咦，又係你呀欣宜，2016猴年最威係你啦，橫掃樂壇多個獎項，首《女神》唱到街知巷閒，嚟到雞年有咩新搞作先？今次就唔係介紹新歌，而係佢自家品牌Homie Cookies出咗新年版軟曲奇禮盒，。包裝盒上面有好多蔗嘅暗花，喻意「掂過碌蔗」，意頭就有喇，口味又點呢？

一個禮盒入面有8塊曲奇（售$288），4款口味，每款2塊，當中兩款係復刻版，包括金莎朱古力榛子醬（下圖右上）同覆盆子白朱古力玫瑰花瓣（下圖左下），前者好似食緊金莎咁，面頭脆口但曲奇會偏軟，因為軟曲奇唔似一般硬曲奇食脆口，而係軟有嚼頭，加埋威化、榛子醬同杏仁粒口感好豐富；後者就有陣陣玫瑰花香，但唔會過重，覆盆子帶微酸幾清新。

今次仲有兩款新口味，首先係拖肥杏仁碎朱古力牛油曲奇（下圖左上），非常厚身，同其他唔同，反而有啲奶油酥餅質感偏脆，牛油味香濃，面頭鋪滿朱古力漿、拖肥糖同杏仁碎，就脆上加脆！另一款開飯仔最鍾意，就係紅豆麻糬抹茶曲奇，曲奇中間加咗麻糬超級煙韌，比其他軟曲奇更有咬口，抹茶味道適中，無太甜太苦，配埋好拍檔紅豆就好似日式甜品嘅抹茶紅豆丸子變奏版。

如果你都有興趣，可以於網上或實體店訂購，唔使下下送年糕咁傳統。