港式小菜館推介!超有鑊氣黑椒薯仔牛柳粒、原隻菠蘿咕嚕肉
2022-11-09

鑊氣小炒呢家嘢,唔係話咁易就可以喺屋企煮到(說穿了係唔想自己煮),好在出街食飯選擇好多,想食港式小菜都唔一定要去傳統酒家,搵間小菜館都OK~今次介紹5間小菜館畀大家,每一間都有自己嘅招牌菜喔。


深水埗人氣小菜 萬發海鮮菜館

好受歡迎嘅小菜館,必叫招牌黑椒薯仔牛柳粒,首先份量超多,一大班人食就最啱。薯仔有先走油,之後加埋牛柳同蜜汁炒成,甜甜鹹鹹好好食~風沙雞都係每枱必叫,皮脆肉嫩,雞皮下唔會有太多脂肪,薄薄一片,加埋炸蒜食好惹味!

圖: charlotte lauuu


拔絲咕嚕肉 大排檔小炒

主打多款有昔日大排檔風味嘅鑊氣小炒,菜式選擇超過70款!拔絲咕嚕肉好多人都鍾意食,但要做得好唔係咁易,餐廳選用新鮮梅頭肉,即時走油,入口香脆,而且甜同酸比例啱啱好!金牌臘味粒煲仔飯未上枱已經聞到香氣,將臘腸、膶腸等臘味剁碎後連埋飯一齊煲,味道恰到好處,有濃濃臘味香又唔會過鹹。另外加入秘製豬油,飯焦唔會痴喺煲底,撈勻後反而每一啖都食到香脆嘅飯粒。

圖: ourfoodstephk


港式懷舊大排檔 愛文生

一間超地道大排檔,綠色鐵皮屋加全室外座位,好有風味,襯而家開始涼涼地去食就啱晒。款款菜式都好有鑊氣,好似椒鹽九肚魚同黑椒鐵板鹹豬手都係必食,前者外層香脆,魚肉依然好滑,點少少喼汁食好完美,送酒一流;後者超巨型,豬手炆得好腍,豬手皮亦充滿膠質,用鐵板呈上熱辣辣!如果鍾意海鮮要試埋豉椒炒蟶子,鮮甜爽口。

圖: littlefoodie00


性價比高小菜 金豪酒家

幾抵食嘅小菜館,沙薑豬手係人氣頭盤,口感爽彈帶嚼勁,配上自家製辣汁,非常惹味,食完好開胃~好味醬烤骨係人氣菜式,原隻烤骨上放咗一塊大菠蘿,選用日本黑毛豬,炆得好軟諗,配埋菠蘿食酸酸鹹鹹,好啱送飯~金沙涼瓜可以打破大家對涼瓜嘅印象,蛋黃碎嘅鹹香味中和咗涼瓜嘅苦味,愈食愈上癮!

圖: Samtong123


傳統老粵菜館 喜滿樓菜館 

供應唔少懷舊小菜嘅傳統老粵菜館,如原隻菠蘿咕嚕肉,淨係賣相已經加分!用原隻新鮮菠蘿加上炸得香脆嘅咕嚕肉,餐廳加入咗秘製酸梅醬烹調,酸香醒胃而不油膩。芝麻雞都值得一試,雞皮薄而不油,加上一層密密嘅芝麻,口感更豐富,雞肉都嫩滑,沾上秘製芝麻醬,味覺更有層次。

圖: chung51551






文: Yanica


關鍵字
港式
粵菜
小炒
小菜館
開飯專題
開飯仔為你提供各類型最新飲食情報及優惠,全面照顧你的飲食喜好。
餐廳資料
更多
收起
本月熱門
【2022生日優惠】持續更新!11月壽星嘆免費拉麵+海邊BBQ
2022-11-01
【隨時更新】零食速報 每周新款零食、酒品點評
6天前
5間港式火鍋放題店推介 無限時任食/澎湃海鮮拼盤/復古裝修
2022-11-07
香港8大叉燒推介!柴灣人氣炭香叉燒、大圍勾魂叉
2022-11-08
神還原韓國復古大排檔!大角咀新打卡餐廳 必點招牌醬油蟹醬油蝦
2022-11-17