近年多咗主打唔同湯底嘅日本拉麵店嚟到香港，今次中環呢間就主打健康蕃茄沾麵！以有機蕃茄做湯底，而且可以自選辣度，打造獨特嘅和洋風格。老闆仲為香港人設計咗兩款撈麵，包括超多芫荽嘅香菜蕃茄汁撈麵呀。
 

The Tomatoman嚟自日本東京，香港首間分店選址中環，皆因餐廳主打嘅蕃茄沾麵糅合日式同西式風格。沾湯選用有機意大利蕃茄加和風湯頭製作，而蕃茄含有嘅茄紅素有抗氧化、防止血管老化等功效，亦符合現今追求健康飲食嘅潮流。
 

而麵條當然亦有考究，沿用日本製麵配方，再喺香港搵本地製麵廠改良製作。做出嚟嘅麵條偏粗身，口感煙韌有嚼勁，同時亦夠掛湯。而沾湯可以從微辣至特級辣（+$10）共6款辣度當中選擇。
 

達人招牌番茄汁沾麵（$128）

達人招牌沾麵簡單一句：即係有齊咁多特色配料！包括大大塊用日本黑毛豬製作嘅叉燒、特製煮豬肉、本地新鮮芫荽、溏心蛋、紫椰菜、紫菜、青瓜漬物，另附檸檬，畀大家按自己喜好擠出檸檬汁，令沾麵味道更清新。
 

沾湯望落相當濃郁，但食落其實蕃茄味道無想象中濃郁，感覺似帶蕃茄酸味嘅蔬菜湯。而且沾湯有秋葵、西蘭花等蔬菜，就咁飲其實幾有咬口。同埋唔好睇少佢哋嘅辣度，老闆用咗幾款唔同辣椒，唔食得辣嘅開飯仔食微辣都係勉強挑戰成功......
 

香菜番茄汁沾麵（$98）

而特別鍾意食芫荽嘅各位「荽友」，就要試呢份香菜番茄汁沾麵啦！落咗特別多本地新鮮芫荽，芫荽嘅清香同蕃茄嘅微酸非常夾。而且芫荽有豐富膳食纖維、維他命A、C同胡蘿蔔素，即係食落更健康呀喂！
 

芝士粉飯（$25/迷你版）

呢度其中一個特別食法，係先食沾麵，唔夠飽再點一份加咗車打芝士粉嘅飯，將剩低嘅沾湯倒落熱辣辣嘅飯上面，自製意大利芝士燴飯！芝士粉唔算特別多，勝在沾湯同車打芝士味道都夾。
 

 

香菜蕃茄汁撈麵（$108）

番茄汁撈麵（$98）

老闆為香港特別設計嘅兩款番茄汁撈麵！以招牌蕃茄沾湯為基礎，再加秘製醬汁，辛辣味道更突出。前者加咗更多本地新鮮芫荽，又係各位「荽友」必試！

炸雞件定食（$98）

生薑燒豬肉定食（$108）

除咗沾麵同撈麵，呢度亦有唔同小食同定食，好似炸雞件定食同生薑燒豬肉定食，都好有日本家庭料理嘅感覺。
 

溏心蛋紫菜番茄汁沾麵（$108）

The Tomatoman
地址：中環歌賦街13號地舖

文、相、片：Cathy