油麻地新開小木屋Cafe 嘆西日Fusion龍蝦湯烏冬配咖啡
2020-09-08

大家對彌敦道嘅印象可能都係人多車多,但喺油麻地轉角就新開咗呢間旺中帶靜嘅Cafe,裝修以木、水泥為主,加上植物點綴感覺清新舒適。食物就走西日Fusion風格,好似自己斟嘅龍蝦湯烏冬,厚肉鰻魚漢堡等等,難怪迅速成為排隊熱店!
 


不籽是咖啡位於彌敦道450號,唔喺大街而係要轉入去巷仔裡面,門口嘅花紋地磚同長木凳已經係一大打卡位,而裡面裝修同樣以簡約自然為主,有大玻璃窗採光度高最啱相機食先。
 


龍蝦湯配牛油果大蝦稻庭烏冬($128)

香港Cafe都係供應西式輕食多,呢間就有西日Fusion主食選擇,而且分量十足希望大家有得食飽啲。呢份龍蝦湯配牛油果大蝦稻庭烏冬嘅龍蝦湯用壺分開上,畀大家按自己進食速度自己斟,有得打卡同時亦唔怕食得慢會變凍晒。
 


橙色嘅龍蝦湯用咗龍蝦同多款蔬菜熬成,有龍蝦香氣之餘又有蔬菜嘅鮮甜味。同鮮甜爽口嘅大蝦、滑溜彈牙嘅稻庭烏冬都好夾,木魚絲同紫菜亦增添鮮味。略嫌牛油果味道同龍蝦湯就唔係特別夾,建議可以分開食。
 


味噌蟹醬蟹籽蟹肉扁意粉($128)

另一餐廳推介,用日本進口味噌蟹醬做成Creamy醬汁,蟹膏香味同味噌鹹味平衡有致。加上彈牙嘅蟹肉、一粒粒爆開嘅蟹籽、蘑菇等配料,鮮味十足。扁意粉亦相當掛汁。
 


鰻魚滑蛋漢堡配松露薯條($128)

漢堡包夾住鰻魚加上滑蛋,真係好有日式西餐Feel。蒲燒鰻魚肉厚結實,味道香甜,而滑蛋就採用日本空運雞蛋,炒至半熟保持滑嫩。麵包亦特別請本地供應商搵到呢款口感鬆軟嘅漢堡麵包,建議大家影相唔好影太耐,凍咗口感會略為變硬㗎。
 


柚子漬蓮藕($38)

小食有日式同西式選擇,呢份就係日式嘅柚子漬蓮藕,用韓國柚子蜜自家醃漬。柚子清香突出,而且唔會太甜,配搭爽脆又涼涼哋嘅蓮藕,無論口感同味道都好醒胃。
 

更多【新店直擊】:
1. 將軍澳新開親民日式家庭料理 5款湯底+30款配料自選百搭烏冬
2. 中環新開西班牙蛋糕餅店 必試!香濃幼滑 焦香巴斯克芝士蛋糕
3. 健康穀物茶飲配桃膠!尖沙咀新開文青感台式飲品店

 

Dirty($40)

除咗Cold Brew會用單品豆,其他咖啡飲品就會用請本地炒豆師調配嘅House Blend咖啡,入口微酸而之後會有榛子、黑朱古力嘅風味,香醇厚滑。Dirty係熱Espresso撞上凍鮮奶,Nutty香氣更明顯嘅同時餘韻亦帶出甜味。
 


Mojito Soda($48)

餐廳叫得不籽是咖啡就當然唔單止得咖啡啦,亦有梳打、花茶、朱古力等唔同飲品。呢杯Mojito Soda係雞尾酒Mojito嘅無酒精版本,青檸嘅酸香、薄荷嘅冰涼加上梳打水嘅氣泡感,消暑一流。
 





不籽是咖啡
地址:油麻地彌敦道450號文豪閣地下D號舖




文:Cathy
相、片:Tom Li

關鍵字
油麻地
Cafe
烏冬
咖啡
不籽是咖啡
新店直擊
走在最前線,為大家搜羅及報道有關新開餐廳的資訊。
餐廳資料
本月熱門
【隨時更新】零食速報 每周新款零食、酒品點評
2020-09-11
全城抗炎!屋企都嘆到三層架下午茶 Tea Set外送/外賣自取推介
4天前
悠閒時光 9月份下午茶推介
2020-09-02
【9月生日優惠】最低至半價!生日平食放題.韓式炸雞
2020-09-02
Stephy新開茶飲店 台灣回流 期間限定 聯乘Snoopy推棉花糖朱古力特飲
2020-09-11