泰好食!曼谷6間泰式地道小食
2019-09-12
唔少人都鍾意去東南亞旅行,泰國曼谷就係其中一個熱門旅遊點,每日瘋狂Shopping、做massage、食好西是常識吧。開飯仔專誠搵咗泰國當地嘅同事為大家搜羅在地人最推介嘅美食!

去泰國又點止行市集掃街呢?大熱天時,坐低試下泰國嘅地道小食,都係唔錯嘅選擇~今次向大家介紹喺當地非常有名氣嘅街頭餐廳,性價比高之餘,仲「泰味」十足呀!

 米芝蓮街頭小炒 Jay Fai 

招牌菜﹕蟹肉奄列 (1,000 baht)

呢間街頭餐廳老闆娘Jay Fai,擔當埋大廚,煮餸嗰陣最鍾意戴著佢嘅招牌潛水鏡,好易認。呢間舖有70幾年歷史啦,由Jay Fai爸爸開嘅,而家就輪到Jay Fai繼承喇,近呢兩年仲獲選為曼谷米芝蓮一星餐廳添!用料靚啲,所以價錢比一般路邊攤亦都貴啲,但絕對值得一試~

卜卜脆燒肉 Guay Jub Mr. Joe

招牌菜﹕Guay jub(胡椒湯米粉 + 脆皮燒肉)

「Guay Jub」就係胡椒湯入面浸米粉同脆皮燒肉啦!胡椒湯夠晒足料,又辣又入味。食個「Guay Jub」當早餐,包你成個人都醒晒呀!必食招牌菜仲有佢哋嘅脆皮燒肉,點埋甜豉油就更香口啦~ Guay Jub Mr. Joe曾同時獲曼谷米芝蓮選為車胎人同街頭美食推介,喺當地非常出名,所以要去朝聖嘅話一定要喺朝早去呀!晏啲去就咩都賣晒啦!

粉紅色湯麵 Nai Ouan Yentafo  

招牌菜﹕Yentafo(粉紅色湯麵)

點解呢碗魚蛋麵嘅湯底會係粉紅色?係因為裡面嘅豆瓣醬呀。佢哋嘅豆瓣醬鹹鹹地,勁入味,可以話係成碗麵嘅精髓。除咗魚蛋麵之外,佢哋秘製嘅鹹豬肉麵都非常特別,湯底加啲啲嘅辣醬,辣得嚟又非常香口~唔夠飽仲可以叫埋魚蛋、炸蝦丸加餸呀。呢間同樣都係米芝連街頭小食推介同餐盤推介嚟呀。


招牌菜﹕泰式雞飯

佢哋嘅雞飯喺曼谷可以話係數一數二,CP值超高~雞油撈飯再配上juicy嘅白切雞,簡直係絕配啦!如果你想一試呢碟地道嘅泰式雞飯,就要去曼谷嘅水門市場喇,米芝蓮推介街頭小食+必比登嚟呀。

又脆又腍蠔餅 Nai Mong Hoi Thod  

招牌菜﹕煎蠔餅

蠔餅唔一定得香港同台灣先有啦,泰國都十分常見,但一般都唔會太脆身,亦都唔會太腍。但喺呢間餐廳你就可以試到又脆又腍身嘅蠔餅啦!餐廳位於曼谷嘅唐人街,四周圍都係各式各樣嘅泰式小食,一條大街就可以食盡泰國啦~

細細碗船麵 Kuetiau Lua Payak

招牌菜﹕豬肉船麵

相信大家近年都聽過「船麵」呢個名啦,雖然呢間餐廳並唔係真係喺船上賣麵,但佢哋跟足傳統做法,喺湯入面加入牛,或者豬嘅血,去提升湯嘅濃味。食船麵嗌兩、三碗都未飽,絕對唔係你胃口突然大咗,而係船麵真係好細碗~嗌多幾碗,仲可以順便試多幾種口味呢。


關鍵字
泰國
曼谷
燒肉
雞飯
蠔餅
船麵
開飯專題
開飯仔為你提供各類型最新飲食情報及優惠,全面照顧你的飲食喜好。
本月熱門
【隨時更新】零食速報 每周新款零食、酒品點評
6天前
全城抗炎! 5間酒店自助餐轉型 任點任食海鮮/主食/甜品 變陣保衛生
2020-03-17
【特約分享】超抵外賣陪你抗疫 即睇將軍澳飲食地圖!
2020-03-10
【隨時更新】最後倒數!即將結業的老字號及人氣小店
1天前
2月份好評餐廳十強
2020-03-05