榴槤豆乳甜品 人氣新派豆乳主題店最新搞作
3天前

豆乳同咩夾?人氣豆乳品牌已經發掘咗唔少潛力CP,例如芋泥豆乳、桃膠豆乳、豆花豆乳等,最近佢哋又創造咗多對CP出嚟啦~ 榴槤MIX 豆乳!

 榴槤奶蓋豆乳

品牌選用D24蘇丹王榴槤,取其肉香味濃、綿密厚實,同豆乳嚟個crossover,創作咗一系列嘅榴槤甜品,暫定期間限定供應至12月。當中最signature梗係榴槤奶蓋豆乳啦。佢哋本身嘅豆乳豆香甚濃,所以就算同榴槤拼埋一齊,都依然飲得出豆香。呢杯榴槤奶蓋豆乳,有大大嚿creamy嘅榴槤果肉喺面,同時混入埋糯米小丸子同以7.6特濃豆乳做嘅布甸,口感豐富。但可能大家都會問,係咪淨得嗰嚿榴槤肉咋,咁食晒咪冇囉?NoNoNo,製作時店員會先以榴槤肉抹杯㗎,所以成杯無論飲到邊度,都繼續有陣陣嘅榴槤香味呀。

 榴槤奶蓋豆花

同樣都係以榴槤抹杯嘅榴槤奶蓋豆花,口感綿滑,同埋creamy嘅榴槤肉一齊放入口,可以唔係好使點咬。濃郁嘅榴槤甜香中,都滲有陣陣豆香,呢個搭配都唔錯。另外有幾粒煙韌嘅白玉丸子以增加層次感。

 超煙韌榴槤奶蓋

超煙韌榴槤奶蓋唔係講緊啲榴槤煙韌,而係講緊入面嘅配料,幾乎舖頭內你數得出嘅煙韌嘢都放晒入去,包括有珍珠、小丸子同九份特產芋圓,真心超足料。各款丸子佔咗成三分二隻杯,啖啖都好有嚼勁,而且仲好有飽肚感。不過有少少可惜係,榴槤嘅味道太濃,以至各款丸子原有嘅味道被蓋過咗,無論咬緊咩丸都係榴槤味。

 榴槤豆乳芭菲

最後一款榴槤甜品就係榴槤豆乳芭菲。多層配料包括豆乳布丁、粟米片、糯米糍、麻糬、蕨餅、白玉、以日本大豆製成嘅12度豆乳雪糕,當然唔少得D24榴槤肉啦,超級豐富嘅組合。係肥仔㗎喇,但肥得開心嘛。

 Oreo奶蓋可可豆乳、紫米豆乳、黑白芝麻豆乳

除咗榴槤甜品外,餐廳早前都出咗啲新產品,例如Oreo奶蓋珍珠豆乳同Oreo奶蓋可可豆乳。奶蓋係以自家製豆漿加忌廉,取代鮮牛奶打成,再加上Oreo碎。口感相對上輕盈少少,豆香加Oreo甜香亦令人難以抗拒。

 炸芋圓

三色炸芋圓小食分別係炸番薯、紫薯同芋頭,三款搭款嘅醬料則有奶蓋、煉奶同黃豆粉。點醬食係甜甜地嘅,不過開飯仔更推薦原粒就咁食,一嚟脆口啲,二嚟可以食得到真係真材實料,原本番薯、紫薯同芋頭嘅味道呀。

 (左)荃灣店、(右)樂富店


SOYmart by 豆乳狂人
荃灣、沙田、樂富均有分店

文:Kar
相:Michael

關鍵字
荃灣
樂富
沙田
榴槤
豆乳
飲食潮流
開飯仔為大家發掘香港這個美食之都的最新美食資訊,分享飲食潮流文化。
餐廳資料
本月熱門
【2022生日優惠】持續更新!9月壽星嘆免費生日蛋糕+半價西式晚餐
2022-08-31
【隨時更新】零食速報 每周新款零食、酒品點評
3天前
異國風情 9月主題下午茶推介
2022-09-01
牛魔王福音!A5和牛火鍋放題 尖沙咀新店120分鐘任食
2022-09-01
酒店藝術感蜂蜜主題下午茶 送$720法國知名品牌護膚品
2022-09-09