通常食蒸氣海鮮鍋都要一大班人去先食到，銅鑼灣呢間新開嘅蒸氣鍋就無呢個煩惱啦！餐廳主打一人一鍋，每個座位同座位之間都可以落窗簾隔開，自己一個食都唔怕尷尬。

其中一位合夥人吳先生係水上人出生，同時都係香港仔魚市場嘅海鮮供應商，所以餐廳所有海鮮都係由吳先生每天親手揀，然後直送到餐廳，保證新鮮！

海鮮蒸氣火鍋就有三個套餐揀，分別係$188 <<九品芝麻套餐>>、$248 <<內務總管套餐>> 同$328 << 八府巡按套餐>>，每份套餐都會有一份海鮮、肉類、手打丸同蔬菜拼盤，唔同嘅就係價格高啲嘅套餐就會有多幾款海鮮。鍋底就可以選擇粥底或唔同口味嘅魚湯，兩者都吸收哂海鮮嘅精華，好鮮甜～

八府巡按套餐($328)

套餐嘅海鮮盤有半隻蟹、帶子、蝦、鮮魚片、白蜆、鮑魚、貴妃蚌、半隻龍蝦、元貝同蟶子王。放入海鮮後，有埋計時器比大家計時，餐牌有埋指引教蒸幾耐，咁就唔怕蒸過龍啦～不過就建議將啲差唔多時間嘅海鮮放埋一齊蒸會好啲。

龍蝦大隻彈牙，蟹都多肉鮮甜，而且仲有蟹膏添！

食完哂配料後，每次嘅亮點都係鍋底內海鮮蒸煮時滴落嘅汁，除咗可以選擇粥底外，仲有原味、鮮茄同麻辣口味嘅魚湯揀，魚湯選用大量新鮮嘅海魚熬製，用嚟淥配料同麵食都好啱～

另外餐廳仲可以自己用電話Scan  QR Code點野食，咁想食幾多都唔怕尷尬啦！

船渦

地址: 銅鑼灣謝斐道500號維安商業大廈3樓

文：Yanica
相、片：Tom Li