潮食亞洲風味 玩味概念餐飲體驗
2021-01-07

亞洲菜一向不乏捧場客,而今次要介紹嘅兩間餐廳,都係揉合地道傳統同創新元素,食都食得有玩味,主力吸引後生仔巿場。

十三少酸菜魚(香港仔大角咀) 

有別於一般嘅中菜館或川菜餐廳,十三少酸菜魚走得比較前,除咗邀請香港著名漫畫家曹志豪為店舖設計主題卡通外,喺裝修或餐具等設計方面亦充滿玩味,融入年輕人嘅世界。例如,用花生做筷子托,仲會送上咖啡玉米豆做餐前小食。

十三少酸菜魚

酸菜魚當然係重頭戲,分有普通版同勁量版,分別適合1-2人或3-4人享用,勁量版嗰款隻碟仲有成18吋直徑咁長,夠晒氣勢!師傅選用新鮮鱸魚,每日親自去骨、起魚片同處理,使用秘製材料醃味,更特別加入啤酒提鮮,又拌入蛋白,令到魚肉啖啖都係咁滑口。湯底則用起片後嘅鱸魚骨熬煮兩個鐘而成,仲加入十幾種香料同辣椒一齊煮,又鮮又辣。就連酸菜亦有兩種,四川正宗老壇酸菜同潮汕酸菜,一種酸一種爽脆,以增加口感。其餘配料包括鮮菌、萵筍、泡姜、泡蘿白片等,仲可以加寬粉,索晒湯底精華夠晒入味。


川式口水雞

川菜嘅辣香有多種唔同嘅變化,既有酸辣亦有麻辣,川式口水雞就係麻辣喇,先麻後辣,啲辣係咬咗幾啖之後慢慢、慢慢咁滲出嚟嘅,雞肉嫩滑,愈食愈刺激。


十三少麻辣香鍋 (香港仔店限定)

嗜辣嘅朋友仔仲可以挑戰下麻辣香鍋,師傅用咗成廿幾款香料、6種醬料、3種辣椒同3種香油炒成,淨係聽到個調味已經想像到層次有幾豐富,香濃惹味。鍋內有田雞、鮮蝦、雞軟骨、午餐肉、蓮藕、薯仔、萵筍、四季豆,全部都係最易索味嘅配搭。


辣子雞軟骨 (香港仔店限定)

另一樣值得一試嘅係辣子雞軟骨,望落好大碟,實際上都好大碟。見到咁多辣椒就預告咗你聽,呢碟非同小可,粒粒雞軟骨都好脆口,好重花椒味,比酸菜魚更麻更辣。


紅糖糍粑

飯後食甜品是常識吧,而食咗成餐辣嘢,最啱就係食返啲紅糖糍粑解一解辣。以糯米自製,炸至外脆內軟,再灑上一層黃豆粉,配埋秘製黑糖,煙煙韌韌又甜甜地,絕對係perfect ending。


泰.夯蝦(尖沙咀) 

以前去泰國嗰陣,好多人都會特登搵間餐廳去食流水蝦,貪得意又新鮮嘛。而家冇得飛,但香港都有得食到啊。呢間餐廳以為客人提供最新鮮的食材為宗旨,提供正宗泰國流水蝦放題,有20米長嘅蝦缸,可以即夾即燒。另外仲有好多其他海鮮選擇。

鹽燒泰國大頭蝦

大頭蝦主要生存喺淡水或淡海水水域,原産地為東南亞,含有豐富嘅鎂質、蛋白同鈣質,對保護心血管系統好有幫助。食客喺蝦缸度夾咗啲新鮮生猛嘅大頭蝦上嚟之後,隨即就可以燒嚟食。建議喺燒之前,沾一沾中粗鹽,咁就可以帶出到佢嘅鹹香味。一路燒,啲蝦黃仲會一路滲出嚟添。


A5宮崎和牛

牛魔王對於宮崎牛都趨之若鶩,冇計啦,呢隻牛連續三屆喺全日本嘅和牛賽到拎第一喎,肉質固然有保證。燒宮崎牛有少少技巧嘅,爐要用高溫,喺爐上面翻幾次,見到啲油份仲喺度跳跳下就得,千祈唔好燒太耐呀。燒完之後等完全靜止10-15秒先至加少少鹽就最香口喇。宮崎和牛口感緊緻滑順,霜降分佈均勻,脂肪豐富,清爽而不膩。


湛江生蠔

生蠔係湛江最出名嘅海鮮之一,餐廳選用嘅生蠔,喺湛江無污染嘅原生態海域中生長,絕無人工投料養殖。隻隻都鮮嫩肥美,口感又爽又滑。燒生蠔其實唔難,先燒比較平坦嘅一面,幾分鐘後就翻轉再燒。見到蠔殼微微開口之後,可以用夾打開,將有蠔肉嗰面再燒多幾分鐘就食得。沾埋餐廳自家製嘅泰式酸辣汁,一啖放入口,鮮味立即爆發出嚟。


美國頂級牛

餐廳挑選嘅呢款美國牛,只係食穀物玉米同營養素大,以圈養方式飼養,運動少,脂肪分佈較平均。餐廳特意從中選出6個最適合燒烤嘅稀少部位,包括牛板腱、封門柳、牛五花、肩胛翼板、肩胛三角肥牛同降霜一口牛,以高溫燒嘅方式快速控制佢哋嘅熟成度,外層會有少少起焦嘅香味,內裡肉質依然幼嫩,肉味香濃。


泰國正宗船麵

泰國船麵源自泰國水上市場,係一款好地道嘅泰式美食。餐廳以大量芫荽、玉桂、八角、胡椒、香茅、豬骨同豬紅熬製湯底,色澤深沉。加入豬肉片、泰國豬肉丸、泰國牛丸同各款菜類等配料,連埋多種泰式香料,層次變化豐富。金邊粉仲可以索晒湯汁嘅精華,啖啖濃香。


心動不如行動!有興趣就快啲約埋三五知己去嘆下美食!快啲bookmark定啦!

*以上圖片只供參考,所有食品以實物為準. 食品供應因餐廳而異




關鍵字
尖沙咀
大角咀
香港仔
大廚招牌菜
泰國菜
四川菜
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
本月熱門
【隨時更新】零食速報 每周新款零食、酒品點評
2020-12-22
【2020聖誕】休閒打卡 堂食外賣均有選擇 聖誕下午茶推介
2020-12-23
【外賣自取】聖誕大餐優惠 $148聖誕二人餐、指定食品36折
2020-12-21
【2020回顧】咖啡地圖!新開Cafe一覽 精品咖啡/寵物友善/異國風
2020-12-22
大阪人氣天然Shokupan專門店登陸尖沙咀 鬆軟Shokupan +15款手工製果醬
2020-12-21