隨時更新】便利店尋寶 每周新品速報
2019-07-10
炎夏感bye-bye!6至7月下午茶推介
2019-06-24
美食荒漠不再 馬鞍山8間新餐廳推介
2019-07-02
6月份好評餐廳十強
2019-07-04
盛夏Take個break 7-8月下午茶推介
2019-07-16