潮食中菜 味蕾大滿足
2021-03-23

中菜文化博大精深,各派各系都有唔同嘅特色,好似川菜咁就多以麻辣鮮香為主,而潮州菜嘅烹調方式則多變,重視工序同選材。今次就為大家介紹兩間自家風格突出嘅川、潮餐廳,品嚐坊間少見嘅味道。

紅堂   (銅鑼灣)  

裝修型格,紅黑主題,紅堂有別於一般嘅火鍋店設計,環境舒服乾爽。餐牌上嘅食物亦見心思,有好多都係要手工製,或者經過師傅精心創作而成,唔係坊間一般食開嘅配料。最近逢星期一至四晚,更有單點啤酒買一送一優惠添,無論係生啤定樽裝啤酒都得。

和牛牛油麻辣鍋

湯底可以話係一個火鍋嘅靈魂所在,特別推介招牌和牛牛油麻辣鍋,個麻辣膽係師傅自己炒架,用咗5至7種辣椒、廿種以上嘅香料製作,辣勁平衡得宜,唔會一味死辣,仲有陣陣麻香同沙嗲香。要特別提下嚿牛油,係加入咗和牛牛油,慢慢溶喺湯中,增加香氣之餘亦令湯底變得更滑口。火鍋本身分咗九宮格,每格受熱程度唔同,方便大家淥唔同嘅嘢食,唔怕淥完撈唔返又唔怕淥過龍。


shake shake 炸酥肉

等緊個邊爐滾嗰陣,可以食住啲小食先呀。炸酥肉係四川好興嘅小食嚟,酥脆香口。餐廳特選西班牙伊比利豬腩肉,炸完都唔太多油,肉質鬆化。本身嘅胡椒味都幾香嘅,但想再惹味啲,可以可以自行加入花椒粉同指天椒粉,用shake shake袋shake勻,增加麻辣感。


蒜泥白肉水晶包+芝士牛肉棋子

呢兩道配菜上枱時,都會有煙霧效果,要打卡嘅話就早啲準備定手機啊。蒜泥白肉本身係經典川菜,師傅就花咗啲心思將佢轉化做水晶包餡料,同樣都係選用伊比利豬肉,淥熟後水晶包晶瑩剔透,蒜味重而微辣,幾有新鮮感;芝士牛肉棋子則釀入咗芝士餡,一咬就會有澎湃嘅芝士湧出嚟,鹹香層次分明,btw睇熱啊記住。


蝦佬sushi

驟眼望真心會以為係蝦壽司啊,造型像真度極高,但千其唔好一啖就擺咗入口呀,似咋,但唔係壽司嚟架。蝦佬sushi其實係海蝦加自家手打鮮蝦滑嚟,仲加咗mozzarella芝士落去,別有一番風味。


拔絲糍粑炸彈

紅糖糍粑亦係四川名物之一,師傅發揮創意,將糍粑做到好似蒲公英嘅造型,以拔絲繞住糍粑,面層仲加咗啲士多啤梨爆炸糖,又靚又過癮,口感煙韌,一路咬又一路有啲甜脆喺度跳跳下。每客炸彈都係新鮮即製,要兩個師傅一齊做,一齊拉先得,好考功夫。


囍玥潮州酒家 (尖沙咀)  

潮州菜既考究功夫,亦講究選料,呢間位於尖沙咀嘅餐廳,就無懼繁複嘅工序,提供正宗潮州菜,仲設有VIP房,無論同屋企人定係朋友,想有個私人空間嘅,記得要提早預訂。

潮州咸雞

潮州咸雞肉嫩、鮮滑,淡淡鹹香,難得脂肪唔多,可以連埋爽滑嘅雞皮一齊食。師傅特意選用大約兩斤重嘅新鮮元朗走地雞,先用鹽醃半個鐘,等到入味後再蒸到啱啱熟,時間控制就係最大嘅功夫。正宗食法介紹返,唔需要點任何豉油或者薑蔥,咁先可以食到最原始嘅雞肉原味啊。


特式滷水拼盆

鍾意食香口滷水嘢嘅朋友,呢個拼盆啱晒,大大盆,一盆有晒鵝腸、鵝肝、鵝肉同鵝片。滷水膽陳年得愈來就愈香,而餐廳用緊嘅滷水膽就已經有成8年歷史喇,以桂皮、八角等十幾種材料製成,啲鵝腸鵝肝索晒啲汁相當入味,鵝肉(鵝背肉)口感油潤軟滑。


反沙芋

要數潮州經典嘅甜品,一定有反沙芋份,不過而家唔係太多地方可以食得到,因為功夫太繁複喇。餐廳選用口感比較粉糯嘅泰國芋頭,先走油,再加砂糖糖水同埋少少蔥油炒香,令全條芋頭都被糖包圍住,最後加埋黑白芝麻增香,食落外層酥脆,內層粉糯,好易食唔停口。


心形糖醋麵

食潮州菜梗係要食埋糖醋麵啦,仲要切開細細塊,點埋砂糖同鎮江醋一齊食先至夠正宗,味道酸酸甜甜,外面嗰層脆口帶焦香,入面嘅麵條仲係好軟嫩,口感同味道嘅層次都好豐富。呢度嘅糖醋麵仲整到成個心形咁上碟,頗有心思。師傅選用潮州伊麵,先走油,以上湯慢火炆至收汁,最後煎香。


潮州翅

上湯以老雞、唐排、火腿等熬製6至7個鐘嘅潮州翅,濃稠入味,翅針細滑。師傅教落,正宗潮州食法係會加埋少少醋同芫荽一齊食架。


心動不如行動!有興趣就快啲約埋三五知己去嘆下美食!快啲bookmark定啦!

*以上圖片只供參考,所有食品以實物為準. 食品供應因餐廳而異



關鍵字
大廚招牌菜
川菜
潮州菜
尖沙咀
銅鑼灣
火鍋
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
本月熱門
【隨時更新】零食速報 每周新款零食、酒品點評
2021-05-03
【2021生日優惠】持續更新!5月食日本直送海鮮送西班牙紅/白酒
6天前
帶媽媽味遊異國!母親節Brunch六選
2021-04-20
期間限定$1抹茶菠蘿包、$3竹炭菠蘿油 佐敦新開 2500 呎新派點心小廚
2021-04-30
荃灣新開 人氣名古屋班戟分店 首推沖繩紫薯梳乎厘班戟+班戟漢堡
2021-04-15