深水埗新開馬拉茶啡廳 必試肉骨茶、奶油蝦、藍花飯
2018-12-07

鍾意食馬來西亞菜嘅朋友有口福啦!深水埗呢間新開嘅茶啡廳有餐牌選擇非常豐富,由大家食開嘅肉骨茶、蝦麵,到比較少見嘅海鮮菜式都有,飯仲有四種顏色揀!其中一位老闆係居港馬來西亞人,保證風味正宗。
 



捌哥.捌哥特色馬拉茶啡廳位於深水埗汝州街,牆上有手繪畫同馬來西亞老闆娘自己拍嘅馬來風光相。餐廳名捌哥嚟自馬拉話Bagus嘅音譯,有「好的」、「傑出的」意思,亦係餐廳嘅目標,希望成為香港一間好嘅地道馬來西亞餐廳。
 


呢度剩係飯都有四款顏色:藍色係辣死他啦藍花飯,綠色係加咗班蘭葉嘅辣死你嗎椰漿飯,黃色係黃薑飯,白色就係做辣死加多敲門飯嘅。
 


辣死他啦配咖喱魚($55)

每份辣死他啦都會配參巴醬、椰菜絲、紅洋蔥、魚餅等配料,非常豐富。馬來西亞人會先整碎鹹蛋、薯仔等比較大件嘅配料,再將所有嘢撈埋一齊食。
 


咁樣食落味道同口感都最為豐富,既有參巴醬嘅香辣、洋蔥絲嘅爽脆、鹹蛋嘅鹹香、咖喱魚嘅厚實口感對比分明但又可以融為一體,越食反而越有開胃感。
 


捌哥肉骨茶(大骨)($88)

呢度嘅肉骨茶湯底聞落非常重藥材香,味道就甜中帶甘,唔會辣亦唔會太苦,飲多幾啖仲有少少暖胃感幾易入口。有一字骨、豬手仔、三層肉、豬尾等等唔同部位任揀,開飯仔就揀咗大骨,肉厚入味得嚟唔會煲到嚡哂,反而仲幾嫩滑。點黑豉油加蒜蓉嚟食最啱味!
 


奶油蝦($108)

呢度有唔同蝦、魷魚同蜆菜式,最易入口嘅就要數到呢碟奶油蝦。奶油醬汁Creamy,帶微辣同蝦嘅鮮味。蝦肉亦夠彈牙,係一道大人小朋友都會鍾意嘅菜式。
 


炸饅頭($18/3個,$32/半打)

奶油蝦嘅醬汁唔好嘥,除咗撈飯,仲可以點一份炸饅頭點嚟食。饅頭炸至外脆內軟,撕開後吸滿奶油醬汁再食,小心會食到停唔到口!
 

更多【新店直擊】:
1. 特濃龍蝦湯底+灸燒叉燒 灣仔抵食博多風拉麵
2. 尖咀新開本地茶飲店 水墨畫風芝麻烏龍麻糬鮮奶
3. 黃大仙竹園夜市新開張 一站式掃皺皮腸粉+船麵+花膠翅

 

青辣椒蜆($78)

而青辣椒蜆就係馬來西亞人食開嘅香辣口味,青辣椒食落嘴唇會有少少麻,辣味突出。一樣好啱送返碗飯。
 


沙勞越喇沙($48)

麵食一樣好好多選擇:福建蝦麵、老鼠粉、白咖喱麵、娘惹喇沙等。比較少見嘅有呢碗沙勞越喇沙,喺馬來西亞東部流行,比西部嘅喇沙顏色更深,用巴拉盞同蝦殼熬製再加上椰漿,所以除咗濃郁香料味之外仲有一陣椰香。記得將巴拉盞倒埋落去撈麵,味道層次更上一層樓。
 


美祿恐龍(單點$26,跟餐$16)

食咗唔少辣嘢,不妨飲返杯飲品解辣。呢杯美祿恐龍夠哂足料,飲落啖啖都好濃郁!上面仲有蜜糖星星裝飾,亦係唔少小朋友嘅心水呀。
 








捌哥.捌哥特色馬拉茶啡廳
地址:深水埗汝州街188號地下




文、相、片:Cathy

關鍵字
深水埗
馬來西亞菜
肉骨茶
奶油蝦
辣死他啦
辣死你嗎
喇沙
捌哥.捌哥特色馬拉茶啡廳
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
$68鰻魚飯 日本人氣連鎖鰻魚專門店登陸尖沙咀 香港Menu率先試
2018-12-10
【又到聖誕】任食各款海鮮、環球美食!聖誕自助晚餐精選
2018-11-26
【特約分享】尖咀商場搵食地圖 多國美食任你揀
2018-11-30
2019及歷屆米芝蓮香港澳門指南完全版
2018-12-11
佔地三層!九龍城新開日式料理 一次食勻壽司+鐵板燒+ 爐端燒(有片)
2018-11-19