溫哥華過江龍 人氣法式Crepe專門店剛登陸 招牌款式搶先試(有片)
2017-09-18

香港專門做crepes嘅餐廳,唔係太多,有時慼起條筋想食都唔知去邊度搵好。前幾日有間嚟自溫哥華嘅過江龍crepes專門店新開張呀,係佢哋全亞洲第一間嘅分店嚟,甜嘅鹹嘅crepes都有得食!

餐廳暫時所有menu都會跟足溫哥華嗰邊嘅做法,連麵粉蛋漿都係由溫哥華運送過嚟,務求令大家食到最原汁原味嘅法式Pariasan Crepe。呢種crepes唔係食開嘅薄脆口感,而係有返微微嘅厚度,蛋香味濃郁撲鼻,比較煙韌。  

Crepes嚟講,有甜有鹹,其中最得人歡心嘅一定係Nutella Banana。由店方秘製蛋漿整出嚟嘅crepe上,先搽上一層Nutella,再平均咁放上切好嘅香蕉片,捲好就完成。要知道朱古力同香蕉真係最佳拍檔,要趁熱熱地咁食喎,啲nutella仲處喺微溶嘅狀態,的確好難令人抗拒。

另一款甜crepe,Strawberry cheesecake crepe,唔好畀個名嚇親,所謂嘅cheesecake,其實係士多啤梨果肉、加果醬,再加cream cheese而成嘅餡料,酸酸甜甜咁當飯後甜品食都幾開心。

至於鹹款方面,可以考慮下Crepe Francaise,crepe中間夾住嘅係鴨肉,就連crepe外面都有兩隻脾,鹹鹹香香又唔會太乾。

而Le Club就咁望落去個樣雖然平平無奇,好plain咁,但crepe不可貌相呀,一切開就知內有乾坤喇。芝士、雞肉、蕃茄、煙肉等料多到瀉,食完幾滿足。

餐廳除咗有crepes之外,都有其他鹹點嘅。例如classic burger同all day breakfast咁。先講burger,塊扒厚到一個點,仲要係安格斯牛嚟喎,肉味又濃又juicy,夾埋芝士蕃茄mayo醬,加埋搽過牛油再烘到脆脆地嘅麵包,係nice嘅。

中環區有all day breakfast嘅餐廳唔算多,有時悠悠閒想食個brunch或者夜晚唔想太heavy,食返呢個另類嘅CC Breakfast Speciale就啱晒,兩條腸仔兩塊煙肉兩隻蛋,當然唔少得crepe。

BTW,喺中環嘅餐廳好難冇酒飲嘅,其中有3款嚟自溫哥華嘅手工啤,由fresh到light到heavy嘅選擇都有Steamworks嘅Cucumber Ale幾清新,青瓜味係幾出;Jasmine IPA就花香味重啲;而即使重口少少嘅lager其實都相對算甜,因為加咗蜜糖製呀honey~~冇諗過原來crepe同酒都幾夾。

唔飲酒嘅朋友都有咖啡等選擇,但當然,唔怕肥嘅話,建議一定係揀nutella milkshake!極thick啊,Nutella唔止搽喺杯邊,blending之前都落咗兩匙㗎,再加多3球大大球嘅Movenpick 雲呢嗱同牛奶,甜度十足。


Café Crêpe
地址:中環威靈頓街15B號地舖


文、相、片:Kar


關鍵字
中環
crepe
朱古力
甜品
all day breakfast
漢堡
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
【隨時更新】零食速報 每周新款零食、酒品點評
2天前
【2021生日優惠】持續更新!7月壽星半價嘆和牛燒肉套餐
2021-07-09
【恭喜張家朗、何詩蓓】多間餐廳立即推出限時優惠一覽
4天前
投奔盛夏 7-8月份下午茶推介
2021-07-08
6月份好評餐廳十強
2021-07-06