東涌新開9000呎美食廣場 米芝蓮推介泰菜+清湯腩名廚坐陣+豬大腸肉骨茶
2019-09-23

去東涌唔係淨係行Outlet嘅~一向被譽為美食沙漠嘅東涌,最近新開咗一個佔地9000呎嘅美食廣場,提供309個座位。Food Court裝潢以「本土情懷」為主題,有9間餐廳進駐,無論中、日、韓、泰美食都有!無論係東涌嘅街坊們定突登入嚟行街嘅朋友,以後搵食又多個選擇啦。


食物種類方面,由本土香港風味,到東南亞、日韓及中式名菜都應有盡有,當中最值得推介包括有清湯腩名廚主理嘅清湯腩店及連續多年獲得港澳區米之蓮推介嘅泰國菜。除此之外,仲有唔少期間限定嘅菜式添。


清湯腩名廚坐鎮 天后站清湯腩

主廚兼創辦人蘇師傅曾助香港一間清湯腩小店獲得米芝蓮美譽,而佢自立門戶後當然都大受好評啦。清湯牛腩飯選用靚牛腩,肉質爽滑有彈性,湯底加入紅棗、沙參等10種藥材湯包每日熬製3小時,湯濃而清。崩沙腩擔擔麵,筋肉膜位特別好食,湯底亦濃郁惹味。


米之蓮推介 泰潮 Thai Chiu

餐廳由2011至2019 年連續9年獲得港澳區米之蓮推介,泰式滷水豬髀飯選用豬後髀肉,厚肉嫩滑,豬皮亦彈牙唔肥膩,滷水汁加入甘草、桂皮、花椒同八角等10多種泰式香料,香甜惹味!另外呢度都體驗到泰式風味,3色泰式船河套餐可以一次試勻迷你船粉、迷你冬蔭功湯粉及迷你唐人街粿汁,啱晒貪心嘅朋友。


人氣點心店 御名軒

餐廳首次進駐美食廣場,今次真係Food Court都食到酒樓質素嘅點心啦~蟲草花蒸雞飯 ,選用無骨雞髀肉,雞肉嫩滑,另加入甘甜嘅鮮橙色蟲草花,有養生保健之效。牛肉腸粉都係即叫即製㗎。


日本人氣牛扒連鎖店 胡椒廚房

Pepper lunch相信大家都唔陌生啦~一口牛扒粒選用澳洲產地牛排,大理石紋多而且分佈均勻,一口大小方便食,牛味濃郁又Juicy。特選三拼有齊牛、雞及漢堡扒,啱晒各位食肉獸。


蛋包飯專家 一本日式蛋包飯

新店獨家限定瑞士雞翼蛋包飯,將港式雞翼加入日式蛋包飯,瑞士汁香甜又惹味。燒扇貝吉列豬扒蛋包飯,蛋內包裹住鰻魚汁炒飯,聽到都已經流晒口水了~


新加坡創意料理 三巡小廚

豬大腸肉骨茶同樣都係期間限定!肉骨茶以豬骨配上獨特香料及多種藥材慢火熬製而成,豬大腸亦吸收晒肉骨茶味道。海南鴛鴦雞飯套餐可以同時食到海南雞同燒雞,前者嫩滑雞味濃,後者就皮脆香口。


傳統韓式料理 韓國屋

呢度有早前大熱嘅韓國蟹膏雜錦拌飯食,用蟹膏代替辣醬配上多款蔬菜,健康之餘仲多咗份鮮味。講到韓國嘢又點少得芝士,拉絲芝士條有三個口味,分別係粟米甜番薯味、香濃豬肉味及泡菜炒飯味,又幾特別喎!不過兩款都係期間限定菜式,想食要早啲去啦喂。


港式燒味 盈暉燒味至尊

燒味雖然麻甩咗啲,但佢係唔少人心頭好嚟。呢度竟然有四寶飯嘅升級版八寶燒味飯,包括蜜汁叉燒、燒排骨、煙燻鴨胸、金牌燒鵝、香脆燒腩仔、玫瑰豉油雞、鹹蛋及紅腸,簡直係肥幾磅之選。金牌燒鵝髀飯係招牌菜!燒鵝經200°C高溫烤至金黃焦脆,外皮酥脆,肉汁豐富。


港式車仔麵 Quenches

食肉獸一樣唔可以錯過呢個咖喱啖啖肉摻摻麵,除咗啖啖肉外,摻摻掛滿咖哩湯,香而不辣。



食代館

地址: 東涌達東路20號東薈城7樓704號舖






文、相、片:  Yanica

關鍵字
東涌
美食廣場
港式
新店直擊
走在最前線,為大家搜羅及報道有關新開餐廳的資訊。
餐廳資料
更多
收起
本月熱門
【隨時更新】便利店尋寶 每周新品速報
4天前
【2019聖誕】早鳥優惠! 聖誕自助餐推介
6天前
【2019聖誕】年尾叉電 聖誕下午茶集合推介
2019-11-19
秋風起!5間大閘蟹放題食店集合
2019-11-19
【2019聖誕】約會之選 聖誕市集推介
2019-12-06