港九新界齊哂!最Sweet甜品店特集
2017-06-06

對於唔少人嚟講,開心要食甜品,唔開心就更加要食甜品!所以無論係拍拖約會,姐妹飯局,又或者係慶祝紀念日,都不妨嚟多一Round甜品。開飯仔幫各位搵咗以下各有特色嘅甜品店,總有一間啱你心水!
 

抵食酒店級甜品  Wins Goodies


圖:shardowMsRacheLi

想喺新界食到精緻西式甜品?不妨行遠少少入到元朗,有呢間前酒店大廚開設嘅Cafe。招牌甜品香菲其實係香蕉鳥結芭菲,以食用花、綠茶蛋糕、Crumbs等伴碟,Fancy得嚟香蕉味濃郁好味。仲有一杯叫初戀,有花瓣、雜莓、士多啤梨雪糕等,酸酸甜甜唔會太膩吖嘛。
 

那些年校園主題  聰少甜品


圖:au9DavisChan7930

港式甜品唔等於老土!尖沙咀呢間甜品店係人氣聰嫂甜品嘅Young Line,唔單止裝修以校園做主題夠特別之外,連甜品選擇都較為多元化。招牌榴槤水晶珠同龍眼椰果冰當然繼續有得食,另外仲會有花心小冰,一次過試哂芒果、士多啤梨等四款西米冰。
 

文青Feel中西甜品  糖室


圖:beautysearch糖小妹

位於石硤尾南山邨冬菇亭當中,甜品有三大推介:一係流心程度啱啱好嘅心太軟,最多食客推介宇治抹茶同檸檬夾心餅口味;二係夏天消暑最啱嘅冰品,例如玫瑰荔枝冰既有粉嫩賣相而食落甜而不膩。最後係中式糖水,好似夠哂滋潤嘅桂花桃膠燉雪梨。
 

古代客棧養生糖水  227甜棧


圖:LeungChiSangpoortravellers

食甜品都可以有養生功效?太子呢間裝修十足十間古代客棧咁,主打中式花膠甜品嘅甜品店就得喇。花膠燉鮮奶蛋白夠足料,而且味道比較淡啱哂唔鐘意太甜嘅朋友仔。而自選養生花即係豆腐花再加自己鐘意嘅配料,手工芋圓地瓜圓試得過㗎。
 

更多【二人前指南】:
1. 試盡異國風情 特色外國菜館集合
2. 悠閒二人世界 抵食Semi Lunch Buffet推介
2. 打卡必去!姐妹聚會7大餐廳精選


大熱抹茶紫薯齊哂  夏雪


圖:CindyLo Housespotthefood

根據非正式統計,九成女孩子都係抹茶控或者紫薯控,所以如果一時之間諗唔到食咩甜品好嘅時候,嚟呢間兩款甜品都有齊嘅甜品店就啱哂。抹茶特盛有齊抹茶心太軟、雪糕、蕨餅、白玉等,非常豐富。外脆內軟而甜味自然嘅紫薯窩夫亦係必食推介。
 

清甜椰皇系列  甜入心


圖:ccrreami

照顧各大甜魔之餘,都要照顧下唔鐘意太甜但又想食甜品嘅朋友仔嘅。呢間甜品店嘅椰皇子系列以香滑清甜嘅椰青啫喱配椰汁為主,而配料可以揀焦糖布甸、鮮果甚至係榴槤!而且佢地嘅窩夫同心太軟都幾有水準,最重要嘅係價錢相當大眾化。
 

長龍梳乎厘班戟  I Love You Dessert Bar


圖:海綿樂樂wiwa167

想再食平啲啲?得,肯排隊就得!旺角呢間小店專賣近年人氣嘅梳乎厘班戟,因為價錢相宜而且班戟製作需時,所以大部分時間都要等差唔多半個鐘。梳乎厘班戟口感輕盈入口即溶,甜味適中有蛋香,計返CP值真係唔錯。
 

獨一無二甜品畫  ATUM Desserant


圖:VanillaBean胃食小王子

相反慶祝特別日子,唔介意花多啲錢買個特別體驗?呢間餐廳嘅Improvisation係二或三人份甜品畫,店員會用以分子料理方法炮製嘅甜品同醬料即席揮毫,過程當中仲可以互動,例如親自動手畫埋一份,同請店員寫上指定字句,肯定夠哂難忘!



文:Cathy

關鍵字
甜品
刨冰
心太軟
花膠
抹茶
紫薯
甜品畫
二人前指南
無論是情侶撐枱腳,或者閨蜜二人聚會甚至和家人二人世界都可以參考的美食指南。
餐廳資料
更多
收起
本月熱門
【隨時更新】零食速報 每周新款零食、酒品點評
2020-06-26
食豪啲啲 城中5間海鮮+肉扒父親節自助餐
2020-06-10
5月份好評餐廳十強
2020-06-05
至甜初夏 6月下午茶推介
2020-06-15
灣仔新扒房只賣$298黑安格斯牛扒套餐 任食薯條+超鬆軟肉桂牛油餐包
2020-06-11